אֶל-הָרוֹמִיִּים

א    1 פּוֹלוֹס עֶבֶד יֵשׁוּעַ הַמָּשִׁיחַ שָׁלִיחַ נִבְחָר וּמְקֻדָּשׁ לְבַשֵּׂר אֶת-בְּשׁרַת הָאֱלֹהִים׃ 2 אֲשֶׁר מִקֶּדֶם הִגִּיד אֹתָהּ עַל-פִּי נְבִיאָיו בְּכִתְבֵי הַקֹּדֶשׁ׃ 3 עַל-דְּבַר בְּנוֹ אֲשֶׁר יָצָא מִזֶּרַע דָּוִד לְפִי בְשָׂרוֹ׃ 4 וְהוּכַן בֶּן-הָאֱלֹהִים בִּגְבוּרָה לְפִי רוּחַ הַקֹּדֶשׁ בַּהֲקִיצוֹ מִן-הַמֵּתִים הוּא יֵשׁוּעַ הַמָּשִׁיחַ אֲדֹנֵינוּ׃ 5 וְעַל-יָדוֹ נִתַּן לָנוּ חֵן וּמַלְאֲכוּת-יָהּ לְהַטּוֹת אֶת-לֵב כָּל-הַגּוֹיִם לָאֱמוּנָה בַּעֲבוּר שְׁמוֹ׃ 6 וּבְתוֹכָם הִנְּכֶם גַּם-אַתֶּם קְרִיאֵי יֵשׁוּעַ הַמָּשִׁיחַ׃ 7 כָּל-הַקָּהָל בְּרוֹמִי יְדִידֵי אֱלֹהִים בְּחִירָיו וּקְדֹשָׁיו חֶסֶד וְשָׁלוֹם יִתֵּן לָכֶם אֱלֹהִים אָבִינוּ וְיֵשׁוּעַ הַמָּשִׁיחַ אֲדֹנֵינוּ׃ 8 בְּפֵתַח דְּבָרַי אוֹדֶה אֶת-אֱלֹהַי בְּיֵשׁוּעַ הַמָּשִׁיחַ בְּעַד-כֻּלְכֶם כִּי אֱמוּנַתְכֶם שָׁמְעָה בְּכָל הָעוֹלָם׃ 9 וְהָאֱלֹהִים אֲשֶׁר בִּבְשׁרַת בְּנוֹ אֲנִי עֹבֵד אֹתוֹ בְּרוּחִי וְנַפְשִׁי הוּא עֵדִי כִּי לֹא-חָדַלְתִּי מֵהַזְכִּיר אֶתְכֶם׃ 10 וּמַעְתִּיר אֲנִי תָמִיד בִּתְפִלּוֹתַי לְמָתַי אֵפוֹא אַצְלִיחַ דַּרְכִּי בִּרְצוֹן אֱלֹהַי לָבוֹא אֲלֵיכֶם׃ 11 כִּי-נִכְסֹף נִכְסַפְתִּי לִרְאֹתְכֶם וּלְהַאֲצִיל מִן-מַתְּנַת הָרוּחַ עֲלֵיכֶם לְהוֹסִיף לָכֶם אֹמֶץ׃ 12 וְגַם-כֵּן לְהִתְנַחֵם עִמָּכֶם יַחְדָּו בֶּאֱמוּנַת אִישׁ וְאִישׁ מִמֶּנּוּ כְּמוֹכֶם כָּמֹנִי׃ 13 וְאֵין-נַפְשִׁי לְהַעֲלִים מִכֶּם אַחַי כִּי-רַבּוֹת נָתַתִּי אֶת-לִבִּי לָבוֹא אֲלֵיכֶם לִמְצֹא לִי מְעַט פְּרִי גַם-בָכֶם כְּמוֹ גַם-בְּיֶתֶר הַגּוֹיִם וְנִמְנַעְתִּי עַד-עָתָּה׃ 14 הִנֵּה בַּעַל חוֹב אֲנִי לִבְנֵי הַיְּוָנִים וְגַם-לִבְנֵי עַם לֹעֵז לִבְנֵי בִינָה וְלִבְנֵי בְלִי-בִינָה׃ 15 וּבְכֵן נָכוֹן אֲנִי לְפִי יְכָלְתִּי לְהַגִּיד אֶת-הַבְּשׁרָה גַּם-לָכֶם בְּנֵי רוֹמִי׃ 16 כִּי לֹא-אֵבוֹשׁ מִבְּשׁרַת הַמָּשִׁיחַ אֲשֶׁר גְּבוּרַת אֱלֹהִים הִיא לִתְשׁוּעָה אֶל-כָּל-מַאֲמִין הַיְּהוּדִי בְּרֹאשׁ וְגַם-הַיְּוָנִי׃ 17 כִּי-בָהּ נִגְלְתָה צִדְקַת אֱלֹהִים מִמְּקוֹר אֱמוּנָה לְמַעַן נִחְיֶה בֶאֱמוּנָה כַּכָּתוּב וְצַדִּיק בֶּאֱמוּנָתוֹ יִחְיֶה׃ 18 וַחֲרוֹן אֱלֹהִים מִשָּׁמַיִם נִשְׁקָף עַל-עֹשֵׂי רִשְׁעָה וּבְנֵי עַוְלָה הַכֹּבְשִׁים אֶת-הָאֱמֶת בְּעַוְלָתָה׃ 19 כִּי דַּעַת אֱלֹהִים בְּרוּרָה בְקִרְבָּם כִּי גִלָּה לָהֶם אֱלֹהִים׃ 20 כִּי חֶבְיוֹן עֻזּוֹ נֵצַח גְּבוּרָתוֹ וֵאלֹהוּתוֹ נוֹדְעוּ וְיָצְאוּ לָאוֹרָה עַל-יְדֵי פְעֻלּוֹתָיו מִיּוֹם בְּרֹא אֶרֶץ וְשָׁמָיִם עַד-כִּי אֵין-לָהֶם פֶּה לְהִצְטַדָּק׃ 21 כִּי יֹדְעִים הֵם אֶת-הָאֱלֹהִים וְלֹא נָתְנוּ לוֹ כְבוֹדוֹ אַף-לֹא הוֹדוּ לוֹ כִּי אִם-בְּמוֹעֲצוֹתֵיהֶם יֶהְבָּלוּ וְלִבָּם הַנִּבְעָר הָלַךְ חֲשֵׁכִים׃ 22 יִתְאַמְּרוּ כִּי חֲכָמִים הֵם עַל-כֵּן נִבְעָרוּ׃ 23 וַיָּמִירוּ כְבוֹד אֲדֹנָי אֵל עוֹלָם בִּדְמוּת תַּבְנִית אָדָם בֶּן-תְּמוּתָה וְתַבְנִית עוֹף הַשָּׁמַיִם וְהוֹלֵךְ עַל-אַרְבַּע וְרֶמֶשׂ הָאֲדָמָה׃ 24 עַל-כֵּן אֱלֹהִים הִסְגִּירָם בְּיַד שְׁרִרוּת לִבָּם לְטֻמְאָה וּלְחַלֵּל בְּשָׂרָם הֵם בֵּינֵיהֶם׃ 25 אֲשֶׁר הֵמִירוּ אֱלֹהֵי אֱמֶת בַּשָּׁקֶר וַיִּירְאוּ וַיַּעַבְדוּ אֶת-הַנּוֹצָר עַל-פְּנֵי הַיּוֹצֵר בָּרוּךְ הוּא לְעוֹלָם וָעֶד אָמֵן׃ 26 בַּעֲבוּר זֹאת הִסְגִּירָם אֱלֹהִים בְּיַד קְלוֹן תְּשׁוּקָתָם כִּי גַּם-נְשֵׁיהֶם הֶחֱלִיפוּ אֹרַח חֻקָּתָן בְּאֹרַח זָר׃ 27 כַּאֲשֶׁר גַּם-הַגְּבָרִים חָדְלוּ מִבּוֹא אֶל-הַנָּשִׁים כְּדֶרֶךְ כָּל-הָאָרֶץ וַתִּבְעַר-בָּם אֵשׁ תַּאֲוָתָם אִישׁ אֶל-רֵעֵהוּ וְגֶבֶר בְּגֶבֶר יִתְעַלְּלוּ לְקִיקָלוֹן וְעֵקֶב תַּעְתֻּעֵיהֶם לָקְחוּ דֵי-גְמוּל בְּנַפְשׁוֹתָם׃ 28 וְכַאֲשֶׁר לֹא חָפְצוּ הַשְׂכֵּל וְיָדֹעַ אֶת-הָאֱלֹהִים כֵּן עֲזָבָם בִּמְשׁוּבַת לִבָּם לַעֲשׂוֹת אֵת אֲשֶׁר-לֹא יֵעָשֶׂה׃ 29 עַד אֲשֶׁר מָלְאוּ כָּל-עַוְלָה זְנוּת רֶשַׁע בֶּצַע וָאָוֶן וְגַם-קִנְאָה וְרֶצַח מָדוֹן וּרְמִיָּה וּמְזִמָּה׃ 30 כֻּלָּם מַלְשִׁינִים וְהֹלְכֵי רָכִיל שׁנְאֵי אֱלֹהִים וְהוֹלְלִים גֵּאִים וּרְהָבִים חָרָשֵׁי מַשְׁחִית וּמַמְרִים לְהוֹרֵיהֶם׃ 31 חַסְרֵי דַּעַת וּמְפִירֵי בְרִית אַכְזָרִים נֹטְרֵי שִׂנְאָה אֲשֶׁר חֲנִינָה לֹא יֵדָעוּ׃ 32 וְהֵם אַף-כִּי יֹדְעִים מִשְׁפַּט אֱלֹהִים כִּי-הָעֹשִׂים מַעֲשִׂים כָּאֵלֶּה בְּנֵי-מָוֶת הֵם בְּכָל-זֹאת לֹא לְבַד כִּי יַעֲשׂוּם כִּי-אִם גַּם-יְאַשְּׁרוּן עוֹד עֹשֵׂיהֶם׃

ב    1 עַל-כֵּן בֶּן-אָדָם קָטֹן אוֹ גָדוֹל אֵין צְדָקָה לְךָ לִהְיוֹת שֹׁפֵט כִּי בַדָּבָר אֲשֶׁר תַּרְשִׁיעַ אֶת-רֵעֲךָ תַּרְשִׁיעַ גַּם אֶת-נַפְשְׁךָ אַחֲרֵי אֲשֶׁר גַּם-אַתָּה הַשֹּׁפֵט עָשִׂיתָ כְּמַעֲשֵׂהוּ׃ 2 וַאֲנַחְנוּ הֲלֹא יָדַעְנוּ כִּי בְּמֵישָׁרִים יִשְׁפֹּט אֱלֹהִים כָּל-פֹּעֲלֵי אָוֶן׃ 3 וְאַתָּה בֶן-אָדָם בְּשָׁפְטְךָ אֹתָם וּכְמַעֲשֵׂיהֶם גַּם-אַתָּה עֹשֶׂה הֲתֹאמַר אֶל-לִבְּךָ כִּי תִמָּלֵט מִמִּשְׁפַּט אֱלֹהִים׃ 4 אוֹ הֲתָבוּז רֹב טוּבוֹ וְחֶמְלָתוֹ וְאֶרֶךְ אַפּוֹ וְלֹא תִתְבּוֹנֵן כִּי-בְטוּבוֹ הוּא מַדְרִיכְךָ לָשׁוּב אֵלָיו׃ 5 וּבִשְׁרִרוּת לִבְּךָ וּבְעָרְפְּךָ הַקָּשֶׁה תִּצְבָּר-לְךָ עֶבְרָה לַיּוֹם הַגָּדוֹל וְהַנּוֹרָא בְּהִגָּלוֹת נִגְלוֹת צִדְקַת מִשְׁפַּט אֱלֹהִים׃ 6 אֲשֶׁר יִגְמֹל לְאִישׁ אִישׁ כְּמִפְעָלָיו׃ 7 חַיֵּי עוֹלָם לְשֹׁקְדֵי עֲשׂה-טוֹב שֹׁחֲרֵי כָבוֹד וְהָדָר אֲשֶׁר לֹא יַעֲבֹר לָנֶצַח׃ 8 וְזַעַף וְעֶבְרָה לִבְנֵי מֶרִי הַמְמָאֲנִים לִשְׁמֹעַ דִּבְרֵי אֱמֶת וְלַעֲשׂוֹת עָוֶל יָהִינוּ׃ 9 צָרָה וְצוּקָה לְכָל-נֶפֶשׁ אִישׁ הַפֹּעֵל רָע הַיְּהוּדִי בְּרֹאשׁ וְגַם-הַיְּוָנִי׃ 10 וְכָבוֹד וְהָדָר וְשָׁלוֹם לְכָל-פֹּעֵל טוֹב הַיְּהוּדִי בְּרֹאשׁ וְגַם-הַיְּוָנִי׃ 11 כִּי אֵין-מַשּׂא פָנִים עִם-הָאֱלֹהִים׃ 12 כִּי כָל-אֵלֶּה אֲשֶׁר חָטְאוּ בִּבְלִי-תוֹרָה גַּם בִּבְלִי-תוֹרָה יֹאבֵדוּ וְאֵלֶּה אֲשֶׁר חָטְאוּ וְתוֹרַת אֲדֹנָי אִתָּם עַל-פִּי הַתּוֹרָה הַזֹּאת יִשָּׁפֵטוּ׃ 13 כִּי לֹא שֹׁמְעֵי הַתּוֹרָה צַדִּיקִים הֵם לִפְנֵי אֱלֹהִים כִּי אִם-שֹׁמְרֵי הַתּוֹרָה יִצְדָּקוּ׃ 14 כִּי הַגּוֹיִם אֲשֶׁר אֵין-לָהֶם אוֹר תּוֹרָה וְעֹשִׂים כְּדִבְרֵי הַתּוֹרָה עַל-פִּי אוֹר דַּעְתָּם הֵם אֲשֶׁר תּוֹרָה אֵין לָהֶם יִהְיוּ תוֹרָה לְנַפְשָׁם׃ 15 בְּהַרְאֹתָם כִּי מִשְׁפַּט הַתּוֹרָה כָּתוּב עַל-לוּחַ לִבָּם בַּאֲשֶׁר דַּעְתָּם תַּגִּיד לָהֶם וְעֶשְׁתֹּנוֹתֵיהֶם חֲלִיפוֹת שׂטְנוֹת אוֹ מְזַכּוֹת אִשָּׁה אֶת-אֲחוֹתָהּ׃ 16 בַּיּוֹם הַהוּא אֲשֶׁר יִשְׁפֹּט אֱלֹהִים אֶת-סִתְרֵי בְנֵי אָדָם עַל-פִּי יֵשׁוּעַ הַמָּשִׁיחַ כַּאֲשֶׁר הוֹדַעְתִּי בִּבְשׁרָתִי׃ 17 וְאַתָּה כִּי נִקְרֵאתָ בְשֵׁם יְהוּדִי וַתָּשֶׁת מִבְטַחֲךָ בַתּוֹרָה וּבֵאלֹהִים תִּתְהַלֵּל נַפְשֶׁךָ׃ 18 כִּי יָדַעְתָּ אֶת-רְצוֹנוֹ וְתָבִין לְהַבְדִּיל בֵּין-טוֹב לָרָע לִהְיוֹתְךָ מַשְׂכִּיל בַּתּוֹרָה׃ 19 וְלִבְּךָ בָטוּחַ כִּי אַתָּה הוּא הַמְנַהֵל לְעִוְרִים וְאוֹר לְישְׁבֵי חשֶׁךְ׃ 20 מוֹרֶה לִפְתָאיִם אַלּוּף לִילָדִים וְחוֹתַם תָּכְנִית בְּדַעַת וֶאֱמֶת בַּתּוֹרָה׃ 21 וְאַתָּה הַמְאַלֵּף אֶת-אֲחֵרִים הֲלֹא תְאַלֵּף אֶת-נַפְשֶׁךָ אַתָּה הַקֹּרֵא לֹא-תִגְנֹב הֲתִגְנֹב אָתָּה׃ 22 אַתָּה הַאֹמֵר לֹא-תִנְאָף הֲתִנְאֹף אָתָּה אַתָּה אֲשֶׁר תְּשַׁקֵּץ אֶת-הָאֱלִילִים הֲתִמְעַל מַעַל בַּקֹּדֶשׁ׃ 23 אַתָּה כִּי תִתְהַלֵּל בַּתּוֹרָה הַתְחַלֵּל שֵׁם הָאֱלֹהִים וְסוּר מִן-הַתּוֹרָה׃ 24 כִּי בִגְלַלְכֶם שֵׁם אֱלֹהִים מְחֻלָּל בַּגּוֹיִם כְּמוֹ שֶׁכָּתוּב׃ 25 כִּי אָמֵן הַמּוּלָה לְהוֹעִיל לְךָ אִם-תִּשְׁמֹר אֶת-הַתּוֹרָה אַךְ אִם אֶת-הַתּוֹרָה הֵפַרְתָּ הֲלֹא מוּלָתְךָ לְעָרְלָה נִהְיָתָה׃ 26 וְאִם הֶעָרֵל יַעֲשֶׂה כְּמִשְׁפַּט הַתּוֹרָה עָרְלָתוֹ לְמוּלָה תֵּחָשֶׁב-לוֹ׃ 27 וְהֶעָרֵל הַזֶּה מִלֵּדָה הָעֹשֶׂה כְמִשְׁפַּט הַתּוֹרָה יָדִין אֹתְךָ אֲשֶׁר יֶשׁ-לְךָ סֵפֶר הַמִּצְוָה וְאוֹת בְּרִית הַמּוּלוֹת וְאֶת-הַתּוֹרָה הֵפַרְתָּ׃ 28 כִּי לֹא-זֶה הוּא יְהוּדִי אֲשֶׁר לָעֵינָיִם וְלֹא זֹאת הִיא הַמּוּלָה אֲשֶׁר לַמַּרְאֶה בַּבָּשָׂר׃ 29 אַךְ זֶה יְהוּדִי אֲשֶׁר בְּתוֹךְ לִבּוֹ הוּא יְהוּדִי וְהַמּוּלָה מוּלַת הַלֵּבָב הִיא לְפִי רוּחַ הַדִּבֵּר וְלֹא לְפִי אוֹת הַכְּתָב אֲשֶׁר תְּהִלָּתוֹ לֹא מִבְּנֵי אָדָם כִּי אִם מֵאֱלֹהִים׃

