חִזָּיוֹן

א    1 הַחִזָּיוֹן לְיֵשׁוּעַ הַמָּשִׁיחַ אֲשֶׁר נָתַן-לוֹ הָאֱלֹהִים לְהַרְאוֹת אֶת-עֲבָדָיו אֵת אֲשֶׁר-תִּקְרֶינָה אֶל-נָכוֹן בְּקֶרֶב הַיָּמִים וַיִּשְׁלַח בְּיַד-מַלְאָכוֹ וַיּוֹרֶה לְעַבְדּוֹ לְיוֹחָנָן׃ 2 הוּא אֲשֶׁר הִגִּיד אֶת-דְּבַר הָאֱלֹהִים וְאֶת-עֵדוּת יֵשׁוּעַ הַמָּשִׁיחַ כְּכֹל אֲשֶׁר רָאָה׃ 3 אַשְׁרֵי הַקֹּרֵא אֶת-דִּבְרֵי הַנְּבוּאָה הַזֹּאת וְאַשְׁרֵי שֹׁמְעֶיהָ הַשֹּׁמְרִים כְּכָל-הַכָּתוּב פֹּה כִּי קָרוֹב הַיּוֹם׃ 4 יוֹחָנָן אֶל-שֶׁבַע הַקְּהִילּוֹת אֲשֶׁר בְּאַסְיָא חֶסֶד לָכֶם וְשָׁלוֹם מֵאִתּוֹ אֲשֶׁר הוּא הוֶֹה הָיָה וָבָא וּמֵאֵת שִׁבְעַת הָרוּחוֹת הָעֹמְדִים לִפְנֵי כִסְאוֹ׃ 5 וּמֵאֵת יֵשׁוּעַ הַמָּשִׁיחַ הָעֵד הַנֶּאֱמָן הַבְּכוֹר הַקָּם מִן-הַמֵּתִים וְעֶלְיוֹן לְמַלְכֵי-אָרֶץ אֲשֶׁר אָהַב אֹתָנוּ וּבְדָמוֹ רְחָצָנוּ מֵחַטֹּאתֵינוּ׃ 6 וַיַעַשׂ אֹתָנוּ לְמַמְלֶכֶת כֹּהֲנִים לֵאלֹהִים אָבִיו אֲשֶׁר לוֹ הַתִּפְאֶרֶת וְהַנֶּצָח עַד-עוֹלְמֵי עוֹלָמִים אָמֵן׃ 7 הִנֵּה בָא עִם-עֲנָנִים וְרָאֲתָה אֹתוֹ כָּל-עַיִן וְעֵינֵי אֲשֶׁר דָּקְרוּ אֹתוֹ וְסָפְדוּ עָלָיו כָּל-מִשְׁפְּחוֹת הָאֲדָמָה אָמֵן אָמֵן׃ 8 אָנֹכִי אָלֶף וְתָו רֹאשׁ וָסוֹף נְאֻם-יְהוָֹה אֱלֹהִים אֲשֶׁר הוּא הוֶֹה הָיָה וָבָא אֱלֹהֵי צְבָאוֹת׃ 9 אֲנִי יוֹחָנָן אֲחִיכֶם הַלֹּקֵחַ חֵלֶק בְּחֶבְלֵי יֵשׁוּעַ הַמָּשִׁיחַ בְּמַלְכוּתוֹ וּבְתוֹחַלְתּוֹ הָיִיתִי בָּאִי הַנִּקְרָא פַּטְמוֹס עַל-דְּבַר הָאֱלֹהים וְעַל-עֵדוּת יֵשׁוּעַ הַמָּשִׁיחַ׃ 10 וַתָּנַח עָלַי הָרוּחַ בְּיוֹם הָאָדוֹן וָאֶשְׁמַע אַחֲרַי קוֹל גָּדוֹל כְּקוֹל שׁוֹפָר לֵאמֹר׃ 11 אֲנִי הָאָלֶף וְהַתָּו הָרִאשׁוֹן וְהָאַחֲרוֹן וְאֵת אֲשֶׁר אַתָּה רֹאֶה כְּתֹב בַּסֵּפֶר וּשְׁלַח אֶל-שֶׁבַע הַקְּהִלּוֹת אֲשֶׁר בְּאַסְיָא אֶל-אֶפְסוֹס שְׂמִירְנָא פַּרְגְּמוֹס תִּיאֲטִירָא סַרְדִּיס פִּילָדֶלְפִיָּא וְאֶל-לוּדְקְיָא׃ 12 וָאֵפֶן לִרְאוֹת אֶת-הַקּוֹל הַמְדַבֵּר אֵלָי וַיְהִי בְהַפְנֹתִי שִׁכְמִי וָאֵרֶא שֶׁבַע מְנֹרוֹת זָהָב׃ 13 וּבְתוֹךְ הַמְּנֹרוֹת כְּמַרְאֵה בֶן-אָדָם עֹטֶה מְעִיל מַגִּיע עַד-מַרְגְּלֹתָיו וְאֵזוֹר זָהָב אָזוּר בְּמָתְנָיו׃ 14 וּשְׂעַר רֹאשׁוֹ כְּצֶמֶר נָקִי לָבָן כַּשָּׁלֶג וְעֵינָיו כְּלַבּוֹת אֵשׁ׃ 15 וְרַגְלָיו כְּעֵין נְחשֶׁת קָלָל צָרוּף בְּתוֹךְ הַכִּבְשָׁן וְקוֹלוֹ כְּקוֹל מַיִם רַבִּים׃ 16 וְלוֹ שִׁבְעָה כוֹכָבִים עַל-יַד יְמִינוֹ מִפִּיו יֹצֵאת חֶרֶב פִּיפִיּוֹת חָדָּה וּפָנָיו כִּבְרַק הַשֶּׁמֶשׁ בִּגְבֻרַתוֹ׃ 17 וַיְהִי בִּרְאֹתִי אֹתוֹ וָאֶפֹּל לְרַגְלָיו כַּמֵּת וַיָּשֶׁת אֶת-יַד יְמִינוֹ עָלַי וַיֹּאמַר אֵלַי אַל-תִּירָא אֲנִי רִאשׁוֹן וַאֲנִי אַחֲרוֹן׃ 18 וַאֲנִי הוּא הַחַי אֲשֶׁר הָיִיתִי מֵת וְהִנֵּה אֲנִי חַי לְעוֹלָם וָעֶד וּמַפְתְּחוֹת הַמָּוֶת וְהַשְּׁאוֹל בְּיָדִי הֵמָּה׃ 19 וְאַתָּה כְּתֹב אֵת אֲשֶׁר רָאִיתָ אֶת-הַדְּבָרִים אֲשֶׁר לְפָנֶיךָ וְאֶת-הָאֹתִיּוֹת לְאָחוֹר׃ 20 אֶת-סוֹד שִׁבְעַת הַכּוֹכָבִים אֲשֶׁר רָאִיתָ עַל-יְמִינִי וְאֶת-שֶׁבַע מְנֹרוֹת הַזָּהָב שִׁבְעַת הַכּוֹכָבִים מַלְאֲכֵי שֶׁבַע קְהִלּוֹת הֵמָּה וְשֶׁבַע הַמְּנֹרוֹת אֲשֶׁר רָאִיתָ שֶׁבַע קְהִלּוֹת הֵנָּה׃

ב    1 אֶל-מַלְאַךְ הַקָּהָל בְּאֶפְסוֹס כְּתֹב כֹּה אָמַר הָאֹחֵז שִׁבְעָה כוֹכָבִים בִּימִינוֹ הַמִּתְהַלֵּךְ בְּתוֹךְ שֶׁבַע מְנֹרוֹת זָהָב׃ 2 יָדַעְתִּי אֶת-מַעֲשֶׂיךָ אֶת-עֲמָלְךָ וְאֶת-עֹצֶר רוּחֶךָ וְכִי לֹא-תוּכַל שְׂאֵת אַנְשֵׁי-אָוֶן וַתִּבְחַן אֶת-הָאֹמְרִים כִּי שְׁלִיחִים הֵם וְאֵינָם כֵּן כִּי-מָצָאתָ אֹתָם כֹּזְבִים׃ 3 וְאַתָּה בְּעֹצֶר רוּחֲךָ סָבַלְתָּ הַרְבֵּה לְמַעַן שְׁמִי וְלֹא עָיְפָה נַפְשְׁךָ׃ 4 אֶפֶס דָּבָר לִי אֵלֶיךָ כִּי-אֶת-אַהֲבָתְךָ הָרִאשֹׁנָה עָזָבְתָּ׃ 5 זְכָר-נָא אֵפוֹא מֵאַיִן נָפַלְתָּ שׁוּבָה אֵלַי וַעֲשֵׂה כְמַעֲשֶׂיךָ הָרִאשֹׁנִים וְאִם לֹא תֹאבֶה וְלֹא תָשׁוּב אָבוֹא אֵלֶיךָ וְהָדַפְתִּי מְנֹרָתְךָ מִמַּצָּבָהּ׃ 6 אֲבָל דָּבָר טוֹב נִמְצָא בְךָ כִּי תְתַעֵב אֶת-פָּעֳלֵי הַנִּקְלָסִיִּים אֲשֶׁר גַּם-אָנֹכִי מְתָעֵב אֹתָם׃ 7 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת לַמְנַצֵּחַ אֶתֵּן לֶאֱכֹל מֵעֵץ הַחַיִּים אֲשֶׁר בְּגַן הָאֱלֹהִים׃ 8 וְאֶל-מַלְאַךְ הַקָּהָל בִּשְׂמִירְנָא כְּתֹב כֹּה אָמַר הָרִאשׁוֹן וְהָאַחֲרוֹן אֲשֶׁר-מֵת וָחָי׃ 9 יָדַעְתִּי אֶת-מַעֲשֶׂיךָ וְאֶת-צָרָתְךָ וְאֶת-רֵישְׁךָ אַף כִּי עָשִׁיר אַתָּה וְאֶת-הַגִּדּוּפִים מִפִּי הָאֹמְרִים כִּי יְהוּדִים הֵם וְאֵינָם כֵּן כִּי אִם-הֵם בֵּית-הַכְּנֵסֶת לַשָּׂטָן׃ 10 אַל-תִּירָא מִפְּנֵי הַצָּרָה הַבָּאָה עָלֶיךָ הִנֵּה הַשּׂוֹטֵן יִתֵּן אֲנָשִׁים מִכֶּם אֶל-בֵּית הַסֹּהַר לְמַעַן תִּבָּחֵנוּ וְעָבְרָה עֲלֵיכֶם צָרָה עֲשֶׂרֶת יָמִים הֱיֵה נֶאֱמָן עַד-הַמָּוֶת וְנָתַתִּי לְךָ עֲטֶרֶת הַחַיִּים׃ 11 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת הַמְנַצֵּחַ לֹא יִפְגַּע בּוֹ הַמָּוֶת הַשֵּׁנִי׃ 12 וְאֶל-מַלְאַךָ הַקָּהָל בְּפַרְגְּמוֹס כְּתֹב כֹּה אָמַר הַהוּא אֲשֶׁר-לוֹ חֶרֶב פִּיפִיּוֹת חַדָּה׃ 13 יָדַעְתִּי אֶת-מַעֲשֶׂיךָ וְאֶת-מְקוֹם שִׁבְתְּךָ מְקוֹם כִּסֵּא הַשָּׂטָן וְאַתָּה דָבַקְתָּ בִשְׁמִי וְלֹא שִׁקַּרְתָּ בֶּאֱמוּנָתִי גַּם-בַּיָּמִים אֲשֶׁר הוּמַת בָּכֶם אַנְטִיפַּס עֵד נֶאֱמָן לִי בִּמְקוֹם מוֹשַׁב הַשָּׂטָן׃ 14 אֶפֶס שֶׁמֶץ דָּבָר מָצָאתִי בָךָ כִּי-נִמְצְאוּ בְךָ אֲנָשִׁים דְּבֵקִים בְּתוֹרַת בִּלְעָם אֲשֶׁר הוֹרָה לְבָלָק לָתֵת מִכְשׁוֹל לִפְנֵי בְנֵי יִשְׂרָאֵל לֶאֱכֹל מִזִּבְחֵי אֱלִילִים וְלִזְנוֹת׃ 15 וְכֵן נִמְצְאוּ גַם-בְּךָ אֲנָשִׁים דְּבֵקִים בְּתוֹרַת הַנִּיקְלָסִיִּים אֲשֶׁר שָׂנֵאתִי׃ 16 שׁוֹבָה-נָּא אֵפוֹא וְאִם לֹא תָשׁוּב אָבוֹא עָלֶיךָ מְהֵרָה וְנִלְחַמְתִּי-בָם בְּחֶרֶב-פִּי׃ 17 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת לַמְנַצֵּחַ אֶתֵּן מִן-הַמָּן הַשָּׁמוּר וְנָתַתִּי לוֹ אֶבֶן לְבָנָה וְעַל-הָאֶבֶן חָקוּק שֵׁם חָדָשׁ אֲשֶׁר אִישׁ לֹא יִקֳּבֶנוּ בִּלְתִּי הַמְקַבֵּל׃ 18 וְאֶל-מַלְאַךְ הַקָּהָל בְּתִיאֲטִירָא כְּתֹב כֹּה אָמַר בֶּן-הָאֱלֹהִים אֲשֶׁר עֵינָיו כְּלַבּוֹת אֵשׁ וּמַרְגְּלֹתָיו כְּעֵין-נְחשֶׁת קָלָל׃ 19 יָדַעְתִּי אֶת-מַעֲשֶׂיךָ אֶת-אַהֲבָתְךָ אֶת-אֱמוּנָתְךָ אֶת-עֲבֹדָתְךָ וְאֶת-עֹצֶר רוּחֶךָ וְכִי רַבּוּ מַעֲשֶׂיךָ הָאַחֲרוֹנִים מִן-הָרִאשֹׁנִים׃ 20 אֶפֶס דָּבָר לִי אֵלֶיךָ כִּי הוֹשַׁבְתָּ עִמְּךָ אֶת-אִיזֶבֶל הָאִשָּׁה הָאֹמֶרֶת כִּי-נְבִיאָה הִיא לְלַמֵּד אֶת-עֲבָדַי וּלְפַתֹּתָם לִזְנוֹת וְלֶאֱכֹל מִזִּבְחֵי אֱלִילִים׃ 21 וַאֲנִי נָתַתִּי לָהּ זְמָן לָשׁוּב וְהִיא לֹא שָׁבָה מִתַּזְנוּתֶיהָ׃ 22 הִנֵּה אֲנִי מַטִּיל אֹתָהּ אֶל-הַמִּטָּה וְנֹאֲפֶיהָ עִמָּהּ בְּצָרָה גְדוֹלָה אִם-לֹא יְשׁוּבוּן מִמַּעֲשֵׂיהֶם׃ 23 וְאֶת-בָּנֶיהָ אַכֶּה בַדָּבֶר וְיָדְעוּ כָל-הַקְּהִלּוֹת כִּי אֲנִי הוּא בֹחֵן כְּלָיוֹת וָלֵב וּלְאִישׁ אִישׁ מִכֶּם כְּמַעֲלָלָיו אָשִׁיב לוֹ׃ 24 וְאַתֶּם הַנִּשְׁאָרִים בְּתִיאֲטִירָא כָּל-אֲשֶׁר לֹא נָטוּ יָדָם עִם-הַלִּמּוּדִים הָהֵם וְלֹא יָרְדוּ לְעֹמֶק מֶחְקְרֵי הַשָּׂטָן כַּאֲשֶׁר זֶה לְשׁוֹנָם בְּפִיהֶם אֲלֵיכֶם הִנְנִי מְדַבֵּר כִּי לֹא-אָשִׂים עֲלֵיכֶם עֹל אַחֵר׃ 25 בִּלְתִּי כִי-תִשְׁמְרוּן אֵת אֲשֶׁר קִבַּלְתֶּם עֲלֵיכֶם לִשְׁמֹר עַד כִּי אָבוֹא׃ 26 הַמְנַצֵּחַ הַשֹּׁמֵר אֶת-מִצְוֹתַי עַד-הַקֵּץ אֶתֶּן-לוֹ מֶמְשָׁלָה עַל-הַגּוֹיִם׃ 27 וְהוּא יְרֹעֵם בְּשֵׁבֶט בַּרְזֵל וְכִכְלִי יוֹצֵר יְנַפְּצֵם כַּאֲשֶׁר דִבֶּר לִי אָבִי גַּם-אָנִי׃ 28 וְנָתַתִּי לוֹ אֶת-כּוֹכַב הַשָּׁחַר׃ 29 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃

ג    1 וְאֶל-מַלְאַךְ הַקָּהָל בְּסַרְדִּיס כְּתֹב כֹּה אָמַר הַהוּא אֲשֶׁר-לוֹ שִׁבְעָה רוּחוֹת הָאֱלֹהִים וְשִׁבְעָה כוֹכָבִים יָדַעְתִּי אֶת-מַעֲשֶׂיךָ כִּי-לְךָ שֵׁם אֲשֶׁר אַתָּה חַי וְהִנְּךָ מֵת׃ 2 הִתְעוֹרֶר-נָא וְחַזֵּק אֶת-הַשְּׁאֵרִית הַנִּמְצָאָה הַקְּרֹבָה לַמָּוֶת כִּי לֹא-מָצָאתִי אֶת-מַעֲשֶׂיךָ שְׁלֵמִים לִפְנֵי אֱלֹהָי׃ 3 זְכֹר אֵפוֹא מַה-לָּמַדְתָּ וּמַה שָּׁמַעְתָּ וּשְׁמֹר כָּל-אֵלֶּה וְשׁוּבָה אֵלָי וְאִם-לֹא תָחוּשׁ לְהִתְעוֹרֵר אָבוֹא כְגַנָּב וְלֹא תֵדַע בְּאֵי-זוּ שָׁעָה אֲנִי בָא עָלֶיךָ׃ 4 יֶשׁ-לְךָ שְׁמוֹת מְעַטִּים גַם-בְּסַרְדִּיס אֲשֶׁר לֹא טִמְּאוּ אֶת-בִּגְדֵיהֶם הֵם יִתְהַלְּכוּן עִמִּי בִּבְגָדִים לְבָנִים כִּי לָהֶם יָאָתָה׃ 5 הַמְנַצֵּחַ הוּא יִלְבַּשׁ לְבָנִים וְלֹא אֶמְחֶה אֶת-שְׁמוֹ מִסֵּפֶר הַחַיִּים כִּי אֶת-שְׁמוֹ אוֹדֶה לִפְנֵי אָבִי וְלִפְנֵי מַלְאָכָיו׃ 6 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃ 7 וְאֶל-מַלְאַךְ הַקָּהָל בְּפִילָדֶלְפִיָּא כְּתֹב כֹּה אָמַר הַקָּדוֹשׁ הַנֶּאֱמָן אֲשֶׁר בְּיָדוֹ מַפְתֵּחַ דָּוִד הַפֹּתֵחַ וְאֵין סֹגֵר וְהַסֹּגֵר וְאֵין פֹּתֵחַ׃ 8 יָדַעְתִּי אֶת-מַעֲשֶׂיךָ הִנֵּה נָתַתִּי לְפָנֶיךָ שַׁעַר פָּתוּחַ אֲשֶׁר-לֹא-יוּכַל אִישׁ לְסָגְרוֹ כִּי יֶשׁ-לְךָ כֹחַ מְעַט וַתִּשְׁמֹר אֶת-דְּבָרִי וְלֹא שִׁקַּרְתָּ בִּשְׁמִי׃ 9 הִנְנִי נֹתֵן אֶת-אֵלֶּה מִבֵּית-הַכְּנֵסֶת אֲשֶׁר לַשָּׂטָן הָאֹמְרִים כִּי יְהוּדִים הֵם וְאֵינָם כֵּן כִּי אִם-כֹּזְבִים הִנְנִי נֹתְנָם לְפָנֶיךָ כִּי יָבֹאוּ וְיִשְׁתַּחֲווּ עַל-כַּפּוֹת רַגְלֶיךָ וְיָדְעוּ כִּי אֲנִי אֲהַבְתִּיךָ׃ 10 יַעַן שָׁמַרְתָּ אֶת-דְּבָרִי בְּעֹצֶר רוּחַ וְגַם-אֲנִי אֶשְׁמָרְךָ בְּיוֹם מַסָּה הַבָּא עַל-תֵּבֵל כֻּלָּהּ לְנַסּוֹת אֶת-ישְׁבֵי הָאָרֶץ׃ 11 הִנְנִי בָא מְהֵרָה שְׁמֹר אֵת אֲשֶׁר לְךָ פֶּן-יִקַּח אִישׁ מִמְּךָ אֶת-כִּתְרֶךָ׃ 12 הַמְנַצֵּחַ אֶתְּנֶנּוּ לְעַמּוּד בְּהֵיכַל אֱלֹהַי וְלֹא-יֶעְתַּק עוֹד מִמְּקוֹמוֹ הַחוּצָה וְכָתַבְתִּי עָלָיו אֶת-שֵׁם אֱלֹהַי וְאֶת-שֵׁם עִיר אֱלֹהָי הֲלֹא הִיא יְרוּשָׁלַיִם הַחֲדָשָׁה הַיֹּרֶדֶת מֵאֵת אֱלֹהַי מִן-הַשָּׁמַיִם וְאֶת-שְׁמִי הֶחָדָשׁ׃ 13 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃ 14 וְאֶל-מַלְאַךְ הַקָּהָל בְּלוּדְקְיָא כְּתֹב כֹּה אָמַר הָאָמֵן עֵד הָאֱמֶת וְהַצֶּדֶק וְרֵאשִׁית בְּרִיאַת הָאֱלֹהִים׃ 15 יָדַעְתִּי אֶת-מַעֲשֶׂיךָ כִּי לֹא קַר וְלֹא חַם אָתָּה מִי-יִתֵּן וְהָיִיתָ קַר אוֹ-חָם׃ 16 אַךְ יַעַן כִּי נֹטֶה אַתָּה מִשְּׁנֵיהֶם לֹא חַם וְלֹא קַר אָקִיא אֹתְךָ מִפִּי׃ 17 וְאַתָּה אָמַרְתָּ הֵן הֶעְשַׁרְתִּי וְכַבִּיר מָצְאָה יָדִי וְלֹא אֶחְסַר דָּבָר וְלֹא יָדַעְתָּ כִּי-נִדְכֶּה וְאֻמְלָל אַתָּה עָנִי עִוֵּר וְעֵרֹם׃ 18 אִיעָצְךָ לִקְנוֹת מִיָּדִי זָהָב צָרוּף בָּאֵשׁ וְתֶעְשַׁר וּבְגָדִים לְבָנִים אֲשֶׁר תִּלְבַּשׁ וּבשֶׁת עֶרְוָתְךָ לֹא תִגָּלֶה וְשֶׁמֶן מַרְפֵּא לִמְשֹׁחַ עֵינֶיךָ לְמַעַן תִּרְאֶה׃ 19 כָּל-אִישׁ אֲשֶׁר אֲנִי אֹהֵב אוֹכִיחֶנּוּ וַאֲיַסְּרֶנּוּ עַל-כֵּן הִתְאַמֶּץ-נָא וְשׁוּבָה אֵלָי׃ 20 הִנֵּה אֲנִי עֹמֵד לַפֶּתַח וְדֹפֵק אִישׁ כִּי יִשְׁמַע אֶת-קוֹלִי וּפָתַח אֶת-הַדֶּלֶת אָבֹא לֶאֱכֹל עִמּוֹ וְהוּא עִמָּדִי׃ 21 הַמְנַצֵּחַ אֶתֶּן-לוֹ לָשֶׁבֶת עִמִּי עַל-כִּסְאִי כַּאֲשֶׁר גַּם-אָנֹכִי נִצַּחְתִּי וְיָשַׁבְתִּי עִם-אָבִי עַל-כִּסְאוֹ׃ 22 מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃

ד    1 אַחַר הַדְּבָרִים הָאֵלֶּה רָאִיתִי וְהִנֵּה שַׁעַר נִפְתָּח בַּשָּׁמָיִם וְהַקּוֹל הָרִאשׁוֹן אֲשֶׁר שָׁמַעְתִּי כַשּׁוֹפָר מְדַבֵּר אֵלַי לֵאמֹר עֲלֵה הֵנָּה וְהֶרְאֵתִיךָ אֵת אֲשֶׁר תִּקְרֶינָה אַחֲרֵי-כֵן׃ 2 וַתָּנַח עָלַי הָרוּחַ כְּרָגַע וְהִנֵּה כִסֵּא נִצָּב בַּשָּׁמַיִם וְאֶחָד ישֵׁב עַל-הַכִּסֵּא׃ 3 וְהַיּשֵׁב הַהוּא כְּמַרְאֵה אֶבֶן יָשְׁפֶה כְּאֶבֶן אֹדֶם וְקֶשֶׁת סָבִיב לַכִּסֵּא כְּעֵין בָּרָקֶת׃ 4 וְעֶשְׂרִים וְאַרְבָּעָה כִסְאוֹת עֹמְדִים אֶל-הַכִּסֵּא מִסָּבִיב וְעַל-הַכִּסְאוֹת רָאִיתִי עֶשְׂרִים וְאַרְבָּעָה זְקֵנִים ישְׁבִים מְלֻבָּשִׁים בְּגָדִים לְבָנִים וְעַטְרוֹת זָהָב בְּרָאשֵׁיהֶם׃ 5 וּמִתּוֹךְ הַכִּסֵּא יֹצֵא בָרָק רַעַם וְרַעַשׁ וְשִׁבְעָה לַפִּידִים בֹּעֲרִים לִפְנֵי הַכִּסֵּא אֲשֶׁר-הֵם שִׁבְעָה רוּחוֹת הָאֳלֹהִים׃ 6 וְלִפְנֵי הַכִּסֵּא יַם זְכוֹכִית כְּעֵין הַקָּרַח וּבְתוֹךְ הַכִּסֵּא וְסָבִיב לוֹ אַרְבַּע חַיּוֹת מְלֵאוֹת עֵינַיִם מִפָּנִים וּמֵאָחוֹר׃ 7 דְּמוּת הַחַיָּה הָרִאשׁוֹנָה כְּאַרְיֵה וְהַחַיָּה הַשֵּׁנִית כְּעֵגֶל וְהַחַיָּה הַשְּׁלִישִׁית פָּנִים לָהּ כִּפְנֵי אָדָם וּדְמוּת הַחַיָּה הָרְבִיעִית כְּנֶשֶׁר מְעוֹפֵף׃ 8 וְאַרְבַּע הַחַיּוֹת שֵׁשׁ כְּנָפַיִם שֵׁשׁ כְּנָפַיִם לְאֶחָת וְהֵן מְלֵאוֹת עֵינַיִם מִסָּבִיב וּמִלִּפְנִים וְהַשְׁקֵט אֵין לָהֵן יוֹמָם לָיְלָה כִּי קֹרְאוֹת קָדוֹשׁ קָדוֹשׁ קָדוֹשׁ יְהוָֹה אֱלֹהֵי צְבָאוֹת אֲשֶׁר הוּא הָיָה הוֶֹה וְעָתִיד לָבֹא׃ 9 וּלְעֵת הַחַיּוֹת נֹתְנוֹת הוֹד וְהָדָר וְשֶׁבַח לַיּשֵׁב עַל-הַכִּסֵּא אֲשֶׁר-הוּא חַי עַד-עוֹלְמֵי עוֹלָמִים׃ 10 כֵּן יִפְּלוּ הָעֶשְׂרִים וְאַרְבָּעָה הַזְּקֵנִים עַל-פְּנֵיהֶם וּמִשְׁתַּחֲוִים לִפְנֵי הַיּשֵׁב עַל-הַכִּסֵּא אֲשֶׁר הוּא חַי עַד-עוֹלְמֵי עוֹלָמִים וְאֶת-עַטְרוֹתֵיהֶם יָנִיפוּ יוֹרִידוּ אַרְצָה לִפְנֵי הַכִּסֵּא לֵאמֹר׃ 11 לְךָ יְהוָֹה אֱלֹהֵינוּ יָאֲתָה לָקַחַת הוֹד וְהָדָר וָעֹז כִּי אַתָּה בָרָאתָ כָּל-אֵלֶּה וּבִרְצוֹנְךָ נִהְיוּ וְנִבְרָאוּ׃

ה    1 וָאֵרֶא וְהִנֵּה בִּימִין הַיּשֵׁב עַל-הַכִּסֵּא סֵפֶר כָּתוּב פָּנִים וְאָחוֹר וְחָתוּם בְּשִׁבְעָה חֹתָמוֹת׃ 2 וּמַלְאָךְ אַדִּיר רָאִיתִי קֹרֵא בְקוֹל-גָּדוֹל מִי יָדָיו רַב-לוֹ לִפְתֹּחַ אֶת-הַסֵּפֶר וּלְהַתִּיר אֶת-חֹתָמָיו׃ 3 וְלֹא-נִמְצָא רַב-כֹּחַ בַּשָּׁמַיִם וּבָאָרֶץ וּמִתַּחַת לָאָרֶץ לִפְתֹּחַ אֶת-הַסֵּפֶר וְאַף לֹא-לְהַבִּיט אֵלָיו׃ 4 וַאֲנִי בָכִיתִי הַרְבֵּה בֶכֶה כִּי לֹא-נִמְצָא רַב-כֹּחַ לִפְתֹּחַ אֶת-הַסֵּפֶר וְלִקְרֹא בּוֹ אוֹ-לְהַבִּט אֵלָיו׃ 5 וַיֹּאמֶר אֵלַי אֶחָד מִן-הַזְּקֵנִים אַל-תִּבְכֶּה הִנֵּה גָבַר הָאַרְיֵה מִשֵּׁבֶט יְהוּדָה שֹׁרֶשׁ דָּוִד לִפְתֹּחַ אֶת-הַסֵּפֶר וּלְהַתִּיר שִׁבְעַת חֹתָמָיו׃ 6 וָאֵרֶא וְהִנֵּה בְּתוֹךְ הַכִּסֵּא וְאַרְבַּע הַחַיּוֹת וּבְתוֹךְ הַזְּקֵנִים עֹמֵד שֶׂה כְּמוֹ טָבוּחַ וְלוֹ שֶׁבַע קְרָנַיִם וְשִׁבְעָה עֵינַיִם אֲשֶׁר שִׁבְעָה רוּחוֹת הָאֱלֹהִי הֵמָּה מְשֹׁטְטִים בְּכָל-הָאָרֶץ׃ 7 וַיָּבֹא וַיִּקַּח אֶת-הַסֵּפֶר מִימִין הַיּשֵׁב עַל-הַכִּסֵּא׃ 8 וַיְהִי בְּקַחְתּוֹ אֶת-הַסֵּפֶר וַיִּפְּלוּ עַל-פְּנֵיהֶם אַרְבַּע הַחַיּוֹת וְעֶשְׂרִים וְאַרְבָּעָה הַזְּקֵנִים לִפְנֵי הַשֶּׂה וְכִנּוֹר בְּיַד אִישׁ אִישׁ מֵהֶם וּמַחְתּוֹת זָהָב מְלֵאוֹת קְטֹרֶת אֲשֶׁר תְּפִלּוֹת הַקְּדוֹשִׁים הֵנָּה׃ 9 וַיָּשִׁירוּ שִׁיר חָדָשׁ לֵאמֹר לְךָ נָאֲוָה לָקַחַת אֶת-הַסֵּפֶר לִפְתֹּחַ אֶת-חֹתָמָיו כִּי נִשְׁחַטְתָּ וּבְדָמְךָ קָנִיתָ עֲדָתְךָ לֵאלֹהִים מִכָּל-שֵׁבֶט וְלָשׁוֹן וּמִכָּל-עָם וָגוֹי׃ 10 וַתַּעַשׂ אֹתָם לִמְלָכִים וּלְכֹהֲנִים לִפְנֵי אֱלֹהֵינוּ לִמְלֹךְ בָּאָרֶץ׃ 11 אָז רָאִיתִי וְשָׁמַעְתִּי קוֹל מַלְאָכִים רַבִּים סָבִיב לַכִּסֵּא וְלַחַיּוֹת וְלַזְּקֵנִים וּמִסְפָּרָם רִבֹּאוֹת רְבָבוֹת וְאַלְפֵי אֲלָפִים׃ 12 וְהֵם עָנוּ בְקוֹל רָם נָאוָה לַשֶּׂה הַטָּבוּחַ לָקַחַת עֹז וְעשֶׁר וְחָכְמָה וּגְבוּרָה וְהוֹד וְהָדָר וּבְרָכָה׃ 13 וְכָל-יָצוּר אֲשֶׁר בַּשָּׁמַיִם וּבָאָרֶץ וּמִתַּחַת לָאָרֶץ וַאֲשֶׁר עַל-פְּנֵי הַיַּמִּים וְכֹל אֲשֶׁר בָּהֶם שָׁמַעְתִּי עֹנִים לֵאמֹר אֶל-הַיּשֵׁב עַל-הַכִּסֵּא וְאֶל-הַשֶּׂה הַבְּרָכָה וְהַהוֹד וְהֶהָדָר וְהַמֶּמְשָׁלָה עַד-עוֹלְמֵי עוֹלָמִים׃ 14 וְאַרְבַּע הַחַיּוֹת עָנוּ אָמֵן וְעֶשְׂרִים וְאַרְבָּעָה הַזְּקֵנִים נָפְלוּ עַל-פְּנֵיהֶם וַיִּשְׁתַּחֲווּ לְחֵי עוֹלְמֵי הָעוֹלָמִים׃

ו    1 אַחֲרֵי-כֵן רָאִיתִי אֶת-הַשֶּׂה פֹּתֵחַ אֶחָד מִן-שִׁבְעָה הַחֹתָמוֹת וְקוֹל אַחַת מִן-אַרְבַּע הַחַיּוֹת כְּקוֹל רַעַם שָׁמַעְתִּי לֵאמֹר בֹּא וּרְאֵה׃ 2 וָאֵרֶא וְהִנֵּה סוּס לָבָן וְהָרֹכֵב עָלָיו לוֹ קֶשֶׁת וַיְעַטְּרוּ-לוֹ עֲטָרָה וַיֵּצֵא כְגִבּוֹר מִלְחָמָה אֲשֶׁר יָעֹז בִּגְבֻרָתוֹ׃ 3 וְכַאֲשֶׁר פָּתַח אֶת-הַחוֹתָם הַשֵּׁנִי שָׁמַעְתִּי אֶת-הַחַיָּה הַשֵּׁנִית אֹמֶרֶת בֹּא וּרְאֵה׃ 4 וַיֵּצֵא סוּס אַחֵר אָדֹם וְהָרֹכֵב עָלָיו כֹּחַ בְּיָדוֹ לְהַעֲבִיר אֶת-הַשָּׁלוֹם מִן-הָאָרֶץ לְבַעֲבוּר יַהַרְגוּ אִישׁ אֶת-רֵעֵהוּ וְחֶרֶב גְּדֹלָה נִתְּנָה בְיָדוֹ׃ 5 וְכַאֲשֶׁר פָּתַח אֶת-הַחוֹתָם הַשְּׁלִישִׁי שָׁמַעְתִּי אֶת-קוֹל הַחַיָּה הַשְּׁלִישִׁית לֵאמֹר בֹּא וּרְאֵה וָאַבֵּט וְהִנֵּה סוּס שָׁחֹר וְהָרֹכֵב עָלָי מֹאזְנֵי מִשְׁקָל בְּיָדוֹ׃ 6 וָאֶשְׁמַע קוֹל מִתּוֹךְ אַרְבַּע הַחַיּוֹת לֵאמֹר קַב חִטִּים בְּבֶקַע כֶּסֶף וּשְׁלשָׁה קַבִּים שְׂעֹרִים בְּבֶקַע כֶּסֶף וְאֶת-הַשֶּׁמֶן וְאֶת-הַיַּיִן אַל-תַּשְׁחֵת׃ 7 וְכַאֲשֶׁר פָּתַח אֶת-הַחוֹתָם הָרְבִיעִי שָׁמַעְתִּי קוֹל הַחַיָּה הָרְבִיעִית לֵאמֹר בֹּא וּרְאֵה׃ 8 וָאֵרֶא וְהִנֵּה סוּס כְּעֵין יֵרָקוֹן וְהָרֹכֵב עָלָיו מָוֶת שְׁמוֹ וּשְׁאוֹל יֹצֵאת אַחֲרָיו וְכֹחַ נִתַּן לָהֶם לַהֲרֹג אֶת-רֹבַע הָאָרֶץ בַּחֶרֶב בָּרָעָב בַּדֶּבֶר וּבְחַיַּת הַשָּׂדֶה׃ 9 וּכְפִתְחוֹ אֶת-הַחוֹתָם הַחֲמִישִׁי וָאֵרֶא מִתַּחַת לַמִּזְבֵּחַ אֶת-נַפְשׁוֹת הַנֶּהֱרָגִים עַל-דְּבַר הָאֱלֹהִים וְעַל-אֲשֶׁר נָתְנוּ אֶת-עֵדוּתָם׃ 10 וְהֵם צֹעֲקִים בְּקוֹל גָּדוֹל עַד-מָתַי אֲדֹנָי אֵל קָדוֹשׁ אֵל אֱמֶת עַד-מָתַי לֹא-תָבֹא בַמִּשְׁפָּט וְלֹא-תִקֹּם דָּמֵנוּ הַשָּׁפוּךְ מִיּשְׁבֵי הָאָרֶץ׃ 11 וַיִּנָּתֵן-לָהֶם מַחֲלָצוֹת לְבָנוֹת לֵאמֹר כִּי עֲלֵיהֶם לְהוֹחִיל עוֹד מְעָט עַד אֲשֶׁר שָׁלֵם יִהְיֶה מִסְפַּר חַבְרֵיהֶם וַאֲחֵיהֶם אֲשֶׁר יִשָּׁפֵךְ דָּמָם כְּמוֹהֶם׃ 12 וּכְפִתְחוֹ אֶת-הַחוֹתָם הַשִּׁשִּׁי וָאֵרֶא וְהִנֵּה זְוָעָה גְדֹלָה הַשֶּׁמֶשׁ לָבְשָׁה קַדְרוּת כְּאַדֶּרֶת שֵׂעָר וְהַיָּרֵחַ נֶהְפַּךְ לְדָם׃ 13 וְכוֹכְבֵי הַשָּׁמַיִם נָפְלוּ אָרְצָה כִּתְאֵנָה בְשַׁלֶּכֶת פַּגֶּיהָ מִפְּנֵי רוּחַ סְעָרָה׃ 14 הַשָּׁמַיִם כְּסֵפֶר נָגֹלּוּ וְהָרִים וְאִיֵּי הַיָּם נֶעְתְּקוּ מִמְּקוֹמָם׃ 15 וּמַלְכֵי-אֶרֶץ וְשָׂרֶיהָ וְשָׂרֵי הָאֲלָפִים עֲשִׁירֵי עָם וְגִבֹּרֵי כֹחַ עֲבָדִים וּבְנֵי חוֹרִים הִתְחַבְּאוּ בִמְעָרוֹת כֻּלָּם וּבֵין הַסְּלָעִים בֶּהָרִים׃ 16 וַיֹּאמְרוּ אֶל-הֶהָרִים וְאֶל-הַסְּלָעִים נִפְלוּ עָלֵינוּ כַּסּוּ אֹתָנוּ מִפְּנֵי הַיּשֵׁב עַל-הַכִּסֵּא וּמִפְּנֵי חֲרוֹן אַף הַשֶּׂה׃ 17 כִּי יוֹם זַעְמָם הַגָּדוֹל בָּא וּמִי יַעֲמֹד׃

ז    1 וְאַחֲרֵי-כֵן רָאִיתִי אַרְבָּעָה מַלְאָכִים עֹמְדִים עַל-אַרְבַּע כַּנְפוֹת הָאָרֶץ וְתֹפְשִׂים בְּאַרְבַּע רוּחֹתֶיהָ לְבִלְתִּי תְהִי רוּחַ נשֶׁבֶת לֹא בָאָרֶץ וְלֹא בַיָּם וְלֹא בְכָל-עֵץ׃ 2 וָאֵרֶא מַלְאָךְ אַחֵר עֹלֶה מִמִּזְרַח-שֶׁמֶשׁ וְנֹשֵׂא חוֹתַם אֵל-חָי וַיִּקְרָא בְּקוֹל גָּדוֹל אֶל-אַרְבָּעָה הַמַּלְאָכִים אֲשֶׁר הַפְּקֻדָּה בְיָדָם לְהַשְׁחִית אֶת-הָאָרֶץ וְאֶת-הַיָּם׃ 3 וַיֹּאמֶר אַל-תַּשְׁחִיתוּ אֶת-הָאָרֶץ וְאֶת-הַיָּם וְאֶת-הָעֵצִים עַד כִּי-חָתַמְנוּ אֶת-עַבְדֵי אֱלֹהֵינוּ עַל-מִצְחוֹתֵיהֶם׃ 4 וָאֶשְׁמַע אֶת-מִסְפַּר הַנֶּחְתָּמִים מְאַת אֶלֶף וְאַרְבָּעָה וְאַרְבָּעִים אָלֶף אֲשֶׁר נֶחְתְּמוּ מִקֶּרֶב כָּל-בְּנֵי יִשְׂרָאֵל לְשִׁבְטֵיהֶם׃ 5 לְמַטֵּה בְנֵי-יְהוּדָה נֶחְתְּמוּ שְׁנֵים עָשָׂר אָלֶף לְמַטֵּה בְנֵי רְאוּבֵן נֶחְתְּמוּ שְׁנֵים עָשָׂר אָלֶף לְמַטֵּה בְנֵי-גָד נֶחְתְּמוּ שְׁנֵים עָשָׂר אָלֶף לְמַטֵּה בְנֵי-אֲשֶׁר נֶחְתְּמוּ שְׁנֵים עָשָׂר אָלֶף׃ 6 לְמַטֵּה בְנֵי-נַפְתָּלִי נֶחְתְּמוּ שְׁנֵים עָשָׂר אָלֶף לְמַטֵּה בְנֵי-מְנַשֶּׁה נֶחְתְּמוּ שְׁנֵים עָשָׂר אָלֶף׃ 7 לְמַטֵּה בְנֵי-שִׁמְעוֹן נֶחְתְּמוּ שְׁנֵים עָשָׂר אָלֶף לְמַטֵּה בְנֵי-לֵוִי נֶחְתְּמוּ שְׁנֵים עָשָׂר אָלֶף לְמַטֵּה בְנֵי-יִשָּׂשכָר נֶחְתְּמוּ שְׁנֵים עָשָׂר אָלֶף׃ 8 לְמַטֵּה בְנֵי-זְבֻלוּן נֶחְתְּמוּ שְׁנֵים עָשָׂר אָלֶף לְמַטֵּה בְנֵי-יוֹסֵף נֶחְתְּמוּ שְׁנֵים עָשָׂר אָלֶף לְמַטֵּה בְנֵי-בִנְיָמִין נֶחְתְּמוּ שְׁנֵים עָשָׂר אָלֶף׃ 9 אַחֲרֵי-כֵן רָאִיתִי וְהִנֵּה הָמוֹן רָב מְאֹד אֲשֶׁר לֹא-יוּכַל אִישׁ לִסְפֹּר מִקֶּרֶב כָּל-הַגּוֹיִם וְהַמִּשְׁפָּחוֹת וְהָעַמִּים וְהַלְּשֹׁנוֹת בָּאוּ וַיַּעַמְדוּ לִפְנֵי הַכִּסֵּא וְלִפְנֵי הַשֶּׂה מְלֻבָּשִׁים שְׂמָלוֹת לְבָנוֹת וְכַפּוֹת תְּמָרִים בִּידֵיהֶם׃ 10 וַיִּקְרְאוּ בְקוֹל-גָּדוֹל וַיֹּאמְרוּ הַיְשׁוּעָה לֵאלֹהֵינוּ הַיּשֵׁב עַל-הַכִּסֵּא וְלַשֶּׂה׃ 11 וְכָל-הַמַּלְאָכִים הַנִּצָּבִים סָבִיב לַכִּסֵּא וְסָבִיב לַזְּקֵנִים וּלְאַרְבַּע הַחַיּוֹת נָפְלוּ עַל-פְּנֵיהֶם לִפְנֵי הַכִּסֵּא וַיִּשְׁתַּחֲווּ לֵאלֹהִים׃ 12 וַיֹּאמְרוּ אָמֵן הַבְּרָכָה וְהַתִּפְאֶרֶת וְהַבִּינָה וְהַתּוֹדָה וְהַגְּדֻלָּה וְהַגְּבוּרָה וְהַנֶּצַח לֵאלֹהֵינוּ עַד-עוֹלְמֵי עוֹלָמִים אָמֵן׃ 13 וַיַּעַן אֶחָד מִן-הַזְּקֵנִים וַיֹּאמֶר אֵלָי מִי אֵלֶּה הֵם הַמְלֻבָּשִׁים שְׂמָלוֹת לְבָנוֹת וּמֵאַיִן בָּאוּ׃ 14 וָאֹמַר אֵלָיו אֲדֹנִי אַתָּה יָדָעְתָּ וַיֹּאמֶר אֵלַי אֵלֶּה הֵם הַבָּאִים מֵרֹב צָרָה אֲשֶׁר כִּבְּסוּ שִׂמְלֹתָם בְּדַם הַשֶּׂה עַד אֲשֶׁר הִלְבִּינוּ׃ 15 וְעַל-כֵּן הֵם עֹמְדִים לִפְנֵי כִסֵּא הָאֱלֹהִים וּמְשָׁרְתִים לְפָנָיו בְּהֵיכָלוֹ יוֹמָם וָלָיְלָה וְהַיֹּשֵׁב עַל-הַכִּסֵּא יָגֵן עֲלֵיהֶם׃ 16 לֹא יִרְעָבוּ וְלֹא יִצְמְאוּ עוֹד וְלֹא-יַכֵּם שָׁרָב וָשָׁמֶשׁ׃ 17 כִּי הַשֶּׂה אֲשֶׁר בְּתוֹךְ הַכִּסֵּא הוּא יִרְעֶה אֹתָם וְעַל-מַבּוּעֵי מַיִם חַיִּים יְנַהֲלֵם וּמָחָה אֱלֹהִים כָּל-דִּמְעָה מֵעֵינֵיהֶם׃

ח    1 אַחַר פָּתַח אֶת-הַחוֹתָם הַשְּׁבִיעִי וַתְּהִי דְמָמָה בַשָּׁמַיִם כַּחֲצִי שָׁעָה׃ 2 וָאֵרֶא שִׁבְעָה שׁוֹפָרוֹת נְתוּנִים לְשִׁבְעַת הַמַּלְאָכִים הָעֹמְדִים לִפְנֵי הָאֱלֹהִים׃ 3 וַיָּבֹא מַלְאָךְ אַחֵר וַיַּעֲמֹד אֵצֶל הַמִּזְבֵּחַ וּבְיָדוֹ מִקְטֶרֶת זָהָב וַיִּתְנוּ לוֹ עֲתֶרֶת קְטֹרֶת לְהַקְטִיר עִם-תְּפִלּוֹת כָּל-הַקְּדוֹשִׁים עַל-מִזְבַּח הַזָּהָב אֲשֶׁר לִפְנֵי הַכִּסֵּא׃ 4 וַיַּעַל עֲתַר עֲנַן הַקְּטֹרֶת עִם-תְּפִלּוֹת הַקְּדוֹשִׁים מִיַּד הַמַּלְאָךְ לִפְנֵי הָאֱלֹהִים׃ 5 וַיִּקַּח הַמַּלְאָךְ אֶת-הַמִּקְטֶרֶת וַיְמַלְאֶהָ אֵשׁ מֵעַל-הַמִּזְבֵּחַ וַיִּצֹּק עֲלֵי-הָאָרֶץ וַיְהִי קוֹל וָרַעַם וּבָרָק וָרָעַשׁ׃ 6 וְשִׁבְעַת הַמַּלְאָכִים עִם-שִׁבְעַת שׁוֹפְרֹתֵיהֶם עָמְדוּ נְכֹנִים לִתְקֹעַ׃ 7 וַיִּתְקַע הַמַּלְאָךְ הָרִאשׁוֹן וַיְהִי-בָרָד וְאֵשׁ וָדָם בְּלוּלִים יַחְדָּו שֹׁטְפִים אָרְצָה וַתִּשָּׂרֵף שְׁלִישִׁית הָאָרֶץ וּשְׁלִישִׁית הָעֵצִים וְכָל-יֶרֶק עֵשֶׂב נִשְׂרָף׃ 8 וַיִּתְקַע הַמַּלְאָךְ הַשֵּׁנִי וּכְמוֹ הַר גָּדוֹל בֹּעֵר בָּאֵשׁ נָפַל אֶל-תּוֹךְ הַיָּם וּשְׁלִישִׁית הַיָּם נֶהְפְּכָה לְדָם׃ 9 וַיִּגְוַע כָּל-בָּשָׂר אֲשֶׁר נִשְׁמַת-רוּחַ חַיִּים בְּאַפָּיו אֲשֶׁר בַּשְּׁלִישִׁית הַיָּם וְהָאֳנִיּוֹת שְׁלִישִׁית מֵהֶן נֶהֱרָסוּ׃ 10 וַיִּתְקַע הַמַּלְאָךְ הַשְּׁלִישִׁי וַיִּפֹּל כּוֹכָב גָּדוֹל כְּלַפִּיד בֹּעֵר מִן-הַשָּׁמָיִם וַיִּפֹּל עַל-הַשְּׁלִישִׁית מִן-הַנְּהָרוֹת וּמִן-מַעְיְנוֹת הַמַּיִם׃ 11 וְהַכּוֹכָב נִקְרָא שְׁמוֹ לַעֲנָה וּשְׁלִישִׁית מִן-הַמַּיִם הָיְתָה לְלַעֲנָה וְרַבִּים מִבְּנֵי אָדָם מֵתוּ מִן-הַמַּיִם כִּי מָרִים הֵם׃ 12 וַיִּתְקַע הַמַּלְאָךְ הָרְבִיעִי וְהִנֵּה שְׁלִישִׁית מִן-הַשֶּׁמֶשׁ הֻכְּתָה וּשְׁלִישִׁית מִן-הַיָּרֵחַ וּשְׁלִישִׁית מִן-הַכּוֹכָבִים עַד כִּי-חָשְׁכָה שְׁלִישִׁיתָם וְהַיּוֹם לֹא הִגִּיהַּ אוֹרוֹ שְׁלִישִׁיתוֹ וְכֵן הַלָּיְלָה׃ 13 וָאֵרָא וָאֶשְׁמַע מַלְאָךְ מְעוֹפֵף בַּחֲצִי הַשָּׁמַיִם קֹרֵא בְּקוֹל גָּדוֹל אוֹי אוֹי אוֹי לְישְׁבֵי הָאָרֶץ מִפְּנֵי קֹלוֹת הַשּׁוֹפָר אֲשֶׁר יֶתֶר שְׁלשֶׁת הַמַּלְאָכִים נְכֹנִים לִתְקֹעַ׃