ג    1 אִם כֵּן אֵפוֹא מַה-יִּתָרוֹן לִיהוּדִי וּמַה-בֶּצַע לוֹ בִּבְרִית הַמּוּלוֹת׃ 2 רַב מְאֹד מִכָּל-עֵבֶר וְיִתְרוֹן הָרֹאשׁ כִּי-הָפְקְדוּ אִתָּם דִּבְרֵי אֱלֹהִים׃ 3 וּמָה אֵפוֹא אִם-מִקְצָתָם לֹא הֶאֱמִינוּ הֶהָפֵר יָפֵר חֹסֶר אֱמוּנָתָם אֶת-אֱמוּנַת אֱלֹהִים׃ 4 חָלִילָה אַךְ אֱלֹהִים נֶאֱמָן הוּא וְכָל-אָדָם כֹּזֵב כַּכָּתוּב לְמַעַן-תִּצְדַּק בִּדְבָרֶיךָ וְתִזְכֶּה בְּהִשָּׁפְטֶךָ׃ 5 אַךְ אִם-יִוָּדַע עֹז צִדְקַת אֱלֹהִים עַל-יְדֵי פְשָׁעֵינוּ מַה-נֹּאמַר אֱלֹהֵי עָוֶל הוּא אֲשֶׁר יָעִיר חֲמָתוֹ עָלֵינוּ כְּדֶרֶךְ בְּנֵי-אָדָם אֲנִי מְדַבֵּר׃ 6 חָלִילָה כִּי אִם-כֵּן אֵיךְ-יִשְׁפֹּט אֱלֹהִים אֶת-הָאָרֶץ׃ 7 וְאִם-פִּשְׁעִי וְכַחֲשִׁי בֵאלֹהִים יִתֶּן-לוֹ עֹז וְכָבוֹד מִשְׁנֶה לָמָּה-זֶּה אֵצֵא רָשָׁע בְּהִשָּׁפְטִי׃ 8 אַךְ הֲלֹא זֶה הוּא דְּבַר מְנַדֵּינוּ הַמּוֹצִיאִים דִּבָּתֵנוּ רָעָה לֵאמֹר כִּי אֲנַחְנוּ אֹמְרִים נַעֲשֶׂה רָע בִּגְלַל הַטּוֹב אֲשֶׁר יָבֹא בַּעֲקֵבוֹ אֵלֶּה הֵם אֲשֶׁר בְּהִשָּׁפְטָם יֶאְשָׁמוּ׃ 9 וּמָה עַתָּה הֲיֵשׁ יִתְרוֹן לָנוּ אֶפֶס וָאָיִן כִּי לִפְנֵי כֵן הוֹכַחְנוּ כִּי יְהוּדִים וִיוָנִים בֶּעָוֹן הֵמָּה יָחַד׃ 10 כַּכָּתוּב אֵין צַדִּיק אֵין גַּם-אֶחָד׃ 11 אֵין מַשְׂכִּיל אֵין דֹּרֵשׁ אֶת-אֱלֹהִים׃ 12 הַכֹּל סָר יַחְדָּו נֶאֱלָחוּ אֵין עֹשֶׂה-טוֹב אֵין גַּם אֶחָד׃ 13 קֶבֶר-פָּתוּחַ גְּרֹנָם לְשׁוֹנָם יַחֲלִיקוּן חֲמַת עַכְשׁוּב תַּחַת שְׂפָתֵימוֹ׃ 14 אֲשֶׁר אָלָה פִּיהֶם מָלֵא וּמְרֹרוֹת׃ 15 רַגְלֵיהֶם יְמַהֲרוּ לִשְׁפָּךְ-דָּם׃ 16 שֹׁד וָשֶׁבֶר בִּמְסִלּוֹתָם׃ 17 וְדֶרֶךְ שָׁלוֹם לֹא יָדָעוּ׃ 18 אֵין פַּחַד אֱלֹהִים לְנֶגֶד עֵינֵיהֶם׃ 19 וַאֲנַחְנוּ יָדַעְנוּ כִּי כָל-אֲשֶׁר תַּגִּיד הַתּוֹרָה לָאֵלֶּה אֲשֶׁר קִבְּלוּ אֶת-הַתּוֹרָה תָּשִׂים דְּבָרֶיהָ וּבָזֹאת יִסָּכֵר כָּל-פֶּה וְכָל-הָאָרֶץ תֶּאְשַׁם לִפְנֵי אֱלֹהִים׃ 20 יַעַן בְּמַּעֲשִׂים אֲשֶׁר צִוְּתָה הַתּוֹרָה לֹא יִצְדַּק כָּל-בָּשָׂר לְפָנָיו כִּי מִמְּקוֹר הַתּוֹרָה יָצְאָה דַּעַת הַחֵטְא׃ 21 וְעַתָּה מִבַּלְעֲדֵי הַתּוֹרָה יָצְאָה צִדְקַת אֱלֹהִים לָאוֹר אֲשֶׁר הֵעִידוּ עָלֶיהָ הַתּוֹרָה וְהַנְּבִיאִים׃ 22 וְצִדְקַת אֱלֹהִים בֶּאֱמוּנַת יֵשׁוּעַ הַמָּשִׁיחַ נְתוּנָה לְכָל-בְּנֵי אָדָם לִבְנֵי אֱמֻנִים כֻּלָּם כִּי אֵין-מַבְדִּיל׃ 23 כִּי-כֻּלָּם חָטָאוּ וַיִּסֹּגוּ מֵאַחֲרֵי כְבוֹד אֱלֹהִים׃ 24 וּבְחִנּוֹ חִנָּם כֻּלָּם יִצְדָּקוּ כִּי-פָדָה אֹתָם יֵשׁוּעַ הַמָּשִׁיחַ׃ 25 הוּא אֲשֶׁר הִקְדִּישׁוֹ אֱלֹהִים מִקֶּדֶם לְכַפֵּר עָלֵינוּ בְדָמוֹ עַל-פִּי אֱמוּנָתֵנוּ לְבַעֲבוּר גַּלּוֹת אֶת-צִדְקָתוֹ וְחֶמְלָתוֹ בַּאֲשֶׁר סָלַח לַעֲוֹנוֹת עַמּוֹ מִימֵי קֶדֶם׃ 26 וְגַם לְגַלּוֹת אֶת-צִדְקָתוֹ לְעֵת כָּזֹאת כִּי הוּא הַצַּדִּיק וְהוּא הַמַּצְדִּיק אֶת-הַמַּאֲמִין בְּיֵשׁוּעַ׃ 27 אַיֵּה אֵפוֹא עַתָּה גְּאוֹן הַמִּתְהַלְּלִים אֵין כָּל-מְאוּמָה עַל-פִּי אֵיזֶה חֹק עַל-פִּי חָק-הַמַּעֲשֶׂה לֹא כִּי אִם עַל-פִּי חָק-הָאֱמוּנָה׃ 28 לָכֵן חָרַצְנוּ לֵאמֹר בָּאֱמוּנָה יִצְדַּק אִישׁ מִבַּלְעֲדֵי הַמַּעֲשִׂים אֲשֶׁר עַל-פִּי הַתּוֹרָה׃ 29 הַאֱלֹהִים לַיְּהוּדִים לְבַד הוּא וְלֹא לַגּוֹיִם אָכֵן גַּם-אֱלֹהֵי הַגּוֹיִם הוּא׃ 30 כִּי הוּא אֱלֹהִים אֶחָד אֲשֶׁר יַצְדִּיק אֶת-הַמּוּלִים בָּאֱמוּנָה וְאֶת-הָעֲרֵלִים גַּם-כֵּן עַל-יְדֵי הָאֱמוּנָה׃ 31 הֲכִי נָפִיר אֶת-הַתּוֹרָה בֶּאֱמוּנָתֵנוּ חָלִילַה אַךְ נְקַיֵּם אֶת-הַתּוֹרָה׃

ד    1 וּמַה-נֹּאמַר עַל-אַבְרָהָם אָבִינוּ מַה-יִּתְרוֹן מָצָא בְּמַעֲשֵׂהוּ׃ 2 כִּי לוּ-נִצְדַּק אַבְרָהָם בְּמַעֲשָׂיו נָאוָה-לוֹ תְהִלָּה אַךְ-לֹא לִפְנֵי אֱלֹהִים׃ 3 כִּי מַה-דְּבַר הַתּוֹרָה וְהֶאֱמִן אַבְרָהָם בֵּאלֹהִים וַיַּחְשְׁבֶהָ לּוֹ צְדָקָה׃ 4 וּלְאִישׁ אֲשֶׁר מַעֲשֵׂהוּ בְיָדוֹ לֹא יֵחָשֵׁב שְׂכָרוֹ כְּמַתְּנַת חִנָּם כִּי אִם-כְּשִׁלֻּמַת חוֹב׃ 5 אַךְ אִישׁ אֲשֶׁר מַעֲשֵׂה יָדָיו אֵין אִתּוֹ וְהוּא מַאֲמִין בַּמַּצְדִּיק אֶת-הָרָשָׁע עֵקֶב אֱמוּנָתוֹ אֱמוּנָתוֹ זוּ תֵּחָשֵׁב לִצְדָקָה׃ 6 כַּאֲשֶׁר גַּם-דָּוִד מְאַשֵּׁר אֶת-הָאָדָם אֲשֶׁר אֱלֹהִים יַצְדִּיקֶנּוּ לֹא עַל-פִּי פָעֳלוֹ׃ 7 אַשְׁרֵי נְשׂוּי-פֶּשַׁע כְּסוּי חֲטָאָה׃ 8 אַשְׁרֵי אָדָם לֹא-יַחְשֹׁב יְהוָֹה לוֹ עָוֹן׃ 9 וָאשֶׁר הַזֶּה לְמִי לְנִמּוֹלִים אוֹ גַם-לַעֲרֵלִים יַעַן נִקְרָא בָזֶה כִּי אֱמוּנַת אַבְרָהָם נֶחְשְׁבָה לּוֹ לִצְדָקָה׃ 10 וּמָתַי נֶחְשְׁבָה-לּוֹ כֵן אַחֲרֵי הִמֹּלוֹ אוֹ טֶרֶם הִמֹּלוֹ לֹא אַחֲרֵי הִמֹּלוֹ כִּי אִם-טֶרֶם הִמֹּלוֹ׃ 11 וְאוֹת בְּרִית הַמּוּלוֹת נָשָׂא לִהְיוֹת לוֹ לְחוֹתַם צִדְקָתוֹ עֵקֶב אֲשֶׁר הֶאֱמִין בְּעוֹדֶנּוּ עָרֵל לְמַעַן יִהְיֶה לְאָב לְכָל-הַמַּאֲמִינִים אַף כִּי-הֵם עֲרֵלִים אֲשֶׁר גַּם-אֱמוּנָתָם תֵּחָשֵׁב לָהֶם לִצְדָקָה׃ 12 וְהוּא אָב לְנִמּוֹלִים אַךְ-לֹא רַק לְנִמּוֹלִים לְבַדָּם כִּי-אִם-גַּם-לָאֵלֶּה הַהֹלְכִים בְּעִקְּבוֹת אֱמוּנָתוֹ אֲשֶׁר הִתְהַלֵּךְ אַבְרָהָם אָבִינוּ בְּעוֹדֵנוּ עָרֵל׃ 13 כִּי לֹא בִגְלַל הַתּוֹרָה בָּאָה הַהַבְטָחָה לְאַבְרָהָם וּלְזַרְעוֹ לִהְיוֹת יוֹרֵשׁ הָאָרֶץ כִּי אִם-בִּגְלַל צִדְקַת אֱמוּנָתוֹ׃ 14 כִּי אִם-בַּעֲלֵי הַתּוֹרָה יוֹרְשִׁים הֵם אֱמוּנָה תִהְיֶה לָרִיק וְהַבְטָחָה לְלֹא-דָבָר׃ 15 כִּי מִפְּאַת הַתּוֹרָה יֵצֵא הַקָּצֶף כִּי בַאֲשֶׁר אֵין תּוֹרָה אֵין פָּשַׁע׃ 16 עַל-כֵּן בְּדֶרֶךְ אֱמוּנָה תִּמָּצֵא לְמַעַן תִּכּוֹן בְּחֶסֶד וְהַהַבְטָחָה תִהְיֶה נְכוֹנָה לְכָל-הַזָּרַע לֹא לִבְנֵי הַתּוֹרָה לְבַדָּם כִּי-אִם גַּם-לִבְנֵי אֱמוּנַת אַבְרָהָם אֲשֶׁר הוּא אָב לְכֻלָּנוּ׃ 17 כַּכָּתוּב כִּי אַב הֲמוֹן גּוֹיִם נְתַתִּיךָ לִפְנֵי אֱלֹהִים זֶה בָּטַח בּוֹ לִבּוֹ הַנֹּתֵן חַיִּים לַמֵּתִים וְהַקֹּרֵא לָאַיִן כַּיֵּשׁ׃ 18 וְאַף כִּי לֹא נִרְאָה פֶתַח תִּקְוָה הֶחֱזִיק בְּתִקְוָתוֹ לְהִנָּתֵן אַב-הֲמוֹן גּוֹיִם כַּאֲשֶׁר נֶאֱמַר כֹּה יִהְיֶה זַרְעֶךָ׃ 19 וְכַאֲשֶׁר לֹא הִתְרַפָּה בֶאֱמוּנָתוֹ הִבִּיט אֶל-בְּשָׂרוֹ אֲשֶׁר הָיָה כַמֵּת בִּהְיוֹתוֹ כְּבֶן-מְאַת שָׁנָה וְאֶל-רֶחֶם שָׂרָה אֲשֶׁר בָּלָה׃ 20 וְרוּחוֹ לֹא נִפְלְגָה בְקִרְבּוֹ מִבְּלִי אֵמֻן בִּדְבַר אֱלֹהִים כִּי אִם-הִתְגַּבֵּר בֶּאֱמוּנָתוֹ וְנָתוֹן כָּבוֹד לֵאלֹהִים׃ 21 וְנַפְשׁוֹ יֹדַעַת מְאֹד כִּי תַשִּׂיג יַד אֵל לְמַלֹּאת אֵת אֲשֶׁר דִּבֵּר׃ 22 וְעַל-כֵּן נֶחְשְׁבָה לוֹ לִצְדָקָה׃ 23 וְלֹא נִכְתַּב רַק לְמַעֲנוֹ לְבַדּוֹ כִּי לוֹ נֶחְשָׁבָה׃ 24 כִּי אִם-גַּם לְמַעֲנֵנוּ אֲשֶׁר כֵּן תֵּחָשֵׁב-לָנוּ הַמַּאֲמִינִים בַּמֵּקִים אֶת-יֵשׁוּעַ אֲדֹנֵינוּ מִן-הַמֵּתִים׃ 25 אֲשֶׁר נִמְסַר לַמָּוֶת בִּפְשָׁעֵינוּ וְהֻקַּם עָל לִצְדָקָה לָנוּ׃