ט    1 וַיִּתְקַע הַמַּלְאָךְ הַחֲמִישִׁי וָאֵרֶא כוֹכָב נֹפֵל מִן-הַשָּׁמַיִם אַרְצָה וַיִּנָּתֶן-לוֹ מַפְתֵּחַ לִבְאֵר הַתְּהוֹם׃ 2 וַיִּפְתַּח אֶת-בְּאֵר הַתְּהוֹם וַיַּעַל קִיטֹר מִן-הַבְּאֵר כְּקִיטֹר הַכִּבְשָׁן רַב-מְאֹד וַתֶּחְשַׁךְ הַשֶּׁמֶשׁ וּפְנֵי הַשָּׁמַיִם מִקִּיטֹר הַבְּאֵר׃ 3 וּמִתּוֹךְ הַקִּיטֹר יָצָא אַרְבֶּה עַל-הָאָרֶץ וְכֹחַ נִתַּן לָהֶם כְּכֹחַ הָעַקְרַבִּים בָּאָרֶץ׃ 4 וְהֵם צֻוּוּ לְבִלְתִּי שַׁחֵת אֶת-עֵשֶׂב הָאָרֶץ וְלֹא אֶת-הַיָּרָק וְלֹא אֶת-עֵץ הַשָּׂדֶה כִּי אִם-אֶת-הָאֲנָשִׁים לְבַדָּם אֲשֶׁר אֵין-לָהֶם חוֹתַם אֱלֹהִים עַל-הַמֶּצַח׃ 5 וְלֹא נִתַּן לָהֶם לַהֲמִיתָם כִּי אִם-רַק לְעַנֹּתָם חֲמִשָּׁה חֳדָשִׁים בְּמַכְאוֹב קָשֶׁה כְּמַכְאוֹב אָדָם אֲשֶׁר הָעַקְרָב יַכֶּנּוּ׃ 6 בַּיָּמִים הָהֵם יְבַקְשׁוּ בְנֵי-הָאָדָם אֶת-הַמָּוֶת וְלֹא יִמְצָאֻהוּ יִשְׁאֲלוּ אֶת-נַפְשָׁם לָמוּת וְהַמָּוֶת יִבְרַח מֵהֶם׃ 7 וּמַרְאֵה הָאַרְבֶּה כְּמַרְאֵה סוּסִים עֲרוּכִים לְמִלְחָמָה וְעַל-רָאשֵׁיהֶם כְּעַטְרוֹת זָהָב וְכִפְנֵי אֲנָשִׁים פְּנֵיהֶם׃ 8 וְשֵׂעָר לָהֶם כִּשְׂעַר נָשִׁים וְשִׁנֵּיהֶם שִׁנֵּי אֲרָיוֹת׃ 9 וַעֲלֵיהֶם שִׁרְיֹנִים כְּשִׁרְיֹנֵי בַרְזֶל וְקוֹל כַּנְפֵיהֶם כְּקוֹל מַרְכְּבוֹת הֲמוֹן סוּסִים אֲשֶׁר יְרֻצוּן לַקְּרָב׃ 10 וּזְנָבוֹת לָהֶם כְּמוֹ עַקְרַבִּים וּבְזַנְבוֹתָם דָּרְבֹנוֹת אֲשֶׁר אוֹנָם בָּם לְעַנּוֹת אֶת-בְּנֵי אָדָם חֲמִשָּׁה חֳדָשִׁים׃ 11 וַעֲלֵיהֶם מֶלֶךְ הוּא מַלְאַךְ הַתְּהוֹם אֲשֶׁר שְׁמוֹ בִּשְׂפַת עֵבֶר אֲבַדּוֹן וְהַיְּוָנִים יִקְרְאוּ-לוֹ אַפּוֹלְיוֹן׃ 12 נְהִי אֶחָד חָלַף הָלַךְ-לוֹ וּנְהִי שֵׁנִי שְׁלִישִׁי הִנָּם בָּאִים׃ 13 וַיִּתְקַע הַמַּלְאָךְ הַשִּׁשִּׁי וָאֶשְׁמַע קוֹל קֹרֵא מִבֵּין קַרְנוֹת מִזְבַּח הַזָּהָב אֲשֶׁר לִפְנֵי אֱלֹהִים׃ 14 אֶל-הַמַּלְאָךְ הַשִּׁשִּׁי אֲשֶׁר הַשּׁוֹפָר בְּיָדוֹ לֵאמֹר הַתֵּר אֶת-אַרְבָּעָה הַמַּלְאָכִים הָאֲסוּרִים עַל-הַנָּהָר הַגָּדוֹל נְהַר-פְּרָת׃ 15 וְאַרְבָּעָה הַמַּלְאָכִים הֻתָּרוּ אֲשֶׁר עֲרוּכִים הָיוּ לַשָּׁעָה וְלַיּוֹם וְלַחֹדֶשׁ וְלַשָּׁנָה לְהָמִית אֶת-הַשְּׁלִישִׁית מִן-בְּנֵי הָאָדָם׃ 16 וּמִסְפַּר צִבְאוֹת הַפָּרָשִׁים עָלָה לִשְׁתֵּי רִבֹּאוֹת רְבָבוֹת כִּי-כֵן שָׁמַעְתִּי מִסְפָּרָם׃ 17 וְכֵן רָאִיתִי בֶחָזוֹן אֶת-הַסּוּסִים וְאֶת-רֹכְבֵיהֶם אֲשֶׁר שִׁרְיֹנֵיהֶם כְּמַרְאֵה אֵשׁ תְּכֵלֶת וְגָפְרִית וְרָאשֵׁי הַסּוּסִים כְּרָאשֵׁי אֲרָיוֹת וּמִפִּיהֶם עָלְתָה אֵשׁ עָשָׁן וְגָפְרִית׃ 18 בָּשָׁלשׁ מַגֵּפוֹת אֵלֶּה בָּאֵשׁ בֶּעָשָׁן וּבַגָּפְרִית הָעֹלוֹת מִפִּיהֶם הֻכָּה חֵלֶק שְׁלִישִׁי מִן-בְּנֵי הָאָדָם׃ 19 כִּי-כֹחַ הַסּוּסִים בְּמוֹ-פִיהֶם וּבְזַנְבוֹתָם כִּי זַנְבוֹתָם כִּנְחָשִׁים הֵם וְרָאשִׁים לָהֶם אֲשֶׁר בָּם הֵם מְחַבְּלִים׃ 20 וּשְׁאָר בְּנֵי הָאָדָם אֲשֶׁר לֹא מֵתוּ בַּמַּגֵּפוֹת הָאֵלֶּה לֹא-שָׁבוּ מִמַּעֲשֵׂי יְדֵיהֶם מֵהִשְׁתַּחֲוֹת עוֹד לַשֵּׁדִים וְלַעֲצַבֵּי זָהָב וָכֶסֶף וּנְחשֶׁת וְאֶבֶן וָעֵץ אֲשֶׁר לֹא-יִרְאוּן וְלֹא-יִשְׁמְעוּן וְלֹא יְהַלֵּכוּן׃ 21 וְגַם לֹא-שָׁבוּ מֵרֶצַח וּמִכְּשָׁפִים וּמִזְּנוּת וּמִגְּנֵבָה אֲשֶׁר בִּידֵיהֶם׃

י    1 וָאֵרֶא מַלְאָךְ אַחֵר אַדִּיר יֹרֵד מִן-הַשָּׁמָיִם עֹטֶה עָנָן כַּשַּׂלְמָה וְקֶשֶׁת עַל-רֹאשׁוֹ פָּנָיו כְּעֵין הַשֶּׁמֶשׁ וְרַגְלָיו כְּעַמּוּדֵי אֵשׁ׃ 2 וּבְיָדוֹ סֵפֶר קָטֹן פָּתוּחַ וַיַּצֵּג אֶת-רַגְלוֹ הַיְמָנִית עַל-הַיָּם וְאֶת-הַשְּׂמָאלִית עַל-הָאָרֶץ׃ 3 וְכַאֲרִי שֹׁאֵג קָרָא בְּקוֹל גָּדוֹל וּבְקָרְאוֹ הִשְׁמִיעוּ שִׁבְעַת הָרְעָמִים קוֹל דְּבָרִים׃ 4 וְכַאֲשֶׁר הִשְׁמִיעוּ שִׁבְעַת הָרְעָמִים קוֹל דִּבְרֵיהֶם הוֹאַלְתִּי לִכְתֹּב וָאֶשְׁמַע קוֹל מִן-הַשָּׁמַיִם לֵאמֹר אֵלַי חֲתוֹם אֶת-הַדְּבָרִים אֲשֶׁר הִשְׁמִיעוּ שִׁבְעַת הָרְעָמִים וְאַל-תִּכְתֹּב אֹתָם׃ 5 וְהַמַּלְאָךְ אֲשֶׁר רָאִיתִי עֹמֵד עַל-הַיָּם וְעַל-הָאָרֶץ הֵרִים אֶת-יְמִינוֹ אֶל-הַשָּׁמָיִם׃ 6 וַיִּשָּׁבַע בְּחֵי הָעוֹלָם אֲשֶׁר בָּרָא אֶת-הַשָּׁמַיִם וְאֵת אֲשֶׁר-בָּם וְאֶת-הָאָרֶץ וּמְלוֹאָהּ וְאֶת-הַיָּם וְאֶת-אֲשֶׁר בְּתוֹכוֹ אִם-תִּמָשֵׁךְ עוֹד הָעֵת׃ 7 רַק בַּיָּמִים הָהֵם אֲשֶׁר הַמַּלְאָךְ הַשְּׁבִיעִי יִתֵּן קוֹלוֹ וְיוֹאֵל לִתְקוֹעַ יִתֹּם סוֹד אֱלֹהַּ כַּאֲשֶׁר בִּשַּׂר אֶת-עֲבָדָיו הַנְּבִיאִים׃ 8 וְהַקּוֹל אֲשֶׁר שָׁמַעְתִּי מִן-הַשָּׁמַיִם דִּבֶּר אֵלַי שֵׁנִית לֵאמֹר לֵךְ קַח אֶת-הַסֵּפֶר הַפָּתוּחַ מִיַּד-הַמַּלְאָךְ הָעֹמֵד עַל-הַיָּם וְעַל-הָאָרֶץ׃ 9 וָאֵלֵךְ אֶל-הַמַּלְאָךְ וָאֹמַר אֵלָיו תְּנָה-לִּי אֶת-הַסֵּפֶר הַקָּטֹן וַיֹּאמֶר אֵלֵי קַח לְךָ וֶאֱכֹל אֹתוֹ וְהוּא יֵמַר לְבִטְנְךָ וּבְפִיךָ יִהְיֶה כִּדְבַשׁ לְמָתוֹק׃ 10 וָאֶקַּח אֶת-הַסֵּפֶר הַקָּטֹן מִיַּד-הַמַּלְאָךְ וָאֹכַל אֹתוֹ וַיְהִי בְפִי כִּדְבַשׁ לְמָתוֹק אַךְ הֵמַר לְבִטְנִי אַחֲרֵי אָכְלִי אֹתוֹ׃ 11 וַיֹּאמְרוּ אֵלָי הֲלֹא תוֹסִיף עוֹד לְהִנָּבֵא עַל-רַבִּים עַמִּים וְגוֹיִם וּלְשֹׁנוֹת וּמְלָכִים׃

יא    1 וַיִּנָּתֶן-לִי קָנֶה דּוֹמֶה לִקְנֵה הַמִּדָּה וַיַּעֲמֹד הַמַּלְאָךְ וַיֹּאמֶר קוּם וּמֹד אֶת-הֵיכָל הָאֱלֹהִים וְאֶת-הַמִּזְבֵּחַ וְאֶת-מְקוֹם הַמִּשְׁתַּחֲוִים שָׁם׃ 2 וְנָתַשְׁתָּ אֶת-חֲצַר הַהֵיכָל הַחִיצוֹן וְלֹא תָמֹד אֹתוֹ כִּי-נִתַּן בִּידֵי הַגּוֹיִם וְרָמְסוּ אֶת-עִיר הַקֹּדֶשׁ אַרְבָּעִים וּשְׁנַיִם חֹדֶשׁ׃ 3 וְנָתַתִּי לִשְׁנֵי עֵדָי וְנִבְּאוּ יָמִים אֶלֶף מָאתַיִם וְשִׁשִּׁים בִּלְבוּשׁ שָׂק׃ 4 אֵלֶּה הֵם שְׁנֵי הַזֵּיתִים וּשְׁתֵּי הַמְּנֹרוֹת הָעֹמְדִים עַל-אֱלֹהֵי הָאָרֶץ׃ 5 וְכִי-יְבַקֵּשׁ אִישׁ לִנְגֹּעַ בָּם תֵּצֵא אֵשׁ מִפִּיהֶם וְתֹאכַל אֶת-אֹיְבֵיהֶם מוֹת יָמוּת כָּל-הַמְבַקֵּשׁ לִנְגֹּעַ בָּם לְרָעָה׃ 6 וְהֵם יֶשׁ-לְאֵל יָדָם לַעֲצֹר אֶת-הַשָּׁמַיִם לְבִלְתִּי הֱיוֹת מָטָר כָּל-יְמֵי נְבוּאָתָם וְיֶשׁ לְאֵל יָדָם לַהֲפֹךְ אֶת-הַמַּיִם לְדָם וּלְהַכּוֹת אֶת-הָאָרֶץ בְּכָל-מַכָּה כְּדֵי חֶפְצָם׃ 7 וּכְכַלּוֹת עֵדוּתָם תִּלָּחֶם-בָּם הַחַיָּה הָעֹלָה מִן-הַתְּהוֹם תִּגְבַּר עֲלֵיהֶם וְתַהֲרֹג אֹתָם׃ 8 וּפִגְרֵיהֶם יִפְּלוּ בִּרְחוֹב הָעִיר הַגְּדֹלָה הַנִּקְרֵאת בִּשְׂפַת מָשָׁל סְדוֹם וּמִצְרָיִם אֲשֶׁר שָׁם-נִצְלַב גַּם-אֲדֹנֵיהֶם׃ 9 וְרַבִּים מִן-הָעַמִּים וְהַמִּשְׁפָּחוֹת וְהַלְּשֹׁנוֹת וְהַגּוֹיִם יִרְאוּ אֶת-פִּגְרֵיהֶם שְׁלשֶׁת יָמִים וָחֵצִי וְלֹא יִתְּנוּ לִקְבֹּר אֶת-הַחֲלָלִים בִּמְקוֹם קָבֶר׃ 10 וְישְׁבֵי הָאָרֶץ יָשִׂישׂוּ יָגִילוּ עֲלֵיהֶם וְיִשְׁלְחוּ מָנוֹת אִישׁ לְרֵעֵהוּ אַחֲרֵי אֲשֶׁר עָכְרוּ שְׁנֵי הַנְּבִיאִים הָאֵלֶּה אֶת-ישְׁבֵי הָאָרֶץ׃ 11 וּבִמְלֹאת שְׁלשֶׁת יָמִים וָחֵצִי בָּא בָהֶם רוּחַ חַיִּים מֵאֵת הָאֱלֹהִים וַיַּעַמְדוּ עַל-רַגְלֵיהֶם וְחִתַּת אֱלֹהִים נָפְלָה עַל-כָּל-רֹאֵיהֶם׃ 12 וַיִּשְׁמְעוּ קוֹל גָּדוֹל קֹרֵא אֲלֵיהֶם מִן-הַשָּׁמַיִם לֵאמֹר עֲלוּ הֵנָּה וַיַּעֲלוּ בֶעָנָן הַשָּׁמַיִם וְעֵינֵי אֹיְבֵיהֶם רֹאוֹת׃ 13 וַיְהִי רַעַשׁ גָּדוֹל בָּעֵת הַהִיא וַתִּפֹּל עֲשִׂירִית הָעִיר וְשִׁבְעַת אֲלָפִים אֲנָשִׁים לְמִסְפַּר שֵׁמוֹת מֵתוּ בָרַעַשׁ וְהַנִּשְׁאָרִים רְעָדָה אֲחָזָתַם וַיִּתְּנוּ כָבוֹד לֵאלֹהֵי הַשָּׁמָיִם׃ 14 נְהִי הַשֵּׁנִי חָלַף הָלַךְ-לוֹ וּנְהִי הַשְּׁלִישִׁי עַד-מְהֵרָה הִנֵּה בָא׃ 15 וַיִּתְקַע הַמַּלְאָךְ הַשְּׁבִיעִי וְקֹלוֹת גְּדוֹלִים נִשְׁמְעוּ בַשָּׁמַיִם לֵאמֹר הָיְתָה מַמְלֶכֶת הָאָרֶץ לַאֲדֹנֵינוּ וְלִמְשִׁיחוֹ וְהוּא יִמְלֹךְ לְעוֹלָם וָעֶד׃ 16 וְעֶשְׂרִים וְאַרְבָּעָה הַזְּקֵנִים הַיּשְׁבִים לִפְנֵי הָאֱלֹהִים עַל-כִּסְאוֹתָם נָפְלוּ עַל-פְּנֵיהֶם וַיִשְׁתַּחֲווּ לֵאלֹהִים׃ 17 וַיֹּאמְרוּ מוֹדִים אֲנַחְנוּ לְךָ יְהוָֹה אֱלֹהֵי צְבָאוֹת הוֶֹה וְהָיָה וְיָבוֹא כִּי לָבַשְׁתָּ עֹז גָּדְלְךָ וַתִּמְלֹךְ׃ 18 הַגּוֹיִם רָגְשׁוּ בַחֲרוֹת אַפָּם עַד בֹּא חֲרוֹן אַפְּךָ וְיוֹם הַמִּשְׁפָּט לִישֵׁנֵי עָפָר וְלָתֵת שָׂכָר לַעֲבָדֶיךָ הַנְּבִיאִים וְהַקְּדוֹשִׁים וְיִרְאֵי שִׁמְךָ הַקְּטַנִּים עִם-הַגְּדֹלִים וְלַעֲכֹר אֶת-עֹכְרֵי הָאָרֶץ׃ 19 אָז נִפְתַּח הֵיכַל הָאֱלֹהִים בַּשָּׁמַיִם וַאֲרוֹן בְּרִיתוֹ נִרְאָה שָּׁם בְּמִקְדָּשׁוֹ וַיִּתְמַלְּטוּ בְרָקִים וְקוֹלֹת רְעָמִים וּזְוָעָהוּבָרָד כָּבֵד׃