ה    1 עַל-כֵּן כַּאֲשֶׁר נִצְדַּקְנוּ בָאֱמוּנָה שָׁלוֹם יִשְׁפָּת-לָנוּ אֱלֹהִים עַל-יְדֵי יֵשׁוּעַ הַמָּשִׁיחַ אֲדֹנֵינוּ׃ 2 אֲשֶׁר גַּם עַל-יָדוֹ מָצָאנוּ בְדֶרֶךְ אֱמוּנָה אֶת-שַׁעַר הַחֶסֶד אֲשֶׁר אֲנַחְנוּ בָאִים בּוֹ וּבְעֹז הָאֱלֹהִים נָרִים קֶרֶן כַּאֲשֶׁר קִוִּינוּ לוֹ׃ 3 וְלֹא-זֹאת לְבַד כִּי אִם-גַּם בְּצָרָה נָרִים רֹאשׁ אַחֲרֵי אֲשֶׁר יָדַעְנוּ כִּי-צָרָה תוֹלִיד אֶת-עֹצֶר רוּחַ׃ 4 וְעֹצֶר הָרוּחַ אֶת-בְּחִינַת לֵב וּבְחִינַת הַלֵּב אֶת-תִּקְוַת נֶפֶשׁ׃ 5 וְהַתִּקְוָה לֹא תֵבוֹשׁ בַּאֲשֶׁר הוּצַק בְּלִבֵּנוּ אַהֲבַת-אֵל בְּרוּחַ קָדְשׁוֹ אֲשֶׁר נָתַן עָלֵינוּ׃ 6 כִּי בְעוֹד הָיִינוּ רְפֵי יָדָיִם מֵת הַמָּשִׁיחַ בְּעִתּוֹ בְּעַד הַחַטָּאִים בְּנַפְשׁוֹתָם׃ 7 הֵן תִּיקַר לְאָדָם נַפְשׁוֹ מִתִּתּוֹ אֹתָהּ בְּעַד נֶפֶשׁ צַדִּיק וּבְעַד הַצְּדָקָה אוּלַי אִישׁ מִתְנַדֵּב יַעְצָר-כֹּחַ לָמוּת בַּעֲדָּהּ׃ 8 וֵאלֹהִים גִּלָּה אַהֲבָתוֹ לְעֵינֵינוּ כִּי בְעוֹד הָיִינוּ חֹטְאִים נָתַן הַמָּשִׁיחַ אֶת-נַפְשׁוֹ בַּעֲדֵנוּ׃ 9 אַף כִּי-עַתָּה אַחֲרֵי אֲשֶׁר נִצְדַּקְנוּ בְדָמוֹ תּוֹשִׁיעַ לָנוּ יָדוֹ לְהִמָּלֵט מֵחֲרוֹן-אָף׃ 10 כִּי אִם-בְּעוֹד אוֹיְבִים הָיִינוּ אֲנַחְנוּ הִתְרַצְּנוּ אֶל-הָאֱלֹהִים בְּמוֹת בְּנוֹ אַף כִּי-אַחֲרֵי אֲשֶׁר רָצָה בָּנוּ בְּחַיֵּי בְנוֹ נִוָּשֵׁעַ׃ 11 וְלֹא-זֹאת לְבַד כִּי אִם-גַּם רָמָה קַרְנֵנוּ בֵאלֹהִים עַל-יְדֵי יֵשׁוּעַ הַמָּשִׁיחַ אֲדֹנֵינוּ אֲשֶׁר בּוֹ לָקַח רָצוֹן מִיָּדֵינוּ׃ 12 לָכֵן כַּאֲשֶׁר הַחֵטְא עָלָה בָאָרֶץ עַל-יְדֵי אָדָם אֶחָד וְהַמָּוֶת בָּא לְרַגְלֵי הַחֵטְא כֵּן פָּגַע הַמָּוֶת בְּכָל-בְּנֵי אָדָם בַּאֲשֶׁר כֻּלָּם חָטָאוּ׃ 13 כִּי נִמְצָא חֵטְא בָּאָרֶץ גַּם-לִפְנֵי מַתָּן הַתּוֹרָה וְאַף כִּי חֵטְא לֹא יֵחָשֵׁב בִּבְלִי-תוֹרָה׃ 14 בְּכָל-זֹאת שָׁלַט הַמָּוֶת מֵאָדָם עַד-משֶׁה גַּם-בַּפּשְׁעִים אֲשֶׁר פִּשְׁעָם לֹא נִדְמָה לְפֶשַׁע אָדָם הוּא הָאָדָם הָרִאשׁוֹן אֲשֶׁר בִּדְמוּתוֹ כְּצַלְמוֹ הָאָדָם הָאַחֲרוֹן הִתְעַתֵּד לָבוֹא׃ 15 אֶפֶס כִּי אֵין עֵרֶךְ הַפֶּשַׁע כְּעֵרֶךְ מַתְּנַת חִנָּם כִּי אִם-בְּפֶשַׁע אֶחָד מֵתוּ רַבִּים כַּמֶּה פְעָמִים יֶתֶר עַל-הַמִּדָּה יוֹעִיל לְרַבִּים חֶסֶד אֱלֹהִים וּמַתְּנַת יָדוֹ עַל-פִּי חֶסֶד הָאִישׁ הָאֶחָד יֵשׁוּעַ הַמָּשִׁיחַ׃ 16 וְלֹא כַמִּשְׁפָּט הַנֶּחֱרַץ בִּגְלַל הַפּשֵׁעַ הָאֶחָד נִתְּנָה לָּנוּ הַמַּתָּת כִּי הַמִּשְׁפָּט יָצָא לְהַרְשִׁיעַ אֶת-כֻּלָּם בְּפֶשַׁע אֶחָד וְהַמַּתָּת הִיא לְטַהֵר אֶת-כֻּלָּם מִפְּשָׁעִים רַבִּים׃ 17 כִּי אִם-בְּפֶשַׁע הָאֶחָד שָׁלַט הַמָּוֶת בָּנוּ עַל-יְדֵי הָאֶחָד אַף כִּי-נֹשְׂאֵי שִׁפְעַת הַחֶסֶד וּמַתְּנַת הַצְּדָקָה יִמְשְׁלוּ בַחַיִּים עַל-יְדֵי הָאֶחָד הוּא יֵשׁוּעַ הַמָּשִׁיחַ׃ 18 לָכֵן כַּאֲשֶׁר בְּפֶשַׁע אִישׁ אֶחָד נִשְׁפְּטוּ כָל-בְּנֵי-אָדָם וַיֶּאְשָׁמוּ כֵּן גַּם-בְּצִדְקַת אִישׁ אֶחָד יִזְכּוּ כָל-בְּנֵי-אָדָם לְחַיֵּי צְדָקָה׃ 19 כִּי כַּאֲשֶׁר בְּהַפְצַר אִישׁ אֶחָד רַבִּים יָצְאוּ אֲשֵׁמִים כֵּן גַּם-בְּהַקְשֵׁב הָאֶחָד רַבִּים יֵצְאוּ נְקִיִּים׃ 20 וּבֵין כֹּה וָכֹה בָּאָה הַתּוֹרָה לְבַעֲבוּר יִגְדַּל הַפָּשַׁע אַךְ בַּאֲשֶׁר גָּדַל הַפֶּשַׁע שָׁם גָּדַל הַחֶסֶד יֶתֶר מְאֹד׃ 21 וְכַאֲשֶׁר שָׁלַט הַחֵטְא בַּמָּוֶת כֵּן יִמְשֹׁל הַחֶסֶד עַל-יְדֵי הַצְּדָקָה לְחַיֵּי עוֹלָם בְּיֵשׁוּעַ הַמָּשִׁיחַ אֲדֹנֵינוּ׃

ו    1 וּמַה-נֹּאמַר עָתָּה הֲנַעֲמֹד עוֹד בַּחַטָּאָה לְמַעַן יִגְדַּל הֶחָסֶד׃ 2 חָלִילָה אֲנַחְנוּ אֲשֶׁר כַּמֵּתִים נֶחְשַׁבְנוּ לַחֵטְא אֵיךְ נִחְיֶה-בּוֹ עוֹד׃ 3 הֲלֹא יְדַעְתֶּם כִּי כֻּלָּנוּ הַנִּטְבָּלִים בְּשֵׁם יֵשׁוּעַ הַמָּשִׁיחַ בְּמוֹתוֹ נִטְבָּלְנוּ׃ 4 וְכַאֲשֶׁר נִטְבַּלְנוּ בְמוֹתוֹ כֵּן נִקְבַּרְנוּ עִמּוֹ וְכַאֲשֶׁר אֲבִי-כֹל בִּכְבוֹדוֹ הֲקִימוֹ מִן-הַמֵּתִים כֵּן גַּם-עָלֵינוּ לָקוּם לְהִתְהַלֵּךְ לְפָנָיו בְּחַיִּים חֲדָשִׁים׃ 5 כִּי אִם-הָיִינוּ דְבֵקִים בּוֹ כַּעֲנָפִים בָּעֵץ וְנֶחְשָׁבִים כְּמוֹ-מֵתִים בְּמוֹתוֹ הֲלֹא נִשְׁוֶה-לּוֹ גַּם-בַּתְּקוּמָה׃ 6 בְּדַעְתֵּנוּ כִּי הָאָדָם הַקַּדְמֹנִי בְּקִרְבֵּנוּ נִתְלָה כָּמֹהוּ לְמַעַן יֶחְדַּל עֶצֶם הָאָדָם הַחֹטֵא הַזֶּה לְבִלְתִּי נִהְיֶה עוֹד עֲבָדִים לַחֵטְא׃ 7 כִּי הַמֵּת חָפְשִׁי הוּא מִן-הַחֵטְא׃ 8 וְהִנֵּה אִם-מֵתִים אֲנַחְנוּ עִם-הַמָּשִׁיחַ סָמוּךְ לִבֵּנוּ כִּי גַם-נִחְיֶה עִמּוֹ׃ 9 בְּדַעְתֵּנוּ כִּי הַמָּשִׁיחַ אֲשֶׁר קָם מִן-הַמֵּתִים לֹא יִישַׁן עוֹד וְלֹא יִשְׁלַט-בּוֹ הַמָּוֶת שֵׁנִית׃ 10 כִּי בַּאֲשֶׁר מֵת מֵת הוּא פַּעַם אַחַת לַחֵטְא וּבַאֲשֶׁר חַי חַי הוּא לֵאלֹהִים׃ 11 כֵּן חִשְׁבוּ נַפְשְׁכֶם גַּם-אַתֶּם מֵתִים לַחֲטָאָה וְחַיִּים לֵאלֹהִים בְּיֵשׁוּעַ הַמָּשִׁיחַ אֲדוֹנֵינוּ׃ 12 אַל-יִשׁלֹט אֵפוֹא הַחֵטְא בִּבְשַׂרְכֶם הַהֹלֵךְ לָמוּת לִנְטוֹת אַחֲרָיו בְּתַאֲוָתוֹ׃ 13 וְאַל-תִּתְּנוּ אֶת-אֵבָרֵיכֶם לִהְיוֹת כְּלֵי-אָוֶן לַחֵטְא אַךְ הַקְרִיבוּ אֶת-נַפְשְׁכֶם לֵאלֹהִים כְּחַיִּים מִן-הַמֵּתִים וְאֶת-אֵבָרֵיכֶם כְּלֵי צְדָקָה לֵאלֹהִים׃ 14 וְהַחֵטְא לֹא יִשְׂתָּרֵר עֲלֵיכֶם כִּי אֵינְכֶם תַּחַת יַד-הַתּוֹרָה כִּי אִם-תַּחַת יַד תּוֹרַת חָסֶד׃ 15 וּמָה אֵפוֹא הֲכִי נֶחְטָא יַעַן תַּחַת יַד-הַתּוֹרָה אֵין אֲנַחְנוּ עוֹד כִּי אִם-תַּחַת יַד תּוֹרַת חֶסֶד חָלִילָה׃ 16 הֲלֹא יְדַעְתֶּם כִּי לְמִי אֲשֶׁר תָּפִיקוּ נַפְשְׁכֶם כַּעֲבָדִים סָרִים לְמִשְׁמַעְתּוֹ לוֹ אַתֶּם לַעֲבָדִים כַּאֲשֶׁר אֵלָיו תִּשְׁמָעוּן אִם עֲבָדִים לַחֵטְא וְלַמָּוֶת וְאִם לִשְׁמֹעַ בְּקוֹל אֲדֹנָי וְלִצְדָקָה׃ 17 וּבָרוּךְ הוּא אֱלֹהִים כִּי אַחֲרֵי הֱיוֹתְכֶם עֲבָדִים לַחֵטְא שַׂמְתֶּם עַל-לִבְּכֶם לִשְׁמֹעַ וְלִשׁמֹר אֶת-הַתּוֹרָה הַהִיא כְּצוּרָתָהּ אֲשֶׁר קִבַּלְתֶּם עֲלֵיכֶם׃ 18 וְאַחֲרֵי אֲשֶׁר יְצָאתֶם לַחָפְשִׁי מִיַּד-הַחֵטְא לְעַבְדֵי הַצְּדָקָה הֱיִיתֶם׃ 19 כְּדֶרֶךְ בְּנֵי-אָדָם אֲנִי מְדַבֵּר בַּעֲבוּר רִפְיוֹן בְּשַׂרְכֶם כִּי כַּאֲשֶׁר הִקְרַבְתֶּם אֵבָרֵיכֶם לְתוֹעֵבָה וְעַוְלָתָה לַעֲשׂוֹת עָוֶל כֵּן הַקְדִּישׁוּ-נָא אֵבָרֵיכֶם כַּיּוֹם לְמַעֲשֵׂה הַצְּדָקָה לְמַעַן תִּהְיוּ קְדֹשִׁים׃ 20 כִּי-בִהְיוֹתְכֶם לְפָנִים עֲבָדִים לַחֵטְא נִפְרָדִים הֱיִיתֶם מִצְּדָקָה׃ 21 וּמָה-פְּרִי מְצָאתֶם אָז מֵהַמַּעֲשִׂים הָהֵם אֲשֶׁר תִּכָּלְמוּ מֵהֶם כַּיּוֹם כִּי עֵקֶב אֵלֶּה אֲבַדּוֹן׃ 22 אַךְ עַתָּה כִּי-יְצָאתֶם לַחָפְשִׁי מִיַּד הַחֵטְא וַתִּהְיוּ עֲבָדִים לֵאלֹהִים הֲלֹא תִשְׂאוּ פֶרְיְכֶם בַּקֹּדֶשׁ וְעֵקֶב-זֶה חַיֵּי עוֹלָם׃ 23 כִּי מַשְׂכֹּרֶת הַחֵטְא אֲבָדוֹן וּמַתַּת אֲלֹהִים חַיֵּי נֶצַח בְּיֵשׁוּעַ הַמָּשִׁיחַ אֲדֹנֵינוּ׃