יב    1 וְאוֹת גָּדוֹל נִרְאָה אָז בַּשָּׁמָיִם אִשָּׁה עֹטָה מַעֲטֵה שֶׁמֶשׁ וּלְבָנָה תַּחַת רַגְלֶיהָ וְעַל-רֹאשָׁהּ יָצִיץ נֵזֶר שְׁנֵים עָשָׂר כּוֹכָבִים׃ 2 וְהִיא הָרָה לָלַת וַתִּזְעַק בַּחֲבָלֶיהָ כִּי נֶהְפְּכוּ עָלֶיהָ צִרֶיהָ׃ 3 וַיֵּרָא אוֹת שֵׁנִי בַשָּׁמָיִם וְהִנֵּה תַּנִין גָּדוֹל כְּמַרְאֶה אֵשׁ וְלוֹ שִׁבְעָה רָאשִׁים וְעֶשֶׂר קְרָנַיִם וְעַל-רָאשָׁיו שֶׁבַע כֹּתָרוֹת׃ 4 וַיִּסְחַב בִּזְנָבוֹ שְׁלִישִׁית מִן-כּוֹכְבֵי הַשָּׁמַיִם וַיַּשְׁלִיכֵם אָרְצָה וַיַּעֲמֹד הַתַּנִּין לִפְנֵי הָאִשָּׁה לְעֵת לִדְתָּהּ לִבְלֹעַ אֶת-בְּנָהּ בְּהִוָּלְדוֹ׃ 5 וְהִיא יָלְדָה אֶת-בְּנָהּ בֵּן זָכָר אֲשֶׁר עֻתַּד לִרְעוֹת אֶת-הַגּוֹיִם כֻּלָּם בְּשֵׁבֶט בַּרְזֶל וַיִּלָּקַח בְּנָהּ אֶל-הָאֱלֹהִים אֶל-כִּסְאוֹ׃ 6 וְהָאִשָּׁה בָּרְחָה לָּהּ הַמִּדְבָּרָה אֲשֶׁר-שָׁם הוּכַן-לָהּ מָקוֹם עַל-פִּי הָאֱלֹהִים לְכַלְכֵּל אֹתָהּ שָׁם יָמִים אֶלֶף וּמָאתַיִם וְשִׁשִּׁים׃ 7 וַתְּהִי מִלְחָמָה בַּשָּׁמָיִם מִיכָאֵל וּצְבָאָיו עָרְכוּ קְרָב עִם-הַתַּנִּין וְהַתַּנִּין וּצְבָאָיו נִלְחֲמוּ עִמָּם׃ 8 וְלֹא יָכְלוּ לָהֶם וּמְקוֹמָם לֹא נִמְצָא עוֹד בַּשָּׁמָיִם׃ 9 וַיַּשְׁלִיכוּ אֶת-הַתַּנִּין הַגָּדוֹל הוּא הַנָּחָשׁ הַקַּדְמֹנִי אֲשֶׁר קָרְאוּ לוֹ שׂוֹטֵן וְשָׂטָן אֲשֶׁר הִדִּיחַ כָּל-ישְׁבֵי תֵבֵל אֹתוֹ וְאֶת-מַלְאָכָיו עִמּוֹ הִשְׁלִיכוּ אָרְצָה׃ 10 וָאֶשְׁמָע קוֹל גָּדוֹל בַּשָּׁמַיִם לֵאמֹר הַיּוֹם בָּאָה יְשׁוּעַת אֱלֹהֵינוּ גְּבוּרָתוֹ וּמַלְכוּתוֹ וּמֶמְשֶׁלֶת מְשִׁיחוֹ כִּי-הוּרַד שׂוֹטֵן אַחֵינוּ אֲשֶׁר-עָמַד לְשִׂטְנָם לִפְנֵי אֱלֹהֵינוּ יוֹמָם וָלָיְלָה׃ 11 וְהֵם גָּבְרוּ עָלָיו בְּדַם הַשֶּׂה וּבְעֵדוּת פִּיהֶם וְלֹא-אָהֲבוּ אֶת-נַפְשָׁם עַד-מָוֶת׃ 12 עַל-כֵּן רָנּוּ שָׁמַיִם וְצַהֲלוּ אַתֶּם הַשֹּׁכְנִים שָׁם אוֹי לְישְׁבֵי הָאָרֶץ וּלְשֹׁכְנֵי הַיָּם כִּי-יָרַד אֲלֵיכֶם הַשָּׂטָן וַחֲמָתוֹ גְדוֹלָה מִדַּעְתּוֹ כִּי תִקְצַר עִתּוֹ׃ 13 וְכִרְאוֹת הַתַּנִּין כִּי הוּרַד אָרְצָה וַיִּרְדֹּף אַחֲרֵי הָאִשָּׁה אֲשֶׁר יָלְדָה אֵת בֵּן הַזָּכָר׃ 14 וַיֻּתְּנוּ לָאִשָּׁה שְׁתֵּי כְנָפַיִם כַּנְפֵי הַנֶּשֶׁר הַגָּדוֹל וַתָּעָף הַמִּדְבָּרָה אֶל-הַמָּקוֹם אֲשֶׁר יְכַלְכְּלוּ אֹתָהּ מוֹעֵד מוֹעֲדִים וָחֵצִי מִפְּנֵי הַנָּחָשׁ׃ 15 וַיָּקֶא הַנָּחָשׁ נְהַר-מַיִם מִפִּיו אַחֲרֵי הָאִשָּׁה לְשָׁטְפָהּ בַּנָּהָר׃ 16 וַתַּעֲזֹר הָאָרֶץ לָאִשָּׁה וָתִּפְתַּח הָאָרֶץ אֶת-פִּיהָ וַתִּבְלַע אֶת-הַנָּהָר אֲשֶׁר-הֵקִיא הַתַּנִּין מִפִּיו׃ 17 וַיִּקְצֹף הַתַּנִּין עַל-הָאִשָּׁה וַיֵּלֶךְ לְהִלָּחֵם בְּיֶתֶר זַרְעָהּ שֹׁמְרֵי מִצְוֹתאֱלֹהִים וְעֵדוּת יֵשׁוּעַ הַמָּשִׁיחַ אִתָּם׃

יג    1 וָאֶעֱמֹד עַל-חוֹל שְׂפַת הַיָּם וָאֵרֶא חַיָּה עֹלָה מִן-הַיָּם אֲשֶׁר לָהּ שִׁבְעָה רָאשִׁים וְעֶשֶׂר קְרָנָיִם וְעַל-קַרְנֶיהָ עֶשֶׂר עֲטָרוֹת וּשְׁמוֹת גִּדּוּפִים עַל-רָאשֶׁיהָ׃ 2 וְהַחַיָּה אֲשֶׁר עֵינַי רָאוּ דָּמְתָה לְנָמֵר וְרַגְלֶיהָ רַגְלֵי דֹב וּפִיהָ פִי אֲרִי וְהַתַּנִּין נָתַן לָהּ אֶת-כֹּחוֹ וְאֶת-כִּסְאוֹ וּמִמְשָׁל-רָב׃ 3 וָאֶחֱזֶה אֶחָד מֵרָאשֶׁיהָ כְּמֻכֶּה מַכַּת מָוֶת וּמַכַּת הַמָּוֶת נִרְפָּאָה וְכָל-הָאָרֶץ הֶעֱרִיצוּ אֶת-הַחַיָּה וַיִּנְהֲרוּ אַחֲרֶיהָ׃ 4 וַיִּשְׁתַּחֲווּ אֶל-הַתַּנִּין כִּי-נָתַן מֶמְשָׁלָה לַחַיָּה וְלִפְנֵי הַחַיָּה הִשְׁתַּחֲווּ לֵאמֹר מִי כְמוֹ הַחַיָּה מִי יָעֹז לְהִלָּחֵם בָּהּ׃ 5 וְלָהּ נִתַּן פֻּם מְמַלֵּל רַבְרְבָן וַחֲרָפוֹת וְכֹחַ נִתַּן-לָהּ לַעֲשׂוֹת כִּרְצוֹנָהּ שְׁנַיִם וְאַרְבָּעִים חֹדֶשׁ׃ 6 וַתִּפְתַּח אֶת-פִּיהָ לְחָרֵף אֶת-הָאֱלֹהִים וּלְגַדֵּף אֶת-שְׁמוֹ וְאֶת-מִשְׁכָּנוֹ וְאֶת-שֹׁכְנֵי הַשָּׁמָיִם׃ 7 וַיִּנָּתֶן-לָהּ לַעֲשׂוֹת מִלְחָמָה עִם-הַקְּדוֹשִׁים וְלִגְבֹּר עֲלֵיהֶם וּמֶמְשָׁלָה נִתְּנָה לָהּ עַל כָּל-שֵׁבֶט וָעָם וְלָשׁוֹן וָגוֹי׃ 8 וְכָל-ישְׁבֵי הָאָרֶץ יִשְׁתַּחֲווּ לְפָנֶיהָ כֹּל אֲשֶׁר לֹא נִכְתְּבוּ שְׁמוֹתָם מִנִּי אָז תִּוָּסֶד אָרֶץ בְּסֵפֶר חַיֵּי הַשֶּׂה הַטָּבוּחַ׃ 9 מִי אֲשֶׁר-אָזְנַיִם לוֹ יִשְׁמָע׃ 10 מִי אֲשֶׁר יִשְׁבֶּה שֶּׁבִי בַּשְּׁבִי יֵלֵךְ מִי אֲשֶׁר יָמִית בַּחֶרֶב בַּחֶרֶב יוּמָת בְּזֹאת נִמְצָא עֹצֶר רוּחַ וֶאֱמוּנָה לִקְדשִׁים׃ 11 וָאֵרֶא חַיָּה אַחֶרֶת עֹלָה מִן-הָאֲדָמָה בַּעֲלַת שְׁתֵּי קְרָנַיִם כְּכֶבֶשׂ וּמְדַבֶּרֶת כְּפִי תַנִּין׃ 12 וְהִיא משֶׁלֶת עַל-פְּנֵי הַחַיָּה הָרִאשֹׁנָה בְּכָל-מֶמְשַׁלְתָּהּ וּבִפְעֻלַּת יָדֶיהָ הִשְׁתַּחֲווּ הָאָרֶץ וְישְׁבֶיהָ לִפְנֵי הַחַיָּה הָרִאשֹׁנָה הַנִּרְפָּאָה מִן-מַכַּת הַמָּוֶת׃ 13 וַתַּעַשׂ מוֹפְתִים גְּדוֹלִים עַד גַּם-לְהוֹרִיד אֵשׁ מִן-הַשָּׁמַיִם אַרְצָה לְעֵינֵי בְנֵי אָדָם׃ 14 וַתַּדִּיחַ אֶת-ישְׁבֵי הָאָרֶץ בְּמוֹפְתִים הַנְּתוּנִים לָהּ לַעֲשׂוֹת לִפְנֵי הַחַיָּה וַתֹּאמֶר אֶל-ישְׁבֵי הָאָרֶץ לַעֲשׂוֹת צֶלֶם לַחַיָּה אֲשֶׁר-הֻכְּתָה מַכַּת-חֶרֶב וַתֶּחִי׃ 15 וְגַם נִתַּן לָהּ לְהָפִיחַ רוּחַ בְּצֶלֶם הַחַיָּה עַד אֲשֶׁר יָכֹל לְדַבֵּר וְלַעֲשׂוֹת חֹק מִי אֲשֶׁר-לֹא יִשְׁתַּחֲוֶה לְצֶלֶם הַחַיָּה יוּמָת׃ 16 וַתִּגְזָר אֹמֶר כִּי כַקָּטֹן כַּגָּדוֹל כֶּעָנִי כֶּעָשִׁיר כָּעֶבֶד כְּבֶן-חוֹרִים כֻּלָּם יַתְווּ תָו עַל-יַד יְמִינָם אוֹ עַל-מִצְחָם׃ 17 וְכִי לֹא-יוּכַל אִישׁ לִקְנוֹת וְלִמְכֹּר בִּלְתִּי הוּא אֲשֶׁר לוֹ הַתָּו הוּא שֵׁם הַחַיָּה אוֹ-מִסְפַר שְׁמָהּ׃ 18 פֹּה חָכְמָה צְפוּנָה וְהַמַּשְׂכִּיל יְחַשֵּׁב אֶת-מִסְפַּר הַחַיָּה כִּי מִסְפַּר אָדָם הוּא וּמִסְפָּרוֹ תֹרֹסֹוֹ׃