ז    1 הֲלֹא יְדַעְתֶּם אַחַי כִּי לְיֹדְעֵי הַתּוֹרָה אֲנִי מְדַבֵּר כִּי הַתּוֹרָה מֹשֶׁלֶת בָּאָדָם כָּל-עוֹד חַי הִנֵּהוּ׃ 2 כִּי אִשָּׁה בְעֻלַת-בַּעַל צְרוּרָה הִיא עַל-פִּי הַתּוֹרָה בְּחַיֵּי בַעְלָהּ וְכִי-יָמוּת הַבַּעַל יָצְאָה לָּהּ מִתּוֹרַת הַבָּעַל׃ 3 וְעַל-כֵּן אִם תֵּדַע אִישׁ אַחֵר בְּעוֹד בַּעְלָהּ חַי נֹאֶפֶת יִקָּרֵא לָהּ אַךְ אַחֲרֵי מוֹת הַבַּעַל חָפְשִׁית הִיא מִן-הַתּוֹרָה וְלֹא נֹאֶפֶת הִיא בִּהְיוֹתָהּ לְאִישׁ אַחֵר׃ 4 לָכֵן אַחַי גַּם-אַתֶּם כְּמֵתִים נֶחְשַׁבְתֶּם לַתּוֹרָה בִּבְשַׂר הַמָּשִׁיחַ הַמֵּת וַתָּקוּמוּ וַתִּהְיוּ לְאַחֵר הֲלֹא הוּא אֲשֶׁר קָם מִן-הַמֵּתִים לְמַעַן עֲשׂוֹת פְּרִי לֵאלֹהִים׃ 5 כִּי כָל-עוֹד רָדַפְנוּ חַיֵּי בְשָׂרִים קָרְאָה מִצְוַת הַתּוֹרָה לִתְשׁוּקוֹת אָוֶן בְּקִרְבֵּנוּ אֲשֶׁר הִתְגָּרוּ בָנוּ וַנַּעַשׂ פְּרִי לַמָּוֶת׃ 6 אַךְ עַתָּה נֶחְלַצְנוּ מִיַּד הַתּוֹרָה וּמוֹסְרוֹתֶיהָ הִשְׁלַכְנוּ מִמֶּנּוּ אַחֲרֵי אֲשֶׁר מַתְנוּ לָהּ וּבְכֵן עָלֵינוּ לַעֲבֹד אֶת-יְהוָֹה בָּרוּחַ הַחֲדָשָׁה וְלֹא לְפִי-טַעַם הַמִּלּוֹת הַנּוֹשָׁנוֹת בַּתּוֹרָה׃ 7 וּמַה-נֹּאמַר עַתָּה הֲכִי הַתּוֹרָה חֵטְא הִיא חָלִילָה אֶפֶס חֵטְא לֹא יָדַעְתִּי אִם לֹא עַל-פִּי הַתּוֹרָה כִּי לַחְמֹד לֹא יָדַעְתִּי לוּלֵא אָמְרָה הַתּוֹרָה לֹא תַחְמֹד׃ 8 וְהַחֵטְא מָצָא-לוֹ תֹאֲנָה בַּמִּצְוָה וַיְעוֹרֵר בִּי כָּל-תַּאֲוָה כִּי מִבַּלְעֲדֵי הַתּוֹרָה הַחֵטְא כַּמֵּת הוּא׃ 9 וַאֲנִי חַי הָיִיתִי לְפָנִים בְּלֹא-תוֹרָה וּכְבוֹא הַמִּצְוָה קָם הַחֵטְא וַיְחִי וְאָנֹכִי נָפַלְתִּי מֵת׃ 10 וְהַמִּצְוָה הַזֹּאת אֲשֶׁר חַיִּים בָּהּ נִמְצְאָה-לִּי כַּמָּוֶת׃ 11 כִּי-הַחֵטְא בִּמְצֹא תֹאֲנָה בַּמִּצְוָה הִשִּׁיאַנִי וּבְיַד הַמִּצְוָה הַהִיא הֲרָגָנִי׃ 12 וּבְכֵן הַתּוֹרָה קְדשָׁה וְהַמִּצְוָה קְדשָׁה יְשָׁרָה וְטוֹבָה׃ 13 הֲכִי נֶהֶפְכָה-לִּי הַטּוֹבָה לַמָּוֶת חָלִילָה אַךְ הַחֵטְא הוּא לְמַעַן יִוָּדַע כַּאֲשֶׁר הוּא בַּהֲבִיאוֹ לִי אֶת-הַמָּוֶת מִן-הַטּוֹבָה כִּי לְנֹכַח הַמִּצְוָה יִגְדַּל וְיַעֲלֶה הַחֵטְא לַחֲטָאָה גְדֹלָה עַד-מְאֹד׃ 14 כִּי נוֹדַע לָנוּ כִּי-הַתּוֹרָה תּוֹרַת רוּחַ הִיא וַאֲנִי בָשָׂר אֲנִי נִמְכַּרְתִּי לַחֵטְא׃ 15 כִּי הַדָּבָר אֲשֶׁר אֲנִי עֹשֶׂה אֶרְאֶה וְלֹא אָבִין כִּי לֹא-כַאֲשֶׁר רָצְתָה נַפְשִׁי עָשִׂיתִי כִּי אִם-אֶת-אֲשֶׁר שָׂנֵאתִי זֹאת עָשְׂתָה יָדִי׃ 16 וּבַעֲשׂוֹתִי הַדָּבָר אֲשֶׁר לֹא-חָפַצְתִּי-בוֹ הִנְנִי נֹתֵן עֵדוּת לַתּוֹרָה כִּי טוֹבָה הִיא׃ 17 וְעַתָּה לֹא-עוֹד אָנֹכִי בַּעַל הַמַּעֲשֶׂה הַזֶּה כִּי אִם-הַחֵטְא הַשֹּׁכֵן בְּקִרְבִּי׃ 18 כִּי בְקִרְבִּי וּבְשָׂרִי יָדַעְתִּי לֹא יִשְׁכָּן-טוֹב בַּאֲשֶׁר הַחֵפֶץ לַעֲשׂוֹת טוֹב נִמְצָא עִמָּדִי אַךְ לְבַצַּע אֶת-חֶפְצִי לֹא תִמְצָא יָדִי׃ 19 כִּי אֵינֶנִּי עֹשֶׂה אֶת-הַדָּבָר הַטּוֹב כַּאֲשֶׁר חָפָצְתִּי אַךְ אֶת-הָרָע אֲשֶׁר לֹא חָפַצְתִּי יָדַי תְּבַצַּעְנָה׃ 20 וְאַחֲרֵי אֲשֶׁר עֹשֶׂה אֲנִי אֶת-הַדָּבָר אֲשֶׁר לא חָפָצְתִּי לֹא אָנֹכִי עוֹד בַּעַל הַמָּעֲשֶׂה הַזֶּה כִּי אִם-הַחֵטְא הַשֹּׁכֵן בְּקִרְבִּי׃ 21 זֶה הוּא הַחֹק אֲשֶׁר מָצָאתִי בְנַפְשִׁי כַּאֲשֶׁר אֶחְפֹּץ לַעֲשׂוֹת טוֹב כֵּן הָרָע יַעֲמֹד נֶגְדִּי׃ 22 כִּי בְתוֹרַת אֱלֹהִים חֶפְצִי כְּחֵפֶץ הָאָדָם הַפְּנִימִי׃ 23 אַךְ תּוֹרָה אַחֶרֶת אֲנִי מוֹצֵא בְקֶרֶב מֵעַי הַנִּלְחֶמֶת בְּתוֹרַת שִׂכְלִי וְנַפְשִׁי בַּשְּׁבִי הָלְכָה לִפְנֵי תוֹרַת הַחֵטְא אֲשֶׁר בְּקֶרֶב מֵעָי׃ 24 אוֹי לְגֶבֶר אֻמְלָל כָּמֹנִי מִי יַצִּילֵנִי מִגּוּף הַמָּוֶת הַלָּזֶה׃ 25 אוֹדֶה הַפַּעַם אֶת-אֱלֹהִים בְּיֵשׁוּעַ הַמָּשִׁיחַ אֲדֹנֵינוּ וּבְכֵן אֵפוֹא עֹבֵד אֲנִי בְּרוּחִי אֶת-תּוֹרַת הָאֱלֹהִים וּבִבְשָׂרִי אֶת-תּוֹרַת הַחֵטְא׃

ח    1 עַל-כֵּן אֵפוֹא אֵין-אַשְׁמָה לַדְּבֵקִים בְּיֵשׁוּעַ הַמָּשִׁיחַ הַמִּתְהַלְכִים שֶׁלֹא כַבָּשָׂר אֶלָא לְפִי הָרוּחַ׃ 2 כִּי תּוֹרַת רוּחַ הַחַיִּים בְּיֵשׁוּעַ הַמָּשִׁיחַ חִלְצָה אֶת-נַפְשִׁי מִתּוֹרַת הַחֵטְא וְהַמָּוֶת׃ 3 כִּי אֶת-אֲשֶׁר לֹא שָׁתָה הַתּוֹרָה כִּי קָצְרָה יָדָהּ לִכְבּשׁ אֶת-הַבָּשָׂר שָׁת אֱלֹהִים בְּשָׁלְחוֹ אֶת-בְּנוֹ בִּדְמוּת בְּשַׂר הָאָדַם הַחֹטֵא לְקָרְבָּן עַל-הַחֵטְא וּשְׁפָטוֹ לְהָתֵם הַחֵטְא בִּבְשָׂרוֹ׃ 4 לְמַעַן תּוּקַם צִדְקַת הַתּוֹרָה בָּנוּ הַהֹלְכִים בְּדֶרֶךְ הַחַיִּים לְפִי-הָרוּחַ וְלֹא לְפִי-הַבָּשָׂר׃ 5 כִּי הַהֹלְכִים לְפִי-הַבָּשָׂר יֶהְגּוּ בְּדִבְרֵי הַבָּשָׂר וְהַהֹלְכִים לְפִי-הָרוּחַ בְּדִבְרֵי הָרוּחַ׃ 6 כִּי הֶגְיוֹן הַבָּשָׂר מָוֶת וְהֶגְיוֹן הָרוּחַ חַיִּים וְשָׁלוֹם׃ 7 יַעַן הֶגְיוֹן הַבָּשָׂר פֹּרֶה שִׂנְאַת אֱלֹהִים כִּי לֹא נִכְנַע מִפְּנֵי תוֹרָתוֹ וְגַם-לְהִכָּנַע לֹא יוּכָל׃ 8 וְאֵלֶּה אֲשֶׁר חַיֵּי בְשָׂרִים חַיֵּיהֶם לֹא יוּכְלוּ לְהָפִיק רָצוֹן מֵאֱלֹהִים׃ 9 וְאַתֶּם לֹא חַיֵּי בְשָׂרִים חַיֵּיכֶם כִּי אִם-חַיֵּי הָרוּחַ אִם רַק רוּחַ הָאֱלֹהִים שֹׁכֵן בְּתוֹכְכֶם אֶל-נָכוֹן אַךְ מִי אֲשֶׁר אֵין לוֹ רוּחַ הַמָּשִׁיחַ לֹא לוֹ הוּא׃ 10 וְאִם-הַמָּשִׁיחַ יֵשׁ בָּכֶם הִנֵּה הַגּוּף מֵת הוּא עֵקֶב הַחֵטְא אַךְ הָרוּחַ חַי עֵקֶב הַצְּדָקָה׃ 11 וְאִם-רוּחַ אֵל הַמֵּקִים אֶת-יֵשוּעַ מִן-הַמֵּתִים יִשְׁכֹּן בָּכֶם הֲלֹא הוּא אֲשֶׁר הֵקִים אֶת-יֵשׁוּעַ הַמָּשִׁיחַ מִן-הַמֵּתִים יִתֵּן חַיִּים גַּם-לְעַצְמוֹתֵיכֶם הַלְּקֻחִים לַמָּוֶת בָּרוּחַ הַהוּא הַשֹּׁכֵן בָּכֶם׃ 12 לָכֵן אַחַי לֹא לַבָּשָׂר נָדָרְנוּ לִחְיוֹת חַיֵּי בְשָׂרִים׃ 13 כִּי אִם-חַיֵּי בְשָׂרִים תִחְיוּ מוּת תְּמֻתוּן וְאִם בָּרוּחַ תַּכְחִידוּ אֶת-מַעַלְלֵי הַבָּשָׂר חָיֹה תִחְיוּן׃ 14 כִּי כָל-אֵלֶּה אֲשֶׁר בְּרוּחַ אֱלֹהִים יוּבָלוּ בְּנֵי אֱלֹהִים הֵמָּה׃ 15 כִּי לֹא רוּחַ עַבְדוּת קִבַּלְתֶּם אֲשֶׁר תָּשׁוּבוּ לְיִרְאָה כִּי אִם-רוּחַ כְּמִשְׁפַּט הַבָּנִים אֲשֶׁר בּוֹ אָנוּ קֹרִאים אַבָּא אָבִינוּ׃ 16 הוּא הָרוּחַ הַנֹּתֵן עֵדוּת לְנַפְשֵׁנוּ כִּי-בְנֵי אֱלֹהִים הִנֵּנוּ׃ 17 וְאִם-בָּנִים גַּם-יֹרְשִׁים אֲנַחְנוּ יֹרְשֵׁי נַחֲלַת אֱלֹהִים חֵלֶק כְּחֵלֶק עִם-הַמָּשִׁיחַ אִם-אָמְנָם נִתְעַנֶּה עִמּוֹ לְמַעַן גַּם-עִמּוֹ נִכָּבֵד׃ 18 כִּי שָׁקַלְתִּי סֵבֶל הַזְמָן הַזֶּה וְאֵינֶנּוּ שׁוֶֹה לְהִשָּׁקֵל עִם-הַכָּבוֹד הַבָּא אֲשֶׁר יֵרָאֶה עָלֵינוּ׃ 19 כִּי גַּם-עֵינֵי הַבְּרִיאָה תְּלוּיוֹת בְּצִפִּיָּתָהּ עַד-יִגָּלֶה כְבוֹד בְּנֵי הָאֱלֹהִים׃ 20 כִּי לֹא בִרְצוֹנָה נִכְבְּשָׁה הַבְּרִיאָה לְהַבְלֵי-שָׁוְא כִּי אִם-בִּרְצוֹן הַכֹּבֵשׁ אֹתָהּ אֲשֶׁר הִנִּיחַ לָהּ פֶּתַח תִּקְוָה׃ 21 כִּי תִגָּאֵל מֵעַבְדוּתָהּ וּמִשְּׁחִיתוֹתֶיהָ לִדְרוֹר לִצְבִי וּלְכָבוֹד עִם-בְּנֵי הָאֱלֹהִים׃ 22 כִּי הַבְּרִיאָה כֻלָּהּ יָדַעְנוּ כִּי תֶאֱנֹק תִּזְעַק בַּחֲבָלֶיהָ עַד-עָתָּה׃ 23 וְלֹא-הִיא לְבַדָּהּ כִּי אִם-גַּם אָנוּ אֲשֶׁר לָקַחְנוּ רֵאשִׁית הַחֵלֶק כִּפְרִי בִכּוּרִים בְּמַתְּנַת הָרוּחַ גַּם-אָנוּ נֶאֱנָחִים בְּנַפְשֵׁנוּ וּמְחַכִּים לְמִשְׁפַּט הַבָּנִים לִפְדוּת גְּוִיָּתֵנוּ׃ 24 כִּי תְשׁוּעָתֵנוּ עַד-כֹּה רַק בַּתִּקְוָה הִיא אוּלָם תִּקְוָה נִרְאָה לָעֵינַיִם לֹא-עוֹד תִּקְוָה הִיא כִּי דָבָר אֲשֶׁר יִרְאֶה אָדָם בְּעֵינָיו לָמָּה יְקַוֶּה לוֹ עוֹד׃ 25 אַךְ אִם-נְקַוֶּה לַדָּבָר אֲשֶׁר לֹא רָאִינוּ נוֹחִיל לוֹ הוֹחִיל וְדוּמָם עַד-בּוֹאוֹ׃ 26 וְכָזֹאת גַּם-הָרוּחַ עַזֹר יַעְזָר-לָנוּ בְּרִפְיוֹנֵנוּ כִּי מָה אֵפוֹא לְהִתְפַּלֵּל לֹא נֵדַע כַּאֲשֶׁר נָכוֹן לָנוּ אַךְ הָרוּחַ הַהוּא מַפְגִּיעַ בַּעֲדֵנוּ בַּאֲנָחוֹת עָמְקוּ מִסַּפֵּר׃ 27 וְהַבֹּחֵן לִבּוֹת הוּא יֹדֵעַ מָה הֶגְיוֹן הָרוּחַ אֲשֶׁר כְּלֵב אֱלֹהִים בְּעַד קְדשָׁיו יַפְגִּיעַ׃ 28 וְכָל-הַמַּעֲשִׂים יָדַעְנוּ כִּי יַעְזְרוּ יַחְדָּו לְטוֹבָה לְאֹהֲבֵי אֱלֹהִים הַקְּרֻאִים בְּסוֹד עֲצָתוֹ׃ 29 כִּי אֶת-אֵלֶּה אֲשֶׁר יָדַע מִקֶּדֶם אֹתָם יָעַד גַּם-מֵאָז כִּי יִשְׁווּ לִדְמוּת בְּנוֹ לְבַעֲבוּר יִהְיֶה הוּא הַבְּכוֹר לְאַחִים רַבִּים׃ 30 וְאֶת-אֵלֶּה אֲשֶׁר יָעַד מֵאָז אֹתָם גַּם-קָרָא וְאֶת-אֵלֶּה אֲשֶׁר קָרָא אֹתָם גַּם-הִצְדִּיק וְאֶת-אֵלֶּה אֲשֶׁר הִצְדִּיק אֹתָם גַּם-כִּבֵּד׃ 31 וּמַה-נֹּאמַר עַתָּה עַל-זֹאת אִם-אֱלֹהִים לָנוּ מִי יִתְיַצֵּב בְּפָנֵינוּ׃ 32 הֵן הוּא לֹא חָמַל עַל בֶּן-סְגֻלָּתוֹ כִּי אִם-הִסְגִּירוֹ בְּעַד כֻּלָּנוּ הֲכִי עִמּוֹ לֹא יִתֶּן-לָנוּ כָּל-מִשְׁאֲלוֹתֵינוּ כְּרֹב חַסְדּוֹ׃ 33 מִי יָשִׁית חַטָּאת עַל-בְּחִירֵי הָאֱלֹהִים הֵן הָאֱלֹהִים הוּא הַמַּצְדִּיק׃ 34 מִי-הוּא זֶה הַמַּרְשִׁיעַ הֲלֹא יֵשׁוּעַ הַמָּשִׁיחַ מֵת וָחָי וְגַם-ישֵׁב לִימִין הָאֱלֹהִים וְגַם-הוּא מַפְגִּיעַ בַּעֲדֵּנוּ׃ 35 מִי יַפְרִידֵנוּ מֵאַהֲבַת הַמָּשִׁיחַ הַאִם צַר מֵצִיק וְרֹדֵף אוֹ רְעָבוֹן וּמַעֲרֻמָּה פִּי-חֶרֶב וְכָל-מוֹקְשֵׁי מָוֶת׃ 36 כַּכָּתוּב כִּי-עָלֶיךָ הֹרַגְגוּ כָל-הַיּוֹם נֶחְשַׁבְנוּ כְּצֹאן טִבְחָה׃ 37 וּבְכָל-אֵלֶּה יֶתֶר הַרְבֵּה מִמְּנַצְּחִים יָכֹל נוּכַל בְּיַד הָאֹהֵב אֶת-נַפְשֵׁנוּ׃ 38 כִּי בָטַחְתִּי כִּי לֹא מָוֶת וְלֹא חַיִּים לֹא מַלְאֲכֵי אֵל לֹא שָׂרֵי הַצָּבָא לֹא אֵלֶּה אֲשֶׁר יֶשְׁנָם וְלֹא אֵלֶּה אֲשֶׁר עֲתִדִים לָבֹא וְלֹא גִבֹּרֵי כֹחַ׃ 39 וְלֹא רוּם וְלֹא עֹמֶק וְלֹא אֵיזֶה יְקוּם אַחֵר יִהְיֶה לְאֵל יָדָם לְהַפְרִידֵנוּ מֵאַהֲבַת הָאֱלֹהִים אֲשֶׁר בְּיֵשׁוּעַ הַמָּשִׁיחַ אֲדֹנֵינוּ׃

ט    1 הִנֵּה אֱמֶת אֲנִי דֹבֵר בַּמָּשִׁיחַ וְלֹא אֲכַזֵּב וְחִקְרֵי לִבִּי יְעִידוּן לִי בְּרוּחַ הַקֹּדֶשׁ׃ 2 כִּי צַר לִי מְאֹד וְכָל-הַיּוֹם לִבִּי עָלַי דַּוָּי׃ 3 עַד אֲשֶׁר-בִּקְשָׁה נַפְשִׁי לֵאמֹר לוּ הַחֲרֵם יַחֲרִים הַמָּשִׁיחַ אֹתִי תַּחַת אַחַי שְׁאֵרִי וּבְשָׂרִי׃ 4 אֲשֶׁר הֵם בְּנֵי יִשְׂרָאֵל וְלָהֶם מִשְׁפַּט הַבָּנִים וְהַכָּבוֹד וְהַבְּרִיתוֹת מַתָּן הַתּוֹרָה עֲבֹדַת הַקֹּדֶשׁ וְדִבְרֵי הַהַבְטָחוֹת׃ 5 הָאָבוֹת לָהֶם הֵם וְהַמָּשִׁיחַ לְפִי-בְשָׂרוֹ מֵהֶם יָצָא אֲשֶׁר עַל-הַכֹּל הוּא הָאֱלֹהִים הַמְבֹרָךְ לְעוֹלָם וָעֶד אָמֵן׃ 6 אֶפֶס לֹא-כֵן הַדָּבָר וּדְבַר-אֱלֹהִים לֹא נָפַל אָרְצָה כִּי לֹא-כֻּלָּם אֲשֶׁר מִיִּשְׂרָאֵל יִשְׂרְאֵלִים הֵם׃ 7 וְלֹא כָל-זֶרַע אַבְרָהָם בָּנִים הֵם כִּי אַךְ בְּיִצְחָק יִקָּרֵא לְךָ זָרַע׃ 8 וְזֶה יוֹרֵנוּ כִּי לֹא בְנֵי-הַבָּשָׂר בְּנֵי אֱלֹהִים הֵם כִּי אִם-רַק בְּנֵי הַהַבְטָחָה יֵחָשְׁבוּ לְזָרַע׃ 9 כִּי זֶה דְבַר הַהַבְטָחָה לַמּוֹעֵד אָשׁוּב וּלְשָׂרָה בֵן׃ 10 וּמִלְּבַד זֹאת גַּם-רִבְקָה בִּהְיוֹתָהּ הָרָה בֶן-יָחִיד לְיִצְחָק אָבִינוּ׃ 11 בְּטֶרֶם נוֹלְדוּ יְלָדֶיהָ עַד לֹא-עָשׂוּ מְאוּמָה מִטּוֹב עַד-רָע לְמַעַן תָּקוּם עֲצַת אֱלֹהִים לְפִי-בְחִירָתוֹ לֹא עֵקֶּב מַעֲשִׂים כִּי אִם-כִּרְצוֹן הַבֹּחֵר׃ 12 הֻגַּד לָהּ כִּי-רַב יַעֲבֹד צָעִיר׃ 13 כַּכָּתוּב וָאֹהַב אֶת-יַעֲקֹב וְאֶת-עֵשָׂו שָׂנֵאתִי׃ 14 וּמַה-נֹּאמַר עָתָּה הֲכִי יֵשׁ עַוְלָתָה בֵאלֹהִים חָלִילָה׃ 15 כִּי אֶל-משֶׁה אָמַר וְחַנֹּתִי אֶת-אֲשֶׁר אָחֹן וְרִחַמְתִּי אֶת-אֲשֶׁר אֲרַחֵם׃ 16 וּמִפְּנֵי זֶה אֵין הַדָּבָר בְּיַד הָרֹצֶה וְלֹא בְּיַד הָרָץ כִּי אִם-בְּיַד אֱלֹהֵי הַחֲנִינָה׃ 17 כִּי-כֵן הַכָּתוּב אֹמֵר לְפַרְעֹה בַּעֲבוּר זֹאת הֶעֱמַדְתִּיךָ בַּעֲבוּר הַרְאֹתְךָ אֶת-כֹּחִי וּלְמַעַן סַפֵּר שְׁמִי בְּכָל-הָאָרֶץ׃ 18 וְזֶה יוֹרֶה לָּנוּ כִּי אֶת-אֲשֶׁר יִרְצֶה יְחֻנֶּנּוּ וְאֶת-אֲשֶׁר יִרְצֶה יַכְבִּיד אֶת-לִבּוֹ׃ 19 וְכִי תֹאמַר אֵלַי הֲלֹא רְצוֹנוֹ אֵין לְהַפְרִיעַ וְאִם-כֵּן לָמָּה-זֶּה יִפְקֹד עָוֹן׃ 20 אֲבָל מִי אַתָּה הוּא בֶּן-אָדָם כִּי תָרִיב רִיב עִם-הָאֱלֹהִים הֲיֹאמַר יֵצֶר לְיֹצְרוֹ לָמָּה-זֶּה כֹּה יְצַרְתָּנִי׃ 21 הַאֵין שִׁלְטוֹן לְיֹצֵר הַחֹמֶר לַעֲשׂוֹת מִגֹּלֶם הַהוּא כְּלִי אֶחָד לְכָבוֹד וּכְלִי אַחֵר לְקָלוֹן׃ 22 וּמָה אֵפוֹא אִם-חָפֵץ הָאֱלֹהִים לְהַרְאוֹת אֶת-זַעְמוֹ וּלְהוֹדִיעַ אֶת-גְּבוּרָתוֹ וְיִשָּׂא בְּאֹרֶךְ רוּחוֹ אֶת-כְּלֵי הַזַּעַם אֲשֶׁר נָכוֹנוּ לַאֲבַדּוֹן׃ 23 וְאֶת-עשֶׁר תִּפְאַרְתּוֹ הוֹדִיעַ בִּכְלֵי הַחֲנִינָה אֲשֶׁר הֲכִינָם מֵאָז לְכָבוֹד׃ 24 וּכְלֵי הַחֲנִינָה אֲנַחְנוּ אֵלֶּה אֲשֶׁר בָּחַר בָּנוּ לֹא מִן-הַיְּהוּדִים לְבַדָּם כִּי אִם-גַּם מִן-הַגּוֹיִם׃ 25 כַּאֲשֶׁר גַּם-דִּבֶּר בְּהוֹשֵׁעַ אֶקְרָא לְלֹא-עַמִּי עַמִּי׃ 26 וּלְלֹא-רֻחָמָה רֻחָמָה וְהָיָה בִּמְקוֹם אֲשֶׁר-יֵאָמֵר לָהֶם לֹא-עַמִּי אַתֶּם שָׁם יִקָּרְאוּ בְּנֵי אֵל-חָי׃ 27 וִישַׁעְיָה קֹרֵא עַל-יִשְׂרָאֵל לֵאמֹר כִּי אִם-יִהְיֶה מִסְפַּר בְּנֵי יִשְׂרָאֵל כְּחוֹל הַיָּם שְׁאָר יָשׁוּב בּוֹ׃ 28 כִּלָּיוֹן חָרוּץ שׁוֹטֵף צְדָקָה כִּי כָלָה וְנֶחֱרָצָה אֲדֹנָי עֹשֶׂה בְּקֶרֶב הָאָרֶץ׃ 29 וְכַאֲשֶׁר אָמַר יְשַׁעְיָה לְפָנִים לוּלֵי יְהוָֹה צְבָאוֹת הוֹתִיר לָנוּ זָרַע כִּסְדֹם הָיִינוּ לַעֲמֹרָה דָּמִינוּ׃ 30 וְעַתָּה מַה-נֹּאמַר כִּי הַגּוֹיִם אֲשֶׁר לֹא רָדְפוּ אֶת-הַצְּדָקָה הִשִּׂיגוּ צְדָקָה הִיא הַצְּדָקָה אֲשֶׁר מִמְּקוֹר אֱמוּנָה׃ 31 וּבְנֵי יִשְׂרָאֵל אֲשֶׁר רָדְפוּ אֶת-תּוֹרַת הַצְּדָקָה לֹא הִשִּׂיגוּ אֶת-תּוֹרַת הַצְּדָקָה׃ 32 וְיַעַן-מָה יַעַן כִּי-לֹא בֶאֱמוּנָה רָדְפוּ כִּי מִמַּעֲשֵׂי הַתּוֹרָה בִּפְעֻלּוֹת וַיִּתְנַגְּפוּ בְּאֶבֶן נָגֶף׃ 33 כַּכָּתוּב הִנְנִי יִסַּד בְּצִיּוֹן אֶבֶן נֶגֶף וְצוּר מִכְשׁוֹל וְהַמַּאֲמִין בּוֹ לֹא יֵבוֹשׁ׃

י    1 אַחַי תַּאֲוַת לִבִּי וּתְפִלָּתִי לֵאלֹהִים בְּעַד יִשְׂרָאֵל אֲשֶׁר יִוָּשֵׁעוּ׃ 2 כִּי עֵדוּת אֲנִי לָהֶם כִּי קִנְאַת אֱלֹהִים אִתָּם אַךְ לֹא-בְהַשְׂכֵּל׃ 3 כִּי מֵאֲשֶׁר צִדְקַת אֱלֹהִים הִשְׂכִּילוּ וַיִּתְאַמְּצוּ לְהָקִים צִדְקַת נַפְשָׁם לֹא נִכְנַע לִבָּם לִפְנֵי צִדְקַת אֱלֹהִים׃ 4 כִּי תַכְלִית הַתּוֹרָה הוּא הַמָּשִׁיחַ לִצְדָקָה לְכָל-הַמַּאֲמִין בּוֹ׃ 5 כִּי משֶׁה כֹתֵב עַל-הַצְּדָקָה לְפִי מִשְׁפְּטֵי הַתּוֹרָה אֲשֶׁר יַעֲשֶׂה אֹתָם הָאָדָם וָחַי בָּהֶם׃ 6 וְהַצְּדָקָה מִמְּקוֹר הָאֱמוּנָה תִּקְרָא כָזֹאת אַל-תֹּאמַר בִּלְבָבְךָ מִי יַעֲלֶה הַשָּׁמָיְמָה זֶה הוּא לְהוֹרִיד אֶת-הַמָּשִׁיחַ׃ 7 אוֹ מִי-יֵרֵד שְׁאֹלָה זֶה הוּא לְהַעֲלוֹת אֶת-הַמָּשִׁיחַ מִן-הַמֵּתִים׃ 8 וּמָה הִיא אֹמֶרֶת כִּי קָרוֹב אֵלֶיךָ הַדָּבָר בְּפִיךָ וּבִלְבָבֶךָ וְזֶה הוּא דְבַר הָאֱמוּנָה אֲשֶׁר אֲנַחְנוּ מְבַשְּׂרִים׃ 9 כִּי אִם-בְּפִיךָ תוֹדֶה כִּי יֵשׁוּעַ הוּא הָאָדוֹן וּבִלְבָבְךָ תַאֲמִין כִּי אֱלֹהִים הֲקִימוֹ מִן-הַמֵּתִים תִּוָּשֵׁעַ׃ 10 כִּי בִלְבָבוֹ יַאֲמִין בּוֹ הָאָדָם וְהָיָה-לוֹ לִצְדָקָה וּבְפִיהוּ יוֹדֶה-לּוֹ וְהָיָה-לוֹ לִישׁוּעָה׃ 11 כִּי הַכָּתוּב אֹמֵר וְהַמַּאֲמִין בּוֹ לֹא יֵבוֹשׁ׃ 12 וְאֵין מַבְדִּיל בֵּין-יְהוּדִי לַיְּוָנִי כִּי הֲלֹא הוּא אֲדוֹן-כֹּל וְרַב חֶסֶד לְכָל-קֹרְאָיו׃ 13 כִּי-כֹל אֲשֶׁר-יִקְרָא בְשֵׁם יְהוָֹה יִמָּלֵט׃ 14 אָכֵן אֵיךְ יִקְרְאוּ אֵלָיו אֲשֶׁר לֹא הֶאֱמִינוּ-בוֹ וְאֵיךְ יַאֲמִינוּ-בוֹ אֲשֶׁר לֹא שָׁמְעוּ עָלָיו וְאֵיךְ יִשְׁמְעוּ בְּאֵין מַגִּיד׃ 15 וְאֵיךְ יַגִּידוּ אִם-אֵין שֹׁלֵחַ אֹתָם כַּכָּתוּב מַה-נָּאווּ רַגְלֵי מְבַשֵׂר שָׁלוֹם מְבַשֵׂר טוֹב׃ 16 אַךְ לֹא-כֻלָּם שָׁמְעוּ אֶל-הַבְּשׂרָה כִּי יְשַׁעְיָהוּ אָמַר יְהוָֹה מִי הֶאֱמִין לִשְׁמֻעָתֵנוּ׃ 17 אֲשֶׁר לָזֹאת הָאֱמוּנָה בָאָה מִפִּי הַשְּׁמוּעָה וְהַשְּׁמוּעָה הִיא בִּדְבַר אֱלֹהִים׃ 18 אַךְ אֲנִי אֹמֵר הֲכִי לֹא שָׁמָעוּ הֲלֹא בְּכָל-הָאָרֶץ יָצָא קוֹלָם וּבִקְצֵה תֵבֵל מִלֵּיהֶם׃ 19 וְעוֹד אֲנִי אֹמֵר הֲכִי לֹא יָדַע יִשְׂרָאֵל וּמִקֶּדֶם אָמַר משֶׁה אֲנִי אַקְנִיאֲכֶם בְּלֹא-עָם בְּגוֹי נָבָל אַכְעִיסְכֶם׃ 20 וִישַׁעְיָה יָעֹז לֵאמֹר נִמְצֵאתִי לְלֹא בִקְשֻׁנִי נִגְלֵיתִי לְלוֹא שְׁאָלוּנִי׃ 21 וְעַל-יִשְׂרָאֵל הוּא אֹמֵר פֵּרַשְׂתִּי יָדַי כָּל-הַיּוֹם אֶל-עַם סוֹרֵר וּמֹרֶה׃