יד    1 וָאֶשָּׂא עֵינַי וְהִנֵּה-שֶׂה עֹמֵד עַל-הַר צִיּוֹןה וְאֶצְלוֹ מֵאָה וְאַרְבָּעִים אֶלֶף נֶפֶשׁ וְאַרְבַּעַת אֲלָפִים הֵם אֲשֶׁר שְׁמוֹ וְשֵׁם אָבִיו כְּתוּבִים עַל-מִצְחָם׃ 2 וָאֶשְׁמַע קוֹל מִן-הַשָּׁמַיִם כְּקוֹל מַיִם רַבִּים כְּקוֹל רַעַם אַדִּיר וָאַקְשִׁיב קֶשֶׁב וְהִנֵּה הוּא קוֹל מְנַגְּנִים הַפֹּרְטִים עַל-פִּי נִבְלֵיהֶם׃ 3 וַיָּשִׁירוּ שִׁיר חָדָשׁ לִפְנֵי הַכִּסֵּא וְלִפְנֵי אַרְבַּע הַחַיּוֹת וְהַזְּקֵנִים מִבְּלִי יְכֹלֶת אִישׁ לִלְמֹד אֶת-הַשִּׁירָה הַזֹּאת בִּלְתִּי מֵאָה וְאַרְבָּעִים אֶלֶף וְאַרְבַּעַת אֲלָפִים אֵלֶּה אֲשֶׁר נִפְדּוּ מִן-הָאָרֶץ׃ 4 הֲלֹא הֵם אֲשֶׁר לֹא-נְגֹאֲלוּ בְנָשִׁים כִּי בְתֻמָּתָם הֵם כִּבְתוּלוֹת וְהֹלְכִים אַחֲרֵי הַשֶּׂה אֶל-אֲשֶׁר יֵלֵךְ וּפְדוּיִם הֵם מִקֶּרֶב בְּנֵי הָאָדָם כְּבִכּוּרִים לֵאלֹהִים וְלַשֶּׂה׃ 5 וּמִרְמָה לֹא-נִמְצְאָה בְפִיהֶם כִּי יְשָׁרִים וּתְמִימִים הֵם לִפְנֵי כִּסֵא הָאֱלֹהִים׃ 6 וָאֵרֶא מַלְאָךְ אַחֵר מְעוֹפֵף בְּלֵב הַשָּׁמַיִם וּבְשׁרַת עוֹלָם בְּיָדוֹ לְהַגִּיד לְישְׁבֵי הָאָרֶץ וּלְכָל-גּוֹי וְשֵׁבֶט וְלָשׁוֹן וָעָם׃ 7 וַיִּקְרָא בְּקוֹל גָּדוֹל יִרְאוּ אֶת-הָאֱלֹהִים וְהָבוּ-לוֹ כָבוֹד כִּי יוֹם הַמִּשְׁפָּט הִנֵּה בָא הִשְׁתַּחֲווּ לְפָנָיו אֲשֶׁר עָשָׂה אֶת-הַשָּׁמַיִם וְאֶת-הָאָרֶץ אֶת-הַיָּם וְאֵת כָּל-מַעְיְנוֹ מָיִם׃ 8 וּמַלְאָךְ אַחֵר קֹרֵא אַחֲרָיו נָפְלָה נָפְלָה בָּבֶל הָעִיר הַגְּדוֹלָה אֲשֶׁר מִיֵּין חֲמַת תַּזְנֻתָהּ הִשְׁקְתָה אֶת-כָּל-הַגּוֹיִם׃ 9 וּמַלְאָךְ שְׁלִישִׁי קֹרֵא אַחֲרֵיהֶם בְּקוֹל גָּדוֹל מִי אֲשֶׁר יִשְׁתַּחֲוֶה אֶל-הַחַיָּה וְאֶל-צַלְמָהּ וְיִתְוֶה אֶת-הַתָּו עַל-מִצְחוֹ אוֹ עַל-יָדוֹ׃ 10 גַּם-הוּא יִשְׁתֶּה מִיֵּין חֲמַת אֱלֹהִים מִכּוֹס הַתַּרְעֵלָה הַמְּלֵאָה מֶזֶג זַעְמוֹ וְיִתְגֹּלֵל בְּזַלְעֲפוֹת אֵשׁ וְגָפְרִית לְעֵינֵי צְבָא הַקֹּדֶשׁ וּלְעֵינֵי הַשֶּׂה׃ 11 וַעֲשַׁן כּוּר עָנְיָם יַעֲלֶה עַד-עוֹלְמֵי עוֹלָמִים וּמָנוֹחַ לֹא יִמְצְאוּ יוֹמָם וָלַיְלָה הַמִּשְׁתַּחֲוִים אֶל-הַחַיָּה וְאֶל-צַלְמָהּ וַאֲשֶׁר הִתְווּ תָו שְׁמָהּ עַל-בְּשָׂרָם׃ 12 פֹּה נִמְצָא עֹצֶר רוּחַ לִקְדשִׁים פֹּה הַשֹּׁמְרִים מִצְוֹת הָאֱלֹהִים וֶאֱמוּנַת יֵשׁוּעַ׃ 13 וָאֶשְׁמַע קוֹל קֹרֵא אֵלַי מִן-הַשָּׁמַיִם כְּתֹב אַשְׁרֵי הַמֵּתִים אֲשֶׁר מִן-הַיּוֹם וָהָלְאָה יָמוּתוּ בַאדֹנָי וְאַף גַּם-הָרוּחַ עָנָה לֵאמֹר שָׁם יָנוּחוּ יְגִיעֵי כֹחַ וְהָלַךְ אַחֲרֵיהֶם מַעֲשֵׂה צִדְקָם׃ 14 וָאֶשָּׂא עֵינַי וְהִנֵּה עָנָן צַח וְעַל-הֶעָנָן רֹכֵב כִּדְמוּת בֶּן-אָדָם וְנֵזֶר זָהָב עַל-רֹאשׁוֹ וּבְיָדוֹ מַגָּל מְלֻטָּשׁ׃ 15 וּמַלְאָךְ אַחֵר יָצָא מִן-הַהֵיכָל וַיִּקְרָא בְּקוֹל גָּדוֹל אֶל-הָרֹכֵב עַל-הֶעָנָן שְׁלַח אֶת-הַמַּגָּל וּקְצֹר כִּי בָא מוֹעֵד לִקְצֹר אַחֲרֵי אֲשֶׁר בָּשַׁל קְצִיר הָאָרֶץ׃ 16 וַיִּשְׁלַח הָרֹכֵב עַל-הֶעָנָן אֶת-מַגָּלוֹ עַל-פְּנֵי הָאָרֶץ וַיִּקְצֹר אֶת-קְצִיר הָאָרֶץ׃ 17 וּמַלְאָךְ אַחֵר יָצָא מִן-הַהֵיכָל אֲשֶׁר בַּמָּרוֹם וְגַם-בְּיָדוֹ מַזְמֵרָה מְלֻטָּשָׁה׃ 18 וַיָּבֹא מַלְאָךְ אַחֵר מִן-הַמִּזְבֵּחַ אֲשֶׁר לוֹ שִׁלְטוֹן עַל-הָאֵשׁ וַיִּקְרָא בְּקוֹל גָּדוֹל אֶל-אֲשֶׁר לוֹ הַמַּזְמֵרָה הַמְלֻטָּשָׁה לֵאמֹר שְׁלַח אֶת-הַמַּזְמֵרָה הַמְלֻטָּשָׁה וּבְצֹר אֶת-אַשְׁכְּלֹת גֶּפֶן הָאָרֶץ כִּי-הִבְשִׁילוּ עֲנָבֶיהָ׃ 19 וַיָּנֶף הַמַּלְאָךְ אֶת-מַזְמֵרָתוֹ עַל-הָאָרֶץ וַיִּבְצֹר אֶת-אַשְׁכְּלֹת גֶּפֶן הָאָרֶץ וַיַּשְׁלִכֵן אֶל-תּוֹךְ הַגַּת הַגְּדוֹלָה הִיא גַת חֲמַת אֱלֹהִים׃ 20 וַיִּדְרְכוּ בַגַּת מִחוּץ לָעִיר וַיֵּצֵא דָם מִן-הַגַּת וַיַּגִּיעַ עַד-רִסְנֵי הַסּוּסִים דֶּרֶךְ אֶלֶף וְשֵׁשׁ-מֵאוֹת כִּבְרַת אָרֶץ׃

טו    1 וָאֵרֶא מוֹפֵת אַחֵר גָּדוֹל וְנוֹרָא בַּשָּׁמָיִם שִׁבְעָה מַלְאָכִים נֹשְׂאִים שֶׁבַע מַגֵּפוֹת אַחֲרֹנוֹת כִּי בָהֵנָּה תִּתֹּם חֲמַת אֱלֹהִים׃ 2 וּכְיַם זְכוֹכִית בָּלוּל בָּאֵשׁ נִרְאָה לְעֵינָי וְאֵלֶּה אֲשֶׁר גָּבְרוּ עַל-הַחַיָּה וְעַל-צַלְמָהּ וְעַל-תָּוָה וּמִסְפַּר שְׁמָהּ עֹמְדִים עַל-יַם הַזְּכוֹכִית וְכִנֹּרוֹת-אֵל בְּיָדָם׃ 3 אָז יָשִׁירוּ שִׁיר משֶׁה עֶבֶד הָאֱלֹהִים וְשִׁיר הַשֶּׂה לֵאמֹר גְּדֹלִים וְנוֹרָאִים מַעֲשֶׂיךָ יְהוָֹה אֱלֹהֵי צְבָאוֹת וּדְרָכֶיךָ אֱמֶת וָצֶדֶק מֶלֶךְ הַקְּדּוֹשִׁים׃ 4 מִי לֹא יִרָאֲךָ יְהוָֹה מִי לֹא יִתֵּן כָּבוֹד לִשְׁמֶךָ קָדוֹשׁ אַתָּה לְבַדְּךָ וְכָל-הַגּוֹיִם יָבֹאוּ וְיִשְׁתַּחֲווּ לְפָנֶיךָ כִּי-צִדְקָתְךָ נִגְלָתָה׃ 5 וְאַחֲרֵי-כֵן רָאִיתִי וְהִנֵּה הֵיכַל מִשְׁכַּן הָעֵדוּת נִפְתַּח בַּשָּׁמָיִם׃ 6 וְשִׁבְעָה מַלְאָכִים נֹשְׂאֵי שֶׁבַע הַמַּגֵּפוֹת יָצְאוּ מִן-הַהֵיכָל מְלֻבָּשִׁים בִּגְדֵי-שֵׁשׁ צַּח וּבָהִיר וַחֲגוֹרֵי אֵזוֹר זָהָב בְּמָתְנֵיהֶם׃ 7 וַתִּתֵּן אַחַת מֵאַרְבַּע הַחַיּוֹת אֶל-שִׁבְעַת הַמַּלְאָכִים שִׁבְעָה מִזְרְקֵי זָהָב מְלֵאִים חֲמַת אֱלֹהִים אֵל חַי עַד-עוֹלְמֵי עוֹלָמִים׃ 8 וְהַהֵיכָל יִמָּלֵא עָשָׁן מִכְּבוֹד עֹז אֱלֹהִים וְלֹא יָכֹל אִישׁ לָבֹא אֶל-הַהֵיכָל עַד אֲשֶׁר תִּכְלֶינָה שֶׁבַע הַמַּגֵּפוֹת אֲשֶׁר בִּידֵי שִׁבְעַת הַמַּלְאָכִים׃

טז    1 וָאֶשְׁמַע קוֹל גָּדוֹל מִן-הַהֵיכָל קֹרֵא אֶל-שִׁבְעַת הַמַּלְאָכִים לֵאמֹר לְכוּ וְהָרִיקוּ אֶת-שִׁבְעָה הַמִּזְרָקִים הַמְּכִילִים חֲמַת הָאֱלֹהִים עַל-הָאָרֶץ׃ 2 וַיֵּלֶךְ הָרִאשׁוֹן וַיָּרֶק אֶת-מִזְרָקוֹ עַל-הָאָרֶץ וַיְהִי לִשְׁחִין רָע פֹּרֵחַ בָּאֲנָשִׁים אֲשֶׁר תָּו הַחַיָּה בָּהֶם וְהַמִּשְׁתַּחֲוִים אֶל-צַלְמָהּ׃ 3 וַיָּרֶק הַשֵּׁנִי אֶת-מִזְרָקוֹ אֶל-תּוֹךְ הַיָּם וַיְהִי לְדָם כַּדָּם אֲשֶׁר יָזוּבוּ פְגָרִים מֵתִים וַתָּמָת כָּל-נֶפֶשׁ חַיָּה אֲשֶׁר בַּיָּם׃ 4 וַיָּרֶק הַשְּׁלִישִׁי אֶת-מִזְרָקוֹ עַל-הַנְּהָרוֹת וְעַל-מַעְיְנֵי מָיִם וַיֵּהָפְכוּ לְדָם׃ 5 וָאֶשְׁמַע אֶת-מַלְאַךְ הַמַּיִם אֹמֵר צַדִּיק אַתָּה יְהוָֹה הַהוֶֹה וְהָיָה וְיִהְיֶה כִּי-כֵן חָרָצְתָּ׃ 6 הֵם שָׁפְכוּ דַם קְדשִׁים וּנְבִיאִים וְאַתָּה הִשְׁקִיתָם דָּם כִּי-כֵן יָאֲתָה לָהֶם׃ 7 וָאֶשְׁמַע קוֹל מִן-הַמִּזְבֵּחַ אֹמֵר אָמֵן מִשְׁפָּטְךָ יְהוָֹה אֱלֹהִים אֵל שַׁדַּי אֱמֶת וָצֶדֶק׃ 8 וְהָרְבִיעִי הֵרִיק אֶת-מִזְרָקוֹ עַל-פְּנֵי הַשָּׁמֶשׁ וַיִנָּתֶן-לוֹ לְלַהֵט אֶת-הָאֲנָשִׁים בָּאֵשׁ׃ 9 וַיִּצָּרְבוּ הָאֲנָשִׁים בְּלַהַט נוֹרָא מְאֹד וַיְגַדְּפוּ אֶת-שֵׁם אֱלֹהִים הַשַּׁלִּיט עַל-הַמַּגֵּפוֹת הָאֵלֶּה וְלֹא שָׁבוּ לָתֶת-לוֹ כָּבוֹד׃ 10 וַיָּרֶק הַחֲמִישִׁי אֶת-מִזְרָקוֹ עַל-כִּסֵּא הַחַיָּה וַתֶּחְשַׁךְ מַלְכוּתָהּ וַיְנַשְּׁכוּ אֶת-לְשׁוֹנָם מֵרֹב כְּאֵבָם׃ 11 וַיְגַדְּפוּ אֶת-אֱלֹהֵי הַשָּׁמַיִם מִפְּנֵי הַמַּכְאוֹב וְהַשְּׁחִין וְלֹא שָׁבוּ מִמַּעֲשֵׂיהֶם׃ 12 וַיָּרֶק הַשִּׁשִּׁי אֶת-מִזְרָקוֹ אֶל-תּוֹךְ הַנָּהָר הַגָּדוֹל נְהַר-פְּרָת וַיֶּחֶרְבוּ מֵימָיו לְפַנּוֹת דֶּרֶךְ לִפְנֵי הַמְּלָכִים הַבָּאִים מִמִּזְרַח-שָׁמֶשׁ׃ 13 וָאֵרֶא שְׁלשָׁה רוּחוֹת טְמֵאִים כְּתַבְנִית צְפַרְדְּעִים יֹצְאִים מִפִּי הַתַּנִּין וּמִפִּי הַחַיָּה וּמִפִּי נְבִיא הַשָּׁקֶר׃ 14 כִּי הֵם רוּחוֹת הַשֵּׁדִים הָעֹשִׂים מוֹפְתִים וּבָאִים אֶל-מַלְכֵי אֶרֶץ וְתֵבֵל כֻּלָּה לֶאֱסֹף אֹתָם לְמִלְחָמָה לַיּוֹם הַגָּדוֹל הוּא יוֹם אֱלֹהֵי צְבָאוֹת׃ 15 הִנְנִי בָא כְּגַנָּב אַשְׁרֵי הָאִישׁ הַנֵּעוֹר וְאֶת-בְּגָדָיו הוּא נֹצֵר לְבִלְתִּי יֵלֵךְ עָרֹם וְרָאוּ אֶת-עֶרְוָתוֹ׃ 16 וְהֵם הִקְהִילוּ אֹתָם אֶל-הַמָּקוֹם אֲשֶׁר הָעִבְרִים יִקְרְאוּ לוֹ הַר מְגִדּוֹ׃ 17 וְהַשְּׁבִיעִי הֵרִיק אֶת-מִזְרָקוֹ עַל-פְּנֵי רְקִיעַ הַשָּׁמָיִם וַיֵּצֵא קוֹל גָּדוֹל מִן-הַהֵיכָל הָעֶלְיוֹן מִן-הַכִּסֵּא לֵאמֹר נֶעֱשָׂתָה׃ 18 וְהִנֵּה נִשְׁמְעוּ קֹלוֹת וּבְרָקִים וּרְעָמִים וַיְהִי רַעַשׁ גָּדוֹל אֲשֶׁר לֹא-הָיָה כָמֹהוּ לְמִן-הֱיוֹת אָדָם עַל-הָאָרֶץ כִּי גָדֹל הָרַעַשׁ עַד-מְאֹד׃ 19 וַתֵּחָלֵק הָעִיר הַגְּדוֹלָה לִשְׁלשָׁה חֲלָקִים עָרֵי הַגּוֹיִם נָפָלוּ וּבָבֶל הַגְּדוֹלָה נִפְקְדָה לִפְנֵי הָאֱלֹהִים לְהַשְׁקוֹתָהּ כּוֹס יֵין חֲמַת אַפּוֹ׃ 20 נָדְדוּ אִיֵּי הַיָּם וְהֶהָרִים נֶעְתְּקוּ מִמְּקוֹמָם וְאֵינָם׃ 21 וּמִן-הַשָּׁמַיִם הִמְטִירוּ בָרָד כָּבֵד כְּכִכָּר עַל-רָאשֵׁי הָאֲנָשִׁים וַיְגַדְּפוּ הָאֲנָשִׁים אֶת-הָאֱלֹהִים עַל-דְּבַר מַגֵּפַת הַבָּרָד כִּי-כָבְדָה מַכָּתוֹ עַד-מְאֹד׃