יא    1 וַאֲנִי אֹמֵר כַּיּוֹם הֲכִי הִשְׁלִיךְ אֱלֹהִים אֶת-עַמּוֹ מֵעַל-פָּנָיו חָלִילָה גַּם-אָנֹכִי יִשְׂרְאֵלִי אֲנִי מִזֶּרַע אַבְרָהָם לְמַטֵּה בִנְיָמִין׃ 2 לֹא-הִשְׁלִיךְ אֱלֹהִים מֵעַל-פָּנָיו אֶת-עַמּוֹ אֲשֶׁר יְדָעוֹ מִקֶּדֶם הֲלֹא יְדַעְתֶּם אֶת-אֲשֶׁר יֹאמַר הַכָּתוּב בְּאֵלִיָּהוּ בְּהִתְאוֹנְנוֹ עַל-יִשְׂרָאֵל לִפְנֵי אֱלֹהִים לֵאמֹר׃ 3 יְהוָֹה אֶת-נְבִיאֶיךָ הָרְגוּ וְאֶת-מִזְבְּחֹתֶיךָ הָרָסוּ וָאִוָּתֵר אֲנִי לְבַדִּי וַיְבַקְשׁוּ אֶת-נַפְשִׁי לְקַחְתָּה׃ 4 וּמַה יַּעֲנֶה אֹתוֹ דְּבַר אֱלֹהִים הִשְׁאַרְתִּי לִי שִׁבְעַת אֲלָפִים אִישׁ אֲשֶׁר לֹא-כָרְעוּ עַל-בִּרְכַּיִם לַבָּעַל׃ 5 וְכֵן גַּם-בַּיּוֹם הַזֶּה הִשְׁאִיר לוֹ שְׁאֵרִית כַּאֲשֶׁר בָּחַר בָּהֶם בְּחָסֶד׃ 6 וְאִם בְּחֶסֶד לֹא עָשָׂה זֹאת עוֹד בִּשְׂכַר מַעֲשֶׂה כִּי אִם-כֵּן הַחֶסֶד אֵינֶנּוּ עוֹד חָסֶד וְאִם-הָיְתָה מִתּוֹךְ הַמַּעֲשִׂים אֵינֶנוּ-עוֹד חֶסֶד כִּי אִם-כֵּן הַמַּעֲשֶׂה יֶחְדַּל לִהְיוֹת מַעֲשֶׂה׃ 7 וְעַתָּה מָה אֵפוֹא בְּנֵי יִשְׂרָאֵל לֹא הִשִּׂיגוּ אֶת-אֲשֶׁר בִּקְשׁוּ רַק הַנִּבְחָרִים הִשִּׂיגוּ וְהַנּוֹתָרִים הֻכּוּ בָּעִוָּרוֹן׃ 8 כַּכָּתוּב נָתַן לָהֶם יְהוָֹה רוּחַ תַּרְדֵּמָה עֵינַיִם לֹא לִרְאוֹת וְאָזְנַיִם לֹא לִשְׁמֹעַ עַד-הַיּוֹם הַזֶּה׃ 9 וְדָוִד אֹמֵר יְהִי שֻׁלְחָנָם לְפַח וּלְרָשֶׁת וּלְמוֹקֵשׁ וּלְשִׁלּוּמִים לָהֶם׃ 10 תֶּחֱשַׁכְנָה עֵינֵיהֶם מֵרְאוֹת וּמָתְנֵיהֶם תָּמִיד הַמְעֵד׃ 11 וַאֲנִי אֹמֵר כַּיּוֹם הֲכִי נוֹקְשׁוּ לְמַעַן יִפְּלוּ וְלֹא יוֹסִיפוּ קוּם חָלִילָה אַךְ בְּמַפַּלְתָּם יָצְאָה יְשׁוּעָה לַגּוֹיִים לְמַעַן הַקְנִיאָם׃ 12 אַךְ אִם-מַפַּלְתָּם הָיְתָה תְּשׁוּעַת הָעוֹלָם וְנִזְקָם לְחֵיל גּוֹיִם אַף כִּי קוּמָם וְהֵם מְלֵאִים׃ 13 וַאֲלֵיכֶם הַגּוֹיִם אֲנִי דֹבֵר אַחֲרֵי אֲשֶׁר שָׁלִיחַ לַגּוֹיִים אָנֹכִי אֶת-מִשְׁמַרְתִּי אֲכַבֵּדָה׃ 14 אוּלַי אַקְנִיא אֶת-בְּנֵי עַמִּי וּבְשָׂרִי וְהוֹשַׁעְתִּי לַאֲחָדִים מֵהֶם׃ 15 כִּי אִם-מֵאֲשֶׁר נִדְּחוּ בָּאָה עֵת רָצוֹן לְישְׁבֵי תֵבֵל מָה-אֵפוֹא תִהְיֶה לָעֵת יִקָּבְצוּ הֲלֹא חַיִּים מִן-הַמֵּתִים׃ 16 וְאִם-רֵאשִׁית הָעֲרִסָה קֹדֶשׁ כֵּן גַּם-הָעֲרִיסָה וְאִם-שֹׁרֶשׁ הָעֵץ קֹדֶשׁ כֵּן גַּם-עֲנָפָיו׃ 17 וְכִי נִקְטְפוּ מִן-הָעֲנָפִים וְאַתָּה זֵית הַיַּעַר נִטַּעְתָּ בִמְקוֹמָם וַתִּתְעָרֶה בְּשֹׁרֶשׁ הַזַּיִת וּבְדִשְׁנוֹ׃ 18 אַל-תִּתְנַשֵּׂא עַל-הָעֲנָפִים וְאִם-תִּתְנַשֵּׂא זְכֹר כִּי לֹא אַתָּה תִשָּׂא אֶת-הַשֹּׁרֶשׁ כִּי אִם-הַשֹּׁרֶשׁ יִשָּׂא אֹתָךְ׃ 19 וְהֵן תַּעֲנֶה הֲלֹא נִקְטְפוּ הָעֲנָפִים לְהַרְכִּיב אֹתִי עֲלֵיהֶם׃ 20 כֵּן דִּבַּרְתָּ הֵן נִקְטְפוּ בְחֹסֶר אֱמוּנָתָם וְאַתָּה נִצָּב בֶּאֱמוּנָתֶךָ אַל-יִגְבַּהּ לִבְּךָ כִּי אִם-יְרָא׃ 21 כִּי אִם-לֹא חָמַל אֱלֹהִים עַל-הָעֲנָפִים הָאֱזְרָחִים הֲלֹא גַּם-עָלֶיךָ לֹא-יַחְמֹל׃ 22 שׁוּר-נָא אֵפוֹא חֶסֶד אֱלֹהִים וּמִשְׁפָּטוֹ הַנּוֹרָא לָאֵלֶּה הַנּוֹקָשִׁים מִשְׁפָּט נוֹרָא וּלְךָ חֶסֶד אֱלֹהִים אִם-אָרְחוֹת חֶסֶד תִּשְׁמֹר וְאִם-אַיִן גַּם-אַתָּה תִּגָּדֵעַ׃ 23 וְגַם-הֵם אִם-לֹא יַחֲזִיקוּ בְחֹסֶר אֱמוּנָתָם יִטָּעוּ כִּי-יָכֹל אֱלֹהִים לָשׁוּב לָטַעַת אֹתָם׃ 24 כִּי אִם-אַתָּה נִקְטַפְתָּ מִזֵּית הַיַּעַר בְּאַדְמַת מוֹלַדְתּוֹ וְנִטַּעְתָּ בְמוֹ-זַיִת טוֹב אֲשֶׁר לֹא כְחֻקֶּךָ אַף-כִּי הָעֲנָפִים הָאֶזְרָחִים בְּמוֹ-זֵיתָם יִטָּעוּ׃ 25 כִּי אֵין-נַפְשִׁי לְכַסּוֹת מִכֶּם אַחַי אֶת-הַסּוֹד הַזֶּה פֶּן-תִּהְיוּ חֲכָמִים בְּעֵינֵיכֶם כִּי יִשְׂרָאֵל הֻכָּה בְּעִוָּרוֹן מִקָּצֶה אֶחָד עַד כִּי-יָבֹא מְלֹא הַגּוֹיִם׃ 26 וּבְכֵן כָּל-יִשְׂרָאֵל יִוָּשֵׁעַ כַּכָּתוּב וּבָא מִצִּיּוֹן גּוֹאֵל וְיָשִׁיב פֶּשַׁע מִיַּעֲקֹב׃ 27 וַאֲנִי זֹאת בְּרִיתִי אוֹתָם כִּי-אֶסְלַח לַעֲוֹנָם׃ 28 הֵן בִּדְבַר הַבְּשׂוֹרָה שְׂנוּאִים הֵם בִּגְלַלְכֶם אַךְ בִּדְבַר הַבְּחִירָה אֲהוּבִים הֵם בִּגְלַל הָאָבוֹת׃ 29 כִּי לֹא-יִנָּחֵם אֱלֹהִים עַל-מַתְּנַת יָדוֹ וְעַל-קְרִיאַת פִּיהוּ׃ 30 כִּי כַּאֲשֶׁר גַּם-אַתֶּם לְפָנִים לֹא הֶאֱמַנְתֶּם בֵּאלֹהִים וְעַתָּה רֻחַמְתֶּם עֵקֶב חֹסֶר אֱמוּנָתָם׃ 31 כֵּן גַּם-הֵם לֹא הֶאֱמִינוּ עָתָּה לְמַעַן עֵקֶב רַחֲמֵיכֶם גַּם-הֵמָּה יְרֻחָמוּ׃ 32 כִּי-הִסְגִּיר אֱלֹהִים אֶת-כֻּלָּם לְלֹא-אֱמוּנָה לְמַעַן יְרַחֵם עַל-כֻּלָּמוֹ׃ 33 מֶה-עָמֹק תְּהוֹם הַחָכְמָה וְהַדַּעַת לֵאלֹהִים מִי יַחְקֹר מִשְׁפָּטָיו וּדְרָכָיו מִי יִמְצָא׃ 34 כִּי מִי-תִכֵּן אֶת-רוּחַ יְהוָֹה וְאִישׁ עֲצָתוֹ יוֹדִיעֶנּוּ׃ 35 אוֹ מִי-הִקְדִּים לָתֵת אֵלָיו וִישֻׁלַּם לוֹ׃ 36 כִּי הַכֹּל מִיָּדוֹ הַכֹּל בּוֹ וְהַכֹּל לוֹ הוּא אֲשֶׁר-לוֹ הַכָּבוֹד לְעוֹלָם וָעֶד אָמֵן׃

יב    1 וְעַתָּה אֲנִי מִתְחַנֵּן אֲלֵכֶם אַחַי בָּרַחֲמֵי אֱלֹהִים לְהַקְדִּישׁ אֶת-גְּוִיּוֹתֵיכֶם כְּקָרְבָּן חַי וְקָדוֹשׁ לְרָצוֹן לֵאלֹהִים כִּי-בְזֹאת תַּשְׂכִּילוּ לַעֲבֹד אֹתוֹ׃ 2 וְאַל-תִּהְיוּ דוֹמִים לִבְנֵי הָעוֹלָם הַזֶּה כִּי אִם-תְּנוּ לִבְּכֶם לְהִתְחַדֵּשׁ וְנֶהְפַּכְתֶּם לַעֲנָשִׁים אֲחֵרִים וְעֵינֵיכֶם לֵאלֹהִים לִבְחֹן מַה-הוּא רְצוֹנוֹ הַטּוֹב וְהַנָּעִים וְהַשָּׁלֵם׃ 3 כִּי עַל-פִּי רוּחַ הַחֵן הַנָּתוּן לִי אֶקְרָא לְאִישׁ אִישׁ מִכֶּם לְבִלְתִּי יַעֲרִיךְ אֶת-נַפְשׁוֹ יֶתֶר מֵאֲשֶׁר נָכוֹן לוֹ כִּי אִם-הַעֲרֵךְ וְהַצְנֵעַ לְפִי מִדַּת הָאֱמוּנָה אֲשֶׁר-מָדַד לוֹ אֱלֹהִים׃ 4 כִּי כַּאֲשֶׁר יְצֻרִים רַבִּים לָנוּ בְּגוּף אֶחָד וְלֹא לְכָל-הַיְצֻרִים מִשְׁמֶרֶת אֶחָת׃ 5 כֵּן רַבִּים אֲנַחְנוּ לְגוּף אֶחָד בַּמָּשִׁיחַ וְאִישׁ אִישׁ מִמֶּנּוּ כִּיצוּר לַחֲבֵרוֹ׃ 6 וְכֵן לָנוּ מַתָּנוֹת שֹׁנוֹת לְפִי רוּחַ הַחֵן הַנָּתוּן לָנוּ אִם-נְבוּאָה נִתְנַבֵּא לְפִי קַו אֱמוּנָתֵנוּ׃ 7 מִי הָעֹמֵד לְשָׁרֵת יְשָׁרֵת כְּאִישׁ חָיִל וְכֵן הַמּוֹרֶה יוֹרֶה כַּמִּשְׁפָּט׃ 8 הַמוֹכִיחַ יַשְׂכִּיל פִּיהוּ בְתוֹכַחְתּוֹ הַנֹּתֵן יִדְּבֶנּוּ לִבּוֹ בְּמַתְּנַת יָדוֹ הָעֹמֵד בְּרֹאשׁ הָעֵדָה יַעֲמֹד כְּאִישׁ חָרוּץ וְהַגֹּמֵל חֶסֶד יִגְמֹל בְּטוּב לֵב׃ 9 אַל-תְּהִי אַהֲבַתְכֶם בִּשְׂפַת חֲלָקוֹת שִׁנְאוּ אֶת-הָרָע וְדִבְקוּ בַּטּוֹב׃ 10 אֶהֱבוּ אִישׁ אֶת-אָחִיהוּ מִמְּקוֹר רַחֲמֵיכֶם וְכַבְּדוּ אִישׁ אֶת-חֲבֵרוֹ יוֹתֵר מִנַּפְשְׁכֶם׃ 11 שִׁקְדוּ עַל-מַעֲשֵׂיכֶם וְאַל-תֵּעָצְלוּ הִתְאשְׁשׁוּ בָרוּחַ וְעִבְדוּ אֶת-יְהוָֹה׃ 12 שִׂמְחוּ בַתִּקְוָה הוֹחִילוּ בַצָּרָה חִזְקוּ וְאִמְצוּ בַתְּפִלָּה תָּמִיד׃ 13 הִתְחַבְּרוּ לְמַלֹּאת מַחֲסֹרֵי הַקְּדוֹשִׁים וְחוּשׁוּ לְהָבִיא אֹרְחִים לְבָתֵּיכֶם׃ 14 בָּרְכוּ אֶת-רֹדְפֵכֶם בָּרְכוּ וְאַל-תְּקַלֵּלוּ׃ 15 שִׂמְחוּ עִם-הַשְּׂמֵחִים וּבְכוּ עִם-הַבֹּכִים׃ 16 שִׁיתוּ אֶת לִבְּכֶם לַחְשֹׁב אִישׁ אִישׁ כִּלְבַב אָחִיו אַל-תְּהַלְּכוּ בִגְדֹלוֹת מִכֶּם הִתְרוֹעֲעוּ עִם-עֲנָוִים וְאַל-תִּהְיוּ חֲכָמִים בְּעֵינֵיכֶם׃ 17 אַל-תִּגְמְלוּ לְאִישׁ רָעָה תַּחַת רָעָה חוּשׁוּ לַעֲשׂוֹת אֶת-הַטּוֹב בְּעֵינֵי-כֹל׃ 18 וְאִם-יֵשׁ מָקוֹם כַּאֲשֶׁר יֶשׁ-לְאֵל יֶדְכֶם הַשְׁלִימוּ עִם-כָּל-אָדָם׃ 19 אַל-תִּתְנַקְּמוּ יְדִידִים כִּי אִם-תְּנוּ מָקוֹם לַחֲרוֹן-אָף כִּי כָתוּב לִי נָקָם אֲנִי אֲשַׁלֵם אָמַר יְהוָֹה׃ 20 וְאִם-רָעֵב שׂנַאֲךָ הַאֲכִילֵהוּ לֶחֶם וְאִם-צָמֵא הַשְׁקֵהוּ מָיִם כִּי גֶחָלִים אַתָּה חֹתֶה עַל-רֹאשׁוֹ׃ 21 אַל-תִּכָּבֵשׁ לִפְנֵי הָרָע כִּי אִם-כְּבֹשׁ אֶת-הָרַע לְפָנֶיךָ בַּטּוֹב׃