יז    1 וַיָּבֹא אֶחָד מִן-שִׁבְעַת הַמַּלְאָכִים נֹשְׂאֵי שִׁבְעַת הַמִּזְרָקִים וַיְדַבֵּר עִמָּדִי לֵאמֹר אֵלַי בֹּא וְאַרְאֲךָ אֶת-מִשְׁפַּט הַזּוֹנָה הַגְּדוֹלָה הַיּשֶׁבֶת עַל-מַיִם רַבִּים׃ 2 אֲשֶׁר זָנוּ אַחֲרֶיהָ מַלְכֵי הָאָרֶץ וְישְׁבֵי תֵבֵל הִשְׁתַּכְּרוּ מִיֵּין תַּזְנֻתָהּ׃ 3 וַיּוֹלִיכֵנִי בָרוּחַ הַמִּדְבָּרָה וָאֵרֶא אִשָּׁה ישֶׁבֶת עַל-חַיָּה אֲדֻמָּה כַתּוֹלָע מְלֵאָה שְׁמוֹת גִּדּוּפִים וְשִׁבְעָה רָאשִׁים לָהּ וְעֶשֶׂר קְרָנָיִם׃ 4 וְהָאִשָּׁה לְבוּשָׁהּ אַרְגָּמָן וּשְׁנִי תוֹלַעַת וְעֹטָה זָהָב אַבְנֵי-חֵפֶץ וּפְנִינִים וְכוֹס זָהָב בְּיָדָהּ מְלֵאָה שִׁקּוּצִים וְתוֹעֲבוֹת זְנוּנֶיהָ׃ 5 וְעַל-מִצְחָהּ כָּתוּב שֵׁם בְּדֶרֶךְ סוֹד בָּבֶל הַגְּדוֹלָה הִיא אֵם הַזְּנוּת וְשִׁקּוּצֵי הָאָרֶץ׃ 6 וָאֵרֶא אֶת-הָאִשָּׁה שִׁכֹּרָה מִדַּם הַקְּדוֹשִׁים וְעֵדֵי יֵשׁוּעַ וְשַׁמָּה אֲחָזַתְנִי עַד-מְאֹד מַרְאוֹת אֹתָהּ׃ 7 וַיֹּאמֶר אֵלַי הַמַּלְאָךְ לָמָּה זֶּה תִּשְׁתּוֹמֵם הִנְנִי מַגִּיד לְךָ סוֹד הָאִשָּׁה וְהַחַיָּה הַנֹּשֵׂאת אֹתָהּ בַּעֲלַת שִׁבְעָה רָאשִׁים וְעֶשֶׂר קְרָנָיִם׃ 8 הַחַיָּה אֲשֶׁר רָאֲתָה עֵינְךָ הָיְתָה בָאָרֶץ אַחֲרֵי-כֵן חָלְפָה לָּהּ וְעוֹד תַּעֲלֶה מִן-הַתְּהוֹם וְלַאֲבַדּוֹן תֵּרֵד וְישְׁבֵי תֵבֵל אֲשֶׁר לֹא נִכְתְּבוּ שְׁמוֹתָם בְּסֵפֶר הַחַיִּים מֵרֹאשׁ מִקַּדְמֵי אֶרֶץ שַׁמָּה תֹאחֲזֵם בִּרְאֹתָם אֶת-הַחַיָּה אֲשֶׁר הָיְתָה וְאֵינֶנָּה וַעֲתִידָה לָבֹא׃ 9 פֹּה אִישׁ תְּבוּנוֹת יָבִין שִׁבְעָה הָרָאשִׁים שִׁבְעָה הָרִים הֵם אֲשֶׁר הָאִשָּׁה ישֶׁבֶת עֲלֵיהֶם׃ 10 וְהַמְּלָכִים שִׁבְעָה הֵם חֲמִשָּׁה מֵהֶם נָפָלוּ אֶחָד מֹלֵךְ כַּיּוֹם וְהָאַחֲרוֹן לֹא-בָא עוֹד וְהָיָה כִּי יָבֹא יַעֲמֹד אַךְ לִזְמָן קָטֹן׃ 11 וְהַחַיָּה אֲשֶׁר הָיְתָה וְאֵינֶנָּה הוּא מֶלֶךְ שְׁמִינִי וּמִן-הַשִּׁבְעָה הוּא וְלַאֲבַדּוֹן יֵלֵךְ׃ 12 וְעֶשֶׂר הַקְּרָנַיִם אֲשֶׁר רָאִיתָ עֲשָׂרָה מְלָכִים הֵם אֲשֶׁר לֹא הִגִּיעוּ עוֹד לַמְּלוּכָה כִּי אִם-כִּמְלָכִים יִמְשְׁלוּ שָׁעָה אַחַת עִם-הַחַיָּה׃ 13 וְרוּחַ אֶחָד בָּהֶם וְאֶת-חֵילָם וּמֶמְשַׁלְתָּם יִתְּנוּ אֶל-הַחַיָּה׃ 14 וְהֵם יִלָּחֲמוּ אֶת-הַשֶּׂה וְהַשֶּׂה יִגְבַּר עֲלֵיהֶם כִּי הוּא אֲדוֹן הָאֲדֹנִים וּמֶלֶךְ הַמְּלָכִים וּצְבָאָיו עִמּוֹ קְרִיאֵי אֵל בְּחִירָיו וְנֶאֱמָנָיו׃ 15 וַיּוֹסֶף וַיֹּאמֶר אֵלָי הַמַּיִם אֲשֶׁר רָאִיתָ אֲשֶׁר ישֶׁבֶת שָׁם הַזּוֹנָה הֵם עַמִּים וּקְהַל עַמִּים וְגוֹיִם וּלְשֹׁנוֹת׃ 16 וְעֶשֶׂר הַקְּרָנַיִם אֲשֶׁר רָאִיתָ עִם-הַחַיָּה הֵם יַחְדָּו יִשְׂנְאוּהָ אֶת-הַזּוֹנָה וְהִצִּיגוּהָ שֹׁמֵמָה וַעֲרֻמָּה וְאָכְלוּ אֶת-בְּשָׂרָהּ וּשְׂרָפוּהָ כָּלִיל בָּאֵשׁ׃ 17 כִּי הָאֱלֹהִים נָתַן בְּלִבָּן לְמַלֵּא אֶת-עֲצָתוֹ וְלִהְיוֹת לָהֶן דֵּעָה אֶחָת לָתֵת אֶת-מֶמְשַׁלְתָּן לַחַיָּה עַד כִּי-יִתַּמּוּ דִבְרֵי הָאֱלֹהִים מֵהָחֵל וְעַד-כַּלֵּה׃ 18 וְהָאִשָּׁה אֲשֶׁר רָאִיתָ הִיא הָעִיר הַגְּדוֹלָה שָׂרָתִי בְמַמְלְכוֹת הָאָרֶץ׃

יח    1 וְאַחֲרֵי-כֵן רָאִיתִי מַלְאָךְ אַחֵר יֹרֵד מִן-הַשָּׁמָיִם שַׂר וְגָדוֹל וְהָאָרֶץ הֵאִירָה מִכְּבֹדוֹ׃ 2 וַיִּקְרָא בְּכֹחַ וְעֹז לֵאמֹר נָפְלָה נָפְלָה בָּבֶל הַגְּדוֹלָה הָיְתָה לִנְוֵה שְׂעִירִים בָּתֵּי כְלָאִים לְכָל-רוּחַ טָמֵא וְקֵן לְכָל-עוֹף שֶׁקֶץ וְנִתְעָב׃ 3 כִּי מִיֵין חֲמַת תַּזְנֻתָהּ שָׁחוּ כָל-הַגּוֹיִם וּמַלְכֵי תֵבֵל זָנוּ אֵלֶיהָ וְסֹחֲרֵי אֶרֶץ הֶעְשִׁירוּ מִשִּׁפְעַת חֵיל תַּעֲנֻגֶיהָ׃ 4 וָאֶשְׁמַע קוֹל אַחֵר מִן-הַשָּׁמַיִם קֹרֵא צְאוּ מִתּוֹכָהּ עַמִּי פֶּן-תִּגְּעוּ בְחַטֹּאתֶיהָ וְדָבְקוּ בָכֶם תַּחֲלֻאֶיהָ׃ 5 כִּי נָגְעוּ אֶל-הַשָּׁמַיִם חַטֹּאתֶיהָ וַיִּזְכֹּר אֱלֹהִים אֶת-עֲוֹנָהּ׃ 6 שַׁלְּמוּ-לָהּ גְּמוּלָהּ שֶׁגָּמְלָה לָכֶם עֲשׂוּ-לָהּ כִּפְלָיִם בְּמֶסֶךְ הַכּוֹס אֲשֶׁר מָסְכָה מִסְכוּ-לָהּ כִּפְלָיִם׃ 7 כַּאֲשֶׁר הָיְתָה גְבִירָה וּמְעֻנָּגָה כֵּן הָבִיאוּ עָלֶיהָ מַדְוֶה וָאֵבֶל כִּי אָמְרָה בִלְבָבָהּ מַלְכָּה אֲנִי לְעוֹלָם לֹא אֵשֵׁב אַלְמָנָה וְלֹא אֵדַע שְׁכוֹל׃ 8 עַל-כֵּן תָּבֹאנָה לָּהּ בְּיוֹם אֶחָד כָּל-תַּחֲלֻאֶיהָ מָוֶת אֵבֶל וְרָעָב וְהָיְתָה לְמַאֲכֹלֶת אֵשׁ כִּי חָזָק יְהוָֹה אֱלֹהִים הַשֹּׁפֵט אֹתָהּ׃ 9 וּמַלְכֵי-אֶרֶץ אֲשֶׁר זָנוּ אֹתָהּ וְהִתְעַלְּסוּ עִמָּהּ בְּתַעֲנוּגִים יִבְכּוּ יִסְפְּדוּ לָהּ בִּרְאֹתָם אֶת-עֲשַׁן שְׂרֵפָתָהּ׃ 10 וּמִמָּגוֹר וְשֶׁבֶר מֵרָחוֹק יַעַמְדוּ וְקוֹנֵנוּ אוֹי-לָךְ אוֹי-לָךְ בָּבֶל עִיר רַבָּתִי עָם קִרְיָה נִשְׂגָּבָה בְּרֶגַע אֶחָד בָּא עָלַיִךְ מִשְׁפָּטֵךְ׃ 11 וּבָכוּ וְהִתְאַבְּלוּ עָלֶיהָ כְּנַעֲנֵי-אָרֶץ כִּי אֵין קֹנֶה עוֹד לְסַחְרָם׃ 12 סְחַר זָהָב וָכֶסֶף וְאֶבֶן יְקָרָה וּפְנִינִים שֵׁשׁ וְאַרְגָּמָן וּמֶשִׁי וְשָׁנִי כָּל-עֲצֵי בְשָׂמִים כְּלֵי שֶׁנְהַבִּים וּכְלֵי עֵצִים יְקָרִים נְחשֶׁת בַּרְזֶל וָשָׁיִשׁ׃ 13 קִנְּמָן-בֶּשֶׂם וּקְטֹרֶת סַמִּים מֹר וּלְבוֹנָה יַיִן וְשֶׁמֶן סֹלֶת וְחִטִּים מִקְנֵה בָקָר וְצֹאן סוּס וְרֶכֶב עֶבֶד וְשִׁפְחָה׃ 14 רָחַק מִמֵּךְ פְּרִי תַאֲוָה לְעֵינָיִךְ וְכָל-עֲדָנִים וּמְגָדִים לֹא תִמְצְאִי-עוֹד אָזְלוּ לָהֶם וְאֵינָם׃ 15 וְהָרֹכְלִים אֲשֶׁר מָצְאוּ אוֹן לָהֶם בְּעִזְבוֹנֶיהָ מִמָּגוֹר וּמִשֶּׁבֶר יַעַמְדוּ מֵרָחוֹק וּבָכוּ אֵלֶיהָ וְסָפְדוּ לֵאמֹר׃ 16 אַלְלַי לַקִּרְיָה הַגְּדוֹלָה אֲשֶׁר לָבְשָׁה שֵׁשׁ וְאַרְגָּמָן וְשָׁנִי וַתַּעַד עֲדִי-זָהָב אַבְנֵי-חֵפֶץ וּפְנִינִים׃ 17 אֵיךְ סָפוּ תַּמּוּ כְּרֶגַע כָּל-הוֹן עָתָק זֶה וְכָל-חֹבֵל וְעֹבֵר אָרְחוֹת יַמִּים מַלָּחִים וְעֹשֵׂי מְלָאכָה בְּמַיִם רַבִּים מֵרָחוֹק עָמָדוּ׃ 18 וַיִּצְעֲקוּ בִרְאֹתָם אֶת-עֲשַׁן שְׂרֵפָתָהּ לֵאמֹר אַיֵּה עִיר כָּעִיר הַגְּדוֹלָה׃ 19 וַיִּזְרְקוּ עָפָר עַל-רָאשֵׁיהֶם וַיִּזְעֲקוּ בִּבְכִי וְאֵבֶל לֵאמֹר אַלְלַי לַקִּרְיָה הַגְּדוֹלָה מֵחֵיל עָשְׁרָהּ הֶעֱשִׁירוּ כָּל-בַּעֲלֵי אֳנִיּוֹת בַּיָּם וְעַתָּה הֲפוּכָה הִיא כְּמוֹ-רָגַע׃ 20 צַהֲלוּ וָרֹנּוּ שָׁמַיִם קְדשִׁים שְׁלִיחִים וּנְבִיאִים כִּי-נָקַם אֱלֹהִים אֶת-נִקְמַתְכֶם מִיָּדָהּ׃ 21 וּמַלְאָךְ אֶחָד גִּבּוֹר נָשָׂא אֶבֶן גְּדוֹלָה כְּפֶלַח רֶכֶב וַיַּשְׁלֵךְ אֶל-תּוֹךְ הַיָּם וַיֹּאמַר כָּכָה תִּשְׁקַע בָּבֶל הָעִיר הַגְּדוֹלָה בְּשֶׁצֶף קֶצֶף וְלֹא-תִמָּצֵא עוֹד׃ 22 לֹא-ישָּׁמַע עוֹד בָּךְ קוֹל מְנַגְּנִים וְשָׁרִים וְהֶמְיַת חֲלִלִים וַחֲצֹצְרוֹת וְכָל-חָרָשׁ וְחשֵׁב לֹא-יִמָּצֵא עוֹד בְתוֹכֵךְ אַף לֹא יִשָּׁמַע בָּךְ קוֹל רֵחָיִם׃ 23 וְאוֹר נֵר לֹא יָאֶר-בָּךְ וְקוֹל חָתָן וְקוֹל כַּלָּה אָבַד מִמֵּךְ יַעַן כְּנַעֲנַיִךְ הָיוּ נִכְבַּדֵּי-אֶרֶץ וּבִכְשָׁפַיִךְ נִדְּחוּ כָל-הַגּוֹיִם׃ 24 וְדַם הַנְּבִיאִים וְהַקְּדוֹשִׁים נִמְצָא בִכְנָפֶיהָ וְכָל-חַלְלֵי הָאָרֶץ׃