יג    1 כָּל-נֶפֶשׁ תִּכָּנַע לִפְנֵי מֶמְשֶׁלֶת הָרָאשִׁים כִּי-אֵין מֶמְשָׁלָה זוּלָתִי הַנְּתוּנָה עַל-פִּי הָאֱלֹהִים וּמֵאִתּוֹ נִהְיוּ הַמֶּמְשָׁלוֹת אֲשֶׁר יֶשְׁנָן׃ 2 לָכֵן כָּל-הַמֹּרֵד בַּמֶּמְשָׁלָה הִמְרָה בִּפְקֻדַּת אֱלֹהִים וְהַמַּמְרִים יִשְׂאוּ עֲוֹנָם בְּרֹאשָׁם׃ 3 כִּי-הַשַּׁלִּיט אֵינֶנּוּ לִמְחִתָּה לְמַעֲשִׂים טוֹבִים כִּי אִם-לְרָעִים וְכִי-תֹאבֶה כִּי-מֶמְשַׁלְתּוֹ לֹא-תְהִי לְךָ לִמְחִתָּה עֲשֵׂה טוֹב וּתְהִלָּה תִשָּׂא מִלְּפָנָיו׃ 4 כִּי-מְשָׁרֵת אֱלֹהִים הוּא לְטוֹב לָךְ אֶפֶס אִם-אָוֶן פָּעַלְתָּ יְרָא כִּי לֹא-חִנָּם יִשָּׂא אֶת-חַרְבּוֹ וּמְשָׁרֵת אֱלֹהִים הוּא הַנִּשְׁפָּט בְּזַעַם אֶת-פֹּעֵל אָוֶן׃ 5 לָכֵן נָכוֹן לָכֶם לְהִכָּנַע לֹא מִפְּנֵי הַזַּעַם לְבַדּוֹ כִּי-אִם גַּם-מִפְּנֵי מוּסַר הַלֵּב׃ 6 אֲשֶׁר בַּעֲבוּר זֶה אַתֶּם מְשַׁלְּמִים גַּם אֶת-הַמָּס כִּי-מְשָׁרְתֵי אֱלֹהִים הֵם הַשֹּׁקְדִים עַל-הַדָּבָר הַזֶּה׃ 7 הָבוּ לְכָל-אִישׁ אֶת-אֲשֶׁר לוֹ הַמַּס לַאֲשֶׁר-לוֹ הַמַּס הַמֶּכֶס לַאֲשֶׁר-לוֹ הַמֶּכֶס הַיִּרְאָה לַאֲשֶׁר-לוֹ הַיִּרְאָה וְהַכָּבוֹד לַאֲשֶׁר-לוֹ הַכָּבוֹד׃ 8 לֹא תָלִינוּ אִתְּכֶם כָּל-חוֹב בִּלְתִּי אַהֲבַת אָדָם לַחֲבֵרוֹ כִּי הָאֹהֵב אֶת-חֲבֵרוֹ קִיֵּם אֶת-הַתּוֹרָה׃ 9 כִּי-הִנֵּה לֹא תִנְאָף לֹא תִרְצָח לֹא תִגְנֹב לֹא תַעֲנֶה עֵד שֶׁקֶר לֹא תַחְמֹד עִם כָּל-מִצְוֹת אֲחֵרוֹת יָכִיל אֹתָן הַכָּתוּב וְאָהַבְתָּ לְרֵעֲךָ כָּמוֹךָ׃ 10 הָאַהֲבָה לֹא תַעֲשֶׂה רָע לָרֵעַ עַל-כֵּן הָאַהֲבָה הִיא קִיּוּם הַתּוֹרָה׃ 11 וְאַף אֶת-הַזְּמָן לֹא תְנַכֵּרוּ כִּי בָא הַמוֹעֵד לְהָקִיץ מִשֵּׁנָה כִּי יְשׁוּעָתֵנוּ קְרֹבָה לָנוּ עַתָּה מִיּוֹם אֲשֶׁר הֲחִלּנוּ לְהַאֲמִין׃ 12 הַלַּיְלָה חָלַף הָלַךְ לוֹ וְהַיּוֹם הִגִּיעַ נַעַזְבָה-נָּא אֶת-פָּעֳלֵי הַחֹשֶׁךְ וּכְלֵי נֶשֶׁק הָאוֹר נַחְגֹּרָה׃ 13 וּבְמֵישָׁרִים נִתְהַלֵּךְ כְּמוֹ-בַיּוֹם לֹא בְמִרְזַח סְרוּחִים וְשִׁכָּרוֹן לֹא-בְזִמָּה וַעֲגָבִים וְלֹא-בְזָדוֹן וְקִנְאָה׃ 14 אַךְ רוּחַ יֵשׁוּעַ הַמָּשִׁיחַ אֲדֹנֵינוּ תִּלְבַּשׁ אֶתְכֶם וְלֹא תְמַלְאוּ מִשְׁאֲלוֹתֵיכֶם לְפִי תַאֲוַת הַבָּשָׂר׃

יד    1 אִישׁ רְפֵה יָדַיִם בֶּאֱמוּנָה קַבְּלֻהוּ בְתוֹכְכֶם וְלֹא לְחִקְרֵי לֵב לִשְׂעִיפָּיו וְעֶשְׁתֹּנֹתָיו׃ 2 יֵשׁ מַאֲמִין כִּי כָּל-דָּבָר נָכוֹן לוֹ לֶאֱכֹל וּרְפֵה יָדַיִם זֶה יֹאכַל יָרֶק׃ 3 הָאֹכֵל כָּל-מַאֲכָל אַל-יָבוּז לַאֲשֶׁר אֵינֶנּוּ אֹכֵל וַאֲשֶׁר אֵינֶנּוּ אֹכֵל אַל-יִשְׁפֹּט אֶת-הָאֹכֵל כִּי-נָשָׂא פָנָיו אֱלֹהִים׃ 4 מִי אַתָּה כִּי-תִשְׁפֹּט עֶבֶד לֹא-לָךְ הֵן לַאדֹנָיו הוּא כִּי יָקוּם וְכִי-יִפֹּל וְהוּא יָקוּם כִּי-רַב כֹּחַ יְהוָֹה לַהֲקִימוֹ׃ 5 יֵשׁ מַבְדִּיל יוֹם מֵעַל יוֹם וְיֵשׁ אֲשֶׁר יוֹם כַּיּוֹם נֶחְשָׁב-לוֹ יְהִי-נָא כָּל-אִישׁ סָמוּךְ לִבּוֹ בְּדַעְתּוֹ׃ 6 הַמְכַבֵּד יָמִים לַיהוָֹה הוּא מְכַבְדָם וַאֲשֶׁר אֵינֶנוּ מְכַבֵּד יָמִים לְמַעַן יְהוָֹה אֵינֶנוּ מְכַבְדָם הָאֹכֵל אֹכֵל לְשֵׁם יְהוָֹה כִּי-יוֹדֶה לוֹ וַאֲשֶׁר אֵינֶנּוּ אֹכֵל לְשֵׁם אֱלֹהִים וִיהוֹדֶנּוּ׃ 7 כִּי אֵין-אִישׁ מֵאִתָּנוּ יִחְיֶה לְנַפְשׁוֹ וְאֵין-אִישׁ יָמוּת לְנַפְשׁוֹ׃ 8 כִּי אִם-נִחְיֶה נִחְיֶה לַיהוָֹה וְכִי-נָמוּת נָמוּת לַיהוָֹה לָכֵן כִּי-נִחְיֶה וְכִי-נָמוּת לַיהוָֹה הִנֵּנוּ׃ 9 כִּי הֲלֹא בַּעֲבוּר זֹאת מֵת הַמָּשִׁיחַ וַיָּקָם וָחָי לְהִשְׂתָּרֵר כְּאָדוֹן עַל-הַמֵּתִים וְעַל-הַחַיִּים׃ 10 וְאַתָּה לָמָּה-זֶּה תִשְׁפֹּט אֶת-אָחִיךָ אוֹ מַדּוּעַ תָּבוּז אַתָּה לְאָחִיךָ וְכֻלָּנוּ לַמִשְׁפָּט נַעֲמֹד לִפְנֵי כִסֵּא דִּין אֱלֹהִים׃ 11 כִּי כָתוּב חַי-אָנִי נְאֻם יְהוָֹה כִּי לִי תִּכְרַע כָּל-בֶּרֶךְ וְכָל-לָשׁוֹן תּוֹדֶה לֵאלֹהִים׃ 12 עַל-כֵּן כָּל-אִישׁ וְאִישׁ לְנַפְשׁוֹ יָשִׁיב אֶת-אֱלֹהִים דָּבָר׃ 13 וְעַתָּה לֹא נִשְׁפֹּט עוֹד אִישׁ אֶת-אָחִיו כִּי אִם-נַחֲרֹץ מִשְׁפָּט לְבִלְתִּי תֵת אִישׁ לִפְנֵי אָחִיו מוֹקֵשׁ אוֹ מִכְשׁוֹל׃ 14 יָדַעְתִּי גַּם-יָדַעְתִּי בְּיֵשׁוּעַ אֲדֹנֵינוּ כִּי-אֵין דָּבָר טָמֵא מֵאֵלָיו וְרַק-טָמֵא הוּא לְמִי אֲשֶׁר יַחְשְׁבֶנּוּ לְטָמֵא׃ 15 וְאִם-יֵעָצֵב אָחִיךָ בְּמַאֲכָלְךָ אֵינְךָ הֹלֵךְ עוֹד בְּאֹרַח אַהֲבָה אַל-תַּשְׁחֵת בְּמַאֲכָלְךָ אֶת-אָחִיךָ אֲשֶׁר הַמָּשִׁיחַ מֵת בַּעֲדוֹ׃ 16 וְאַל-תִּתֵּן יִשְׁרַת נַפְשְׁךָ לְגִדּוּפִים׃ 17 כִּי-מַלְכוּת אֱלֹהִים אֵינֶנָּה מַאֲכָל וּמִשְׁתֶּה כִּי אִם-צְדָקָה שָׁלוֹם וְחֶדְוָה בְּרוּחַ הַקֹּדֶשׁ׃ 18 וְהָעֹבֵד אֶת-הַמָּשִׁיחַ בָּאֵלֶּה רָצוּי הוּא לֵאלֹהִים וְנֶחְמָד בְּעֵינֵי אֲנָשִׁים׃ 19 עַל-כֵּן נִרְדְּפָה-נָּא דַרְכֵי שָׁלוֹם לְכוֹנֵן אִישׁ אֶת-רֵעֵהוּ׃ 20 אַל-תַּהֲרֹס פֹּעַל אֱלֹהִים עַל-דִּבְרַת מַאֲכָל כָּל-דָּבָר הוּא טָהוֹר וְרַק רַע הוּא לַאֲשֶׁר יֹאכְלֶנּוּ לְהִתְנַקֵּם בְּנַפְשׁוֹ׃ 21 טוֹב לֹא-לֶאֱכֹל בָּשָׂר לֹא-לִשְׁתּוֹת יָיִן וְלֹא-לַעֲשׂוֹת דָּבָר אֲשֶׁר יִהְיֶה מִכְשׁוֹל לֵב לְאָחִיךָ אוֹ אֲשֶׁר יִוָּקֶשׁ-בּוֹ אוֹ יָדָיו תִּרְפֶּינָה׃ 22 יֶשׁ-לְךָ אֱמוּנָה תְּהִי-לְךָ לְבַדְּךָ לִפְנֵי הָאֱלֹהִים אַשְׁרֵי הָאִישׁ אֲשֶׁר לִבּוֹ לֹא יַרְשִׁיעֶנּוּ בַּאֲשֶׁר יִבְחַר-לוֹ׃ 23 אַךְ אִם-יֹאכַל וְלִבּוֹ נִפְלַג עָלָיו וְנָשָׂא עֲוֹנוֹ יַעַן כִּי לֹא בֶאֱמוּנָה מַעֲשֵׂהוּ וְכֹל אֲשֶׁר נַעֲשָׂה בִּבְלִי אֱמוּנָה חֵטְא הוּא׃

טו    1 וַאֲנַחְנוּ גִבֹּרֵי כֹחַ עָלֵינוּ הַמִּצְוָה לָשֵׂאת רִפְיוֹן דַּלֵּי כֹחַ וְלֹא לָחוּשׁ לְחֵפֶץ נַפְשֵׁנוּ׃ 2 וְאִישׁ אִישׁ מֵאִתָּנוּ יָחוּשׁ לְחֵפֶץ רֵעֵהוּ לְטוֹב-לוֹ לְבַעֲבוּר יִבָּנֶה מִמֶּנוּ׃ 3 כִּי גַם-הַמָּשִׁיחַ לֹא חָשׁ לְנַפְשׁוֹ כִּי אִם-חָשׁ לַאֲשֶׁר כָּתוּב וְחֶרְפּוֹת חוֹרְפֶיךָ נָפְלוּ עָלָי׃ 4 וְכָל-אֲשֶׁר נִכְתַּב מִקֶּדֶם נִכְתַּב לְמוּסָר לָנוּ לְהַחֲזִיק בְּתִקְוָה בְּאֹרֶךְ אַפַּיִם וּבְתַנְחוּמוֹת הַכְּתוּבִים׃ 5 וְאֵל אֶרֶךְ אַפַּיִם אֲבִי הַתַּנְחוּמִים יִתֵּן לָכֶם לֵב אֶחָד לְאִישׁ כְּאָחִיו כְּיַד יֵשׁוּעַ הַמָּשִׁיחַ׃ 6 וּבְלֵב אֵחָד וּפֶה אֶחָד תְּכַבְּדוּ יַחְדָּו אֶת-אֱלֹהִים אֲבִי אֲדֹנֵינוּ יֵשׁוּעַ הַמָּשִׁיחַ׃ 7 עַל-כֵּן קַבְּלוּ נָא אִישׁ אֶת-רֵעֵהוּ כַּאֲשֶׁר גַּם-הַמָּשִׁיחַ קִבֵּל אֶתְכֶם לִכְבוֹד הָאֱלֹהִים׃ 8 וַאֲנִי אֹמֵר כִּי יֵשׁוּעַ הַמָּשִׁיחַ הָיָה לִמְשָׁרֵת אֶת-הַנִּמּוֹלִים בַּעֲבוּר אֱמֶת אֱלֹהים לְהָקִים דְּבָרָיו אֶל-הָאָבוֹת׃ 9 וְהַגּוֹיִם גַּם-הֵם יְכַבְּדוּ אֶת-הָאֱלֹהִים עַל-חַסְדּוֹ כַּכָּתוּב עַל-כֵּן אוֹדְךָ בַגּוֹיִם וּלְשִׁמְךָ אֲזַמֵּרָה׃ 10 וְעוֹד כָּתוּב הַרְנִינוּ גוֹיִם עַמּוֹ׃ 11 וְעוֹד הַלְלוּ אֶת-יְהוָֹה כָּל-גּוֹיִם שַׁבְּחוּהוּ כָּל-הָאֻמִּים׃ 12 וִישַׁעְיָה יֹאמַר עוֹד וְהָיָה שֹׁרֶשׁ יִשַׁי וְהָעֹמֵד לִמְשֹׁל בָּעַמִּים אֵלָיו גּוֹיִם יְקַוּוּ׃ 13 וֵאלֹהֵי הַתִּקְוָה יְמַלֵּא אֶתְכֶם כָּל-שִׂמְחָה וְשָׁלוֹם בֶּאֱמוּנַתְכֶם לְהוֹסִיף חַיִל בְּתִקְוָה בְּעֹז רוּחַ הַקֹּדֶשׁ׃14 וְגַם-בָּכֶם אַחַי בָּטְחָה נַפְשִׁי מְאֹד כִּי-אַתֶּם מְלֵאִים חֶסֶד שְׁלֵמִים בְּכָל-דַּעַת וּנְכֹנִים לְהַזְהִיר אִישׁ אֶת-אָחִיו׃ 15 וַאֲנִי בְּיֶתֶר עֹז כָּתַבְתִּי אֲלֵיכֶם עַל-אֹדוֹת דְּבָרִים אֲחָדִים כְּמַזְכִּיר אֲנִי לִפְנֵיכֶם אַחֲרֵי אֲשֶׁר הִטָּה אֱלֹהִים אֵלַי חָסֶד׃ 16 וָאֶהְיֶה לִמְשָׁרֵת יֵשׁוּעַ הַמָּשִׁיחַ בֵּין הַגּוֹיִם וַאֲכַהֵן לִבְשׂוֹרַת הָאֱלֹהִים בַּעֲבוּר יַעֲלֶה קָרְבָּן הַגּוֹיִם לְרָצוֹן מְקֻדָּשׁ בְּרוּחַ הַקֹדֶשׁ׃ 17 וּבְכֵן יֶשׁ-לִי לְהִתְהַלֵּל בְּיֵשׁוּעַ הַמָּשִׁיחַ בַּחֲפָצִים אֲשֶׁר לֵאלֹהִים׃ 18 כִּי לֹא-נִסִּיתִי לְדַבֵּר דָּבָר אֲשֶׁר לֹא בִצַּע הַמָּשִׁיחַ עַל-יָדִי לְהַטּוֹת אֵלָיו אֶת-לֵב הַגּוֹיִם בְּאִמְרֵי פִי וּבַעֲלִילוֹת יָדָי׃ 19 בִּגְבוּרַת הָאֹתוֹת וְהַמֹּפְתִים בְּעֹז רוּחַ אֱלֹהִים עַד אֲשֶׁר מָלְאָה הָאָרֶץ בְּשׂרַת הַמָּשִׁיחַ מִירוּשָׁלַיִם וּסְבִיבוֹתֶיהָ עַד אִלּוּרִיקוֹן׃ 20 וְכֵן שַׂמְתִּי מְגַמַּת פָּנַי לְבַשֵּׂר אַךְ בִּמְקֹמוֹת אֲשֶׁר שֵׁם הַמָּשִׁיחַ עוֹד לֹא נִקְרָא שָׁם לְבִלְתִּי אֶבְנֶה עַל-יְסוֹד אֲחֵרִים׃ 21 כִּי אִם-כַּכָּתוּב אֲשֶׁר לֹא-סֻפַּר לָהֶם רָאוּ וַאֲשֶׁר לֹא-שָׁמְעוּ הִתְבּוֹנָנוּ׃ 22 וַאֲשֶׁר לָזֹאת נֶעֱצַרְתִּי זְמַן רָב מִבּוֹא אֲלֵיכֶם׃ 23 אֲבָל עַתָּה אַחֲרֵי אֲשֶׁר אֵין-לִי עוֹד מָקוֹם בַּגְּלִילוֹת הָאֵלֶּה וּתְשׁוּקָתִי גְדוֹלָה לָבוֹא אֲלֵיכֶם זֶה שָׁנִים רַבּוֹת׃ 24 אָבוֹא אֲלֵיכֶם בְּלֶכְתִּי לִסְפָרַד כִּי מְקַוֶּה אֲנִי לִרְאוֹתְכֶם בְּעָבְרִי לִשְׂבֹּעַ שְׂמָחוֹת אֶת-פְּנֵיכֶם לִמְעָט אַחַר תְּשַׁלְּחוּנִי לְדַרְכִּי׃ 25 אֶפֶס כַּיּוֹם הִנְנִי הֹלֵךְ יְרוּשָׁלָיְמָה לְהָבִיא שָׁם מִחְיָה לַקְּדוֹשִׁים׃ 26 כִּי-יָשָׁר הַדָּבָר בְּעֵינֵי הַמַּקְּדוֹנִים וְהָאֲכַיִּים לְהָרִים מַשְׂאַת נְדָבָה אֶל-אֶבְיוֹנֵי יְרוּשָׁלַיִם הַקְּדוֹשִׁים׃ 27 וְהַדָּבָר הַזֶּה יָשָׁר בְּעֵינֵיהֶם וְגַם-חוֹב הֵם מְשִׁיבִים לָהֶם כִּי אִם-הַגּוֹיִם נֹאחֲזוּ בְנַחֲלָתָם כַּחֲבֵרִים בְּחַיֵּי הָרוּחַ הֲלֹא גַּם-עֲלֵיהֶם לְהַחֲיֹתָם בְּחַיֵּי בְשָׂרִים׃ 28 וְכַאֲשֶׁר אֲכַלֶּה אֶת-הַדָּבָר וְהַפְּרִי הַזֶּה יִהְיֶה בְיָדָם אֶל-נָכוֹן אֶעְבְּרָה דֶּרֶךְ עֲלֵיכֶם לִסְפָרַד׃ 29 וּכְבֹאִי אֲלֵיכֶם יָדַעְתִּי כִּי-בִמְלֹא בִּרְכָתָה שֶׁל-בְּשׂוֹרַת-הַמָּשִׁיחַ אָבֹאָה׃ 30 וַאֲנִי מִתְחַנֵּן אֲלֵיכֶם אַחַי בְּיֵשׁוּעַ הַמָּשִׁיחַ אֲדֹנֵינוּ וּבְאַהֲבַתְכֶם הַנְּתוּנָה לָכֶם מֵרוּחַ הַקֹּדֶשׁ לְהִתְאַמֵּץ וּלְהִתְפַּלֵּל אִתִּי אֶל-אֱלֹהִים בְּעַד נַפְשִׁי׃ 31 כִּי יְמַלְּטֵנִי מִיַּד הַמַּמְרִים בְּאֶרֶץ יְהוּדָה וְיִתְּנֵנִי לִגְמֹר עֲבֹדָתִי לְרָצוֹן לַקְּדוֹשִׁים בִּירוּשָׁלָיִם׃ 32 וְלָבֹא אֲלֵיכֶם בְּלֵב שָׂמֵחַ בִּרְצוֹן אֱלֹהִים לְהִנָּפֵשׁ שָׁם עִמָּכֶם׃ 33 וֵאלֹהֵי הַשָּׁלוֹם יִהְיֶה עִם-כֻּלְּכֶם אָמֵן׃

טז    1 וְהִנְנִי מַפְגִּיעַ בְּעַד אֲחֹתֵנוּ הַבָּאָה לִפְנֵיכֶם הִיא פוֹיבֶּה מְשָׁרַת אֶת-הָעֵדָה בְּקַנְכְּרָי׃ 2 אָנָּא קַבְּלוּהָ-נָּא בַּאֲדֹנֵינוּ כְּמִשְׁפָּט לְאַנְשֵׁי קֹדֶשׁ וְתִמְכוּהָ בְּכָל-דָּבָר אֲשֶׁר תֶּחְסַר עִמְּכֶם כִּי גַּם-הִיא תָמְכָה בְיָדִי וּבִידֵי רַבִּים זוּלָתִי׃ 3 שַׁאֲלוּ לִשְׁלוֹם פְּרִיסְקִלָּא וַעֲקִילָס חֲבֵרַי בַּעֲבֹדַת יֵשׁוּעַ הַמָּשִׁיחַ׃ 4 אֲשֶׁר נָתְנוּ צַוָּארָם בְּעַד נַפְשִׁי וְלֹא-אֲנִי לְבַדִּי מַכִּיר טוֹבָתָם כִּי אִם-גַּם כָּל-קְהִילּוֹת הַגּוֹיִם׃ 5 וְגַם אֶל-הָעֵדָה בְּבֵיתָם תִּשְׁאֲלוּ לְשָׁלוֹם שָׁאֲלוּ לִשְׁלוֹם אַפֵּינְטוֹס יְדִידִי הֲלֹא הוּא רֵאשִׁית פְּרִי אַסְיָא לַמָּשִׁיחַ׃ 6 שַׁאֲלוּ לִשְׁלוֹם מִרְיָם אֲשֶׁר עָמְלָה לָכֶם עָמָל רָב׃ 7 שַׁאֲלוּ לִשְׁלוֹם אַנְדְּרוֹנִיקוֹס וְיוּנְיָס קְרֹבָי אֲשֶׁר נֶאֶסְרוּ אִתִּי בַּמִּשְׁמָר וְגַם-יָצָא שִׁמְעָם בֵּין הַשְּׁלִיחִים וְהֵם דָּבְקוּ לְפָנַי בִּמְשִׁיחֵנוּ׃ 8 שַׁאֲלוּ לִשְׁלוֹם אַמְפְּלִיאָס יְדִידִי בַּאדֹנֵינוּ׃ 9 שַׁאֲלוּ לִשְׁלוֹם אוּרְבָנוֹס חֲבֵרֵנוּ בַּעֲבֹדַת הַמָּשִׁיחַ וְלִשְׁלוֹם סְטַכִּיס יְדִידִי׃ 10 שַׁאֲלוּ לִשְׁלוֹם אַפַּלִּיס הַנֶּאֱמָן בַּמָּשִׁיחַ שַׁאֲלוּ לִשְׁלוֹם בְּנֵי בֵית אֲרִיסְטוֹבְלוֹס׃ 11 שַׁאֲלוּ לִשְׁלוֹם הֹרוֹדִיּוֹן קְרֹבִי שַׁאֲלוּ לִשְׁלוֹם בְּנֵי בֵית נַרְקִיסוֹס הַדְּבֵקִים בַּאדֹנֵינוּ׃ 12 שַׁאֲלוּ לִשְׁלוֹם טְרוּפֵינָה וּטְרוּפָסָה הָעֹשׂוֹת מַעֲשֵׂיהֶן בַּאדֹנֵינוּ שַׁאֲלוּ לִשְׁלוֹם פַּרְסִיס הָאֲהוּבָה אֲשֶׁר הִרְבְּתָה פְעָלֶיהָ בַּאדֹנֵינוּ׃ 13 שַׁאֲלוּ לִשְׁלוֹם רוּפוֹס בְּחִיר אֲדֹנֵינוּ וְלִשְׁלוֹם אִמּוֹ כְּאֵם לִי׃ 14 שַׁאֲלוּ לִשְׁלוֹם אֲסוּנְקְרִיטוֹס פְּלֵיגוֹן הֶרְמָס פַּטְרוֹבָס וְהֶרְמִיס וְהָאַחִים אֲשֶׁר עִמָּהֶם׃ 15 שַׁאֲלוּ לִשְׁלוֹם פִּילוֹלוֹגוֹס וְיוּלְיָא נִירְוַס וַאֲחוֹתוֹ וְאוֹלוּמְפָּס וְכָל-הַקְּדוֹשִׁים אֲשֶׁר אִתָּם׃ 16 שַׁאֲלוּ אִישׁ לְרֵעֵהוּ לְשָׁלוֹם בִּנְשִׁיקַת הַקֹּדֶשׁ כָּל-קְהִילּוֹת מְשִׁיחֵנוּ דֹּרְשׁוֹת לְשָׁלוֹם לָכֶם׃ 17 וַאֲנִי מַזְהִיר אֶתְכֶם אַחַי הִשָּׁמְרוּ לָכֶם מִמְּשַׁלְּחֵי מְדָנִים וּמוֹקְשִׁים לַהֲפֹךְ אֶת-הַלֶּקַח אֲשֶׁר לְמַדְתֶּם סוּרוּ-נָא מֵעֲלֵיהֶם׃ 18 כִּי אֲנָשִׁים כָּאֵלֶּה לֹא יַעַבְדוּ אֶת-אֲדֹנֵינוּ יֵשׁוּעַ הַמָּשִׁיחַ כִּי אִם-אֶת-כְּרֵשָׂם וּבִשְׂפַת חֲלָקוֹת וַחֲלַקְלַקּוֹת יַדִּיחוּ אֶת-לִבּוֹת הַתְּמִימִים׃ 19 וְנוֹדַע לַכֹּל כִּי-יֵשׁ לָכֶם לֵב שֹׁמֵעַ וְעַל-כֵּן שָׂשׂ אֲנִי עֲלֵיכֶם אַךְ חָפַצְתִּי כִּי תִהְיוּ חֲכָמִים לַעֲשׂוֹת טוֹב וּתְמִימִים מֵעֲשׂוֹת רָעָה׃ 20 וֵאלֹהֵי הַשָּׁלוֹם יְדַכֵּא אֶת-הַשָּׂטָן כֹּה מַהֵר תַּחַת רַגְלֵיכֶם חֶסֶד יֵשׁוּעַ הַמָּשִׁיחַ אֲדֹנֵינוּ יִהְיֶה עִמָּכֶם׃ 21 טִימוֹתִיּוֹס חֲבֵרִי וְלוּקְיוֹס וְיָסוֹן וְסוֹסְפַּטְרוֹס קְרוֹבַי דֹּרְשִׁים לִשְׁלוֹמְכֶם׃ 22 וַאֲנִי טַרְטִיּוֹס סֹפֵר הָאִגֶּרֶת הַזֹּאת שֹׁאֵל לִשְׁלוֹמְכֶם בַּאדֹנֵינוּ׃ 23 גָּיּוֹס בַּעַל הַמָּלוֹן-לִי וּלְכָל-הָקָּהָל דֹּרֵשׁ לִשְׁלוֹמְכֶם אֲרַסְטוֹס סֹכֵן הָעִיר וּקְוַרְטוֹס אָחִינוּ שֹׁאֲלִים לִשְׁלוֹמְכֶם׃ 24 חֶסֶד אֲדוֹנֵינוּ יֵשׁוּעַ הַמָּשִׁיחַ עִם-כֻּלְכֶם אָמֵן׃ 25 וְהוּא אֲשֶׁר הַכֹּחַ בְּיָדוֹ לְכוֹנֵן אֶתְכֶם כִּבְשׂרָתִי הִיא בְשׂרַת יֵשׁוּעַ הַמָּשִׁיחַ כְּפִי הִתְגַּלּוּת הַסּוֹד אֲשֶׁר הָיָה כָמֻס מִימֵי קֶדֶם׃ 26 וַאֲשֶׁר נִגְלָה כַיּוֹם עַל-פִּי כִתְבֵי הַנְבִיאִים בִּפְקֻדַּת אֱלֹהֵי עוֹלָם וְהֻגַּד לְכָל-הַגּוֹיִם לְהַטּוֹת אֶת-לִבָּם אֶל-אֱמוּנָתוֹ׃ 27 הוּא אֵל דֵּעוֹת לְבַדּוֹ וְלוֹ הַכָּבוֹד בְּיֵשׁוּעַ הַמָּשִׁיחַ לְעוֹלָם וָעֶד אָמֵן׃


Index              Poster