יט    1 וְאַחֲרֵי-כֵן שָׁמַעְתִּי קוֹל גָּדוֹל כְּקוֹל הָמוֹן רַב בַּשָּׁמַיִם קֹרִאים הַלֲלוּיָהּ הַתְּשׁוּעָה וְהַתִּפְאֶרֶת וְהָעֹז לַיהוָֹה אֱלֹהֵינוּ׃ 2 אֱמֶת וָצֶדֶק מִשְׁפָּטוֹ כִּי-שָׁפַט אֶת-הַזּוֹנָה הַגְּדוֹלָה אֲשֶׁר-הִשְׁחִיתָה אֶת-הָאָרֶץ בְּתַזְנֻתָהּ וַיִּדְרשׁ מִיָּדָה אֶת-דַּם עֲבָדָיו הַשָּׁפוּךְ׃ 3 וַיַּעֲנוּ שֵׁנִית הַלֲלוּיָהּ עַד-עוֹלְמֵי עוֹלָמִים יַעֲלֶה עֲשָׁנָהּ׃ 4 וְעֶשְׂרִים וְאַרְבָּעָה הַזְּקֵנִים וְאַרְבַּע הַחַיּוֹת נָפְלוּ עַל-פְּנֵיהֶם וַיִּשְׁתַּחֲווּ לֵאלֹהִים הַיּשֵׁב עַל-הַכִּסֵּא וַיֹּאמְרוּ אָמֵן הַלֲלוּיָהּ׃ 5 וְקוֹל קֹרֵא יָצָא מִן-הַכִּסֵּא לֵאמֹר הַלֲלוּ אֶת-אֱלֹהֵינוּ כָּל-עֲבָדָיו וִירֵאָיו הַקְּטַנִּים עִם-הַגְּדוֹלִים׃ 6 וָאֶשְׁמַע כְּקוֹל הָמוֹן רַב וּכְקוֹל מַיִם רַבִּים וְכִשְׁאוֹן רַעַם חָזָק קֹרֵא הַלֲלוּיָהּ כִּי-מָלַךְ יְהוָֹה אֱלֹהֵי צְבָאוֹת׃ 7 לְכוּ וְנִשְׂמְחָה וְנָגִילָה וְנִתְּנָה לּוֹ כָבוֹד כִּי בָאָה חֲתֻנַּת הַשֶּׂה וְכַלָּתוֹ עֲרוּכָה בַכֹּל׃ 8 וַיֻּתַּן לָהּ לִלְבּשׁ בּוּץ זַךְ וְנָקִי כִּי בוּץ הוּא צִדְקַת הַקְּדוֹשִׁים׃ 9 וַיֹּאמֶר אֵלַי כְּתֹב אַשְׁרֵי הַקִּרֻאִים אֶל-הַמִּשְׁתֶּה לַחֲתֻנַּת הַשֶּׂה וַיּוֹסֶף וַיֹּאמֶר אֵלֶּה דִבְרֵי אֱלֹהִים אֱמֶת׃ 10 וַאֲנִי נָפַלְתִּי לְרַגְלָיו לְהִשְׁתַּחֲוֹת לוֹ וַיֹּאמֶר אֵלַי לֹא-כֵן רְאֵה אָנֹכִי עֶבֶד כָּמוֹךָ וְחָבֵר אֲנִי לְךָ וּלְאַחֶיךָ הַמַּחֲזִיקִים בְּעֵדוּת יֵשׁוּעַ לֵאלֹהִים תִּשְׁתַּחֲוֶה כִּי עֵדוּת יֵשׁוּעַ הִיא רוּחַ הַנְּבוּאָה׃ 11 וָאֵרֶא אֶת-הַשָׁמַיִם נִפְתָּחִים וְהִנֵּה-סוּס לָבָן וְהָרֹכֵב עָלָיו נִקְרָא נֶאֱמָן וְיָשָׁר וּמִשְׁפָּטוֹ וּמִלְחַמְתּוֹ בְּמֵישָׁרִים׃ 12 עֵינָיו כְּלַהֲבוֹת אֵשׁ וַעֲטָרוֹת רַבּוֹת עַל-רֹאשׁוֹ וְעָלָיו שֵׁם חָקוּק אֲשֶׁר לֹא-יֵדַע אֹתוֹ אִישׁ מִלְּבַדּוֹ׃ 13 וְהוּא עֹטֶה לְבוּשׁ מְאָדָּם בְּדָם וּשְׁמוֹ נִקְרָא דְּבַר הָאֱלֹהִים׃ 14 וּצְבָא הַשָּׁמַיִם רֹכְבִים אַחֲרָיו עַל-סוּסִים לְבָנִים מְלֻבָּשִׁים בִּגְדֵי-בוּץ זַךְ וְנָקִי׃ 15 וְחֶרֶב חַדָּה יֹצֵאת מִפִּיו לְהַכּוֹת בָּהּ אֶת-הַגּוֹיִם וּלְרֹעֵם בְּשֵׁבֶט בַּרְזֶל וְהוּא דֹרֵךְ בְּגַת יֵין הַחֵמָה וְהַזַּעַף אֱלֹהֵי הַצְּבָאוֹת׃ 16 וְעַל-בִּגְדוֹ וְעַל-יְרֵכוֹ כָּתוּב שֵׁם מֶלֶךְ הַמְּלָכִים וַאֲדֹנֵי הָאֲדֹנִים׃ 17 וָאֵרֶא מַלְאָךְ אֶחָד עֹמֵד עַל-הַשֶּׁמֶשׁ וְקֹרֵא בְקוֹל גָּדוֹל אֶל-כָּל-עוֹף כָּנָף הַמְעוֹפֵף עַל-פְּנֵי רְקִיעַ הַשָּׁמַיִם לֵאמֹר בֹּאוּ הֵאָסְפוּ אֶל-הַמִּשְׁתֶּה הַגָּדוֹל לֵאלֹהִים׃ 18 וַאֲכַלְתֶּם בְּשַׂר מְלָכִים בְּשַׂר שָׂרֵי אֲלָפִים וּבְשַׂר גִּבּוֹרִים בְּשַׂר סוּסִים וְרֹכְבֵיהֶם וּבְשַׂר בְּנֵי חוֹרִים וַעֲבָדִים קְטַנִּים עִם-גְּדוֹלִים כֻּלָּם׃ 19 וָאֵרֶא אֶת-הַחַיָּה וּמַלְכֵי הָאָרֶץ וּמַחֲנֵיהֶם כִּי-עָרְכוּ לְהִלָּחֵם עִם-רֹכֵב הַסּוּס וּצְבָאוֹ׃ 20 וַתִּתָּפֵשׂ הַחַיָּה וּנְבִיא הַשֶּׁקֶר נֶאֱחַז עִמָּהּ הוּא אֲשֶׁר עָשָׂה הָאֹתוֹת לְפָנֶיהָ לְהַדִּיחַ אֶת-נֹשְׂאֵי תָו הַחַיָּה וְאֶת-הַמִּשְׁתַּחֲוִים לְצַלְמָהּ וְהֵם שְׁנֵיהֶם הֻשְׁלְכוּ חַיִּים אֶל-תּוֹךְ יַם הַתַּבְעֵרָה הַבֹּעֵר בְּגָפְרִית׃ 21 וְהַנִּשְׁאָרִים נָפְלוּ לְפִי הַחֶרֶב הַיֹּצֵאת מִפִּי רֹכֵב הַסּוּס וְעוֹף כָּל-כָּנָף שָׂבְעוּ מִבְּשָׂרָם׃

כ    1 וָאֵרֶא מַלְאָךְ יוֹרֵד מִן-הַשָּׁמָיִם וּבְיָדוֹ מַפְתֵּחַ הַתְּהוֹם וְרַתֹּק גָּדוֹל׃ 2 וַיִּתְפֹּשׂ אֶת-הַתַּנִּין אֶת-הַנָּחָשׁ הַקַּדְמֹנִי הוּא הַשָּׁטָן הַשּׂוֹטֵן וַיֶּאְסֹר אֹתוֹ לְאֶלֶף שָׁנִים׃ 3 וַיַּשְׁלִיכֵהוּ אֶל-הַתְּהוֹם וַיִּסְגֹּר עָלָיו וַיַּחְתֹּם מֵעַל לַמַּסְגֵּר לְבִלְתִּי יַדִּיחַ עוֹד אֶת-הַגּוֹיִם עַד-תֹּם הַשָּׁנִים אֶלֶף וְאַחֲרֵי-כֵן יֻתַּר לִזְמָן קָטֹן׃ 4 וָאֵרֶא כִסְאוֹת עֹמְדִים וְלַיּשְׁבִים עֲלֵיהֶם נִתַּן בְּיָדָם לַעֲשׂוֹת מִשְׁפָּט וְנַפְשׁוֹת כְּרוּתֵי רֹאשׁ לְמַעַן עֵדוּת יֵשׁוּעַ וּלְמַעַן דְּבַר הָאֱלֹהִים אֲשֶׁר לֹא הִשְׁתַּחֲווּ לַחַיָּה וּלְצַלְמָהּ וְלֹא נָתְנוּ אֶת-הַתָּו עַל-מִצְחָם וְיָדָם הֵם קָמוּ וַיִּחְיוּ וַיִּמְלְכוּ עִם-הַמָּשִׁיחַ אֶלֶף שָּׁנִים׃ 5 וְיֶתֶר הַמֵּתִים לֹא-קָמוּ לַחַיִּים עַד-תֹּם אֶלֶף הַשָּׁנִים זֹאת הִיא הַתְּקוּמָה הָרִאשֹׁנָה׃ 6 אַשְׁרֵי אַנְשֵׁי-קֹדֶשׁ אֲשֶׁר יִקְחוּ חֶלְקָם בַּתְּקוּמָה הָרִאשֹׁנָה הַמָּוֶת לֹא יִשְׁלָט-בָּם שֵׁנִית כִּי כֹהֲנִים יִהְיוּ לֵאלֹהִים וְלִמְשִׁיחוֹ וּמָלְכוּ עִמּוֹ אֶלֶף שָׁנִים׃ 7 וְאַחֲרֵי כְלוֹת אֶלֶף הַשָּׁנִים יֻתַּר הַשָּׂטָן מִבֵּית כִּלְאוֹ׃ 8 וְיָצָא לְהַדִּיחַ אֶת-הַגּוֹיִם בְּאַרְבַּע כַּנְפוֹת הָאָרֶץ אֶת-גּוֹג וּמָגוֹג וּלְהַקְהִילָם לַמִּלְחָמָה קָהָל אֲשֶׁר לֹא יִסָּפֵר כְּחוֹל הַיָּם׃ 9 וַיַּעֲלוּ עַל-מֶרְחֲבֵי אָרֶץ וַיָּסֹבּוּ אֶת-מַחֲנֵה הַקְּדוֹשִׁים וְאֶת-הָעִיר הַנֶּחֱמָדָה וַתֵּרֶד אֵשׁ מֵאֵת הָאֱלֹהִים מִן-הַשָּׁמַיִם וַתֹּאכַל אֹתָם׃ 10 וְהַשָּׂטָן אֲשֶׁר הִדִּיחָם נִדַּח לְיָם בֹּעֵר בְּאֵשׁ וְגָפְרִית אֲשֶׁר-שָׁם הַחַיָּה וּנְבִיא הַשָּׁקֶר לִהְיוֹת מְעֻנִּים שָׁם יוֹמָם וָלַיְלָה עַד-עוֹלְמֵי עוֹלָמִים׃ 11 וָאֵרֶא כִסֵּא זַךְ וְגָדוֹל וְהַיּשֵׁב עָלָיו אֲשֶׁר אֶרֶץ וְשָׁמַיִם נָדְדוּ מִפָּנָיו וְלֹא-נוֹדַע מְקוֹמָם אַיּוֹ׃ 12 וָאֵרֶא אֶת-הַמֵּתִים גְּדוֹלִים עִם-קְטַנִּים עֹמְדִים לִפְנֵי-יְהוָֹה וּסְפָרִים נִפְתָּחִים גַּם-סֵפֶר אַחֵר נִפְתָּח הוּא סֵפֶר הַחַיִּים וַיִּשָּׁפְטוּ הַמֵּתִים כַּעֲלִילוֹתָם כַּאֲשֶׁר הֵם כְּתוּבִים בַּסְּפָרִים הָהֵם׃ 13 וַיִּתֵּן הַיָּם אֶת-הַמֵּתִים אֲשֶׁר בְּתוֹכוֹ וְהַמָּוֶת וְהַשְּׁאוֹל נָתְנוּ אֶת-הַמֵּתִים אֲשֶׁר-בָּם וַיִּשָּׁפְטוּ אִישׁ אִישׁ כְּמַעֲשֵׂהוּ׃ 14 וְהַמָּוֶת וְהַשְּׁאוֹל נֶהֶדְפוּ אֶל-תּוֹךְ יָם בֹּעֵר בָּאֵשׁ זֶה הוּא הַמָּוֶת הַשֵּׁנִי הַיָּם הַבֹּעֵר בָּאֵשׁ׃ 15 וְכָל-אִישׁ אֲשֶׁר לֹא-נִמְצָא כָתוּב בְּסֵפֶר הַחַיִּים נֶהְדַּף אֶל-תּוֹךְ הַיָּם הַבֹּעֵר בָּאֵשׁ׃

כא    1 וָאֵרֶא שָׁמַיִם חֲדָשִׁים וְאֶרֶץ חֲדָשָׁה כִּי הַשָּׁמַיִם הָרִאשֹׁנִים וְהָאָרֶץ הָרִאשֹׁנָה עָבְרוּ וְהַיָּם אֵין עוֹד׃ 2 וְאֶת-הָעִיר הַקְּדוֹשָׁה אֶת-יְרוּשָׁלַיִם הַחֲדָשָׁה אָנֹכִי יוֹחָנָן רָאִיתִי יֹרֶדֶת מֵאֵת אֱלֹהִים מִן-הַשָּׁמָיִם כְּכַלָּה בְקִשֻּׁרֶיהָ עֲרוּכָה לְבַעְלָהּ׃ 3 וְקוֹל גָּדוֹל מִן-הַכִּסֵּא שָׁמַעְתִּי לֵאמֹר הִנֵּה מִשְׁכַּן אֱלֹהִים עִם-אֲנָשִׁים וְשָׁכַן בְּתוֹכָם הֵם יִהְיוּ-לוֹ לְעָם וְהָאֱלֹהִים יִהְיֶה אִתָּם וְהָיֶה לָהֶם לֵאלֹהִים׃ 4 וּמָחָה כָל-דִּמְעָה מֵעֵינֵיהֶם הַמָּוֶת לֹא-יִהְיֶה עוֹד וְאֵין אֵבֶל וּצְעָקָה אוֹ דְאָבָה כִּי הָרִאשֹׁנוֹת חָלְפוּ וְאֵינָם׃ 5 וְהַיּשֵׁב עַל-הַכִּסֵּא אָמַר הִנְנִי עֹשֶׂה הַכֹּל חָדָשׁ וְאֵלַי אָמַר כְּתֹב כִּי הַדְּבָרִים הָאֵלֶּה כֵּנִים וְנֶאֱמָנִים׃ 6 וַיּוֹסֶף וַיֹּאמֶר נֶעֱשָׂתָה אָנֹכִי אָלֶף וְתָו רִאשׁוֹן וְאַחֲרוֹן וְלַצָּמֵא אֶתֵּן מִבְּאֵר מַיִם חַיִּים חִנָּם׃ 7 הֵמְנַצֵּחַ יִירַשׁ כָּל-אֵלֶּה וַאֲנִי אֶהְיֶה-לּוֹ לֵאלֹהִים וְהוּא יִהְיֶה לִּי לְבֵן׃ 8 אֲבָל בַּעֲלֵי לֵב רֹגֶז בָּנִים לֹא אֵמֻן בָּם נִבְזִים וּמְרַצְּחִים זֹנִים וְקֹסְמִים עֹבְדֵי פֶסֶל וְכָל-אַנְשֵׁי שֶׁקֶר חֶלְקָם בַּיָּם הַבֹּעֵר בְּאֵשׁ וְגָפְרִית הוּא הַמָּוֶת הַשֵּׁנִי׃ 9 וַיָּבֹא אֵלַי אֶחָד מִן-שִׁבְעַת הַמַּלְאָכִים נֹשְׂאֵי שִׁבְעָה הַמִּזְרָקִים הַמְּלֵאִים שֶׁבַע הַמַּגֵּפוֹת הָאַחֲרֹנוֹת וַיְדַבֵּר אֵלַי לֵאמֹר בֹּא וְאַרְאֲךָ אֶת-הַכַּלָּה אֵשֶׁת הַשֶּׂה׃ 10 וַיִּשָּׂאֵנִי בָרוּחַ אֶל-הַר גָּדוֹל וְנִשָּׂא וַיַּרְאֵנִי אֶת-הָעִיר הַגְּדוֹלָה אֶת-יְרוּשָׁלַיִם עִיר הַקֹּדֶשׁ יֹרֶדֶת מִן-הַשָּׁמָיִם מֵאֵת אֱלֹהִים׃ 11 וְעָלֶיהָ חֹפֵף כְּבוֹד אֱלֹהִים וְהַמָּאוֹר לָהּ זוֹרֵחַ כְּאֶבֶן יִקְרַת עֵרֶךְ כְּאֶבֶן יָשְׁפֶה כְּעֵין תַּרְשִׁישׁ לָטֹהַר׃ 12 וְחוֹמָה גְדֹלָה וּגְבֹהָה תָּסֹב אֹתָהּ וּבָהּ שְׁנֵים עָשָׂר שְׁעָרִים וְעַל-הַשְּׁעָרִים שְׁנֵים עָשָׂר מַלְאָכִים וְשֵׁמוֹת כְּתוּבִים עֲלֵיהֶם עַל-שְׁמוֹת שְׁנֵים-עָשָׂר שִׁבְטֵי בְנֵי יִשְׂרָאֵל׃ 13 שְׁלשָׁה שְׁעָרִים מִזְרָחָה שְׁלֹשָׁה שְׁעָרִים צָפוֹנָה שְׁלֹשָׁה שְׁעָרִים נֶגְבָּה וּשְׁלֹשָׁה שְׁעָרִים מַעֲרָבָה׃ 14 וּלְחוֹמַת הָעִיר שְׁנֵים עָשָׂר יְסֹדוֹת וּשְׁנֵים עָשָׂר שֵׁמוֹת עַל-שְׁנֵים עָשָׂר שְׁלִיחֵי הַשֶּׂה חֲקוּקִים עֲלֵיהֶם׃ 15 וְהַדֹּבֵר בִּי הֶחֱזִיק קְנֵה זָהָב בְּיָדוֹ לָמֹד אֶת-הָעִיר וְאֶת-שְׁעָרֶיהָ וְאֶת-חוֹמָתָהּ׃ 16 וְהָעִיר הָיְתָה מְרֻבַּעַת אָרְכָּהּ כְּרָחְבָּהּ וַיָּמָד אֶת-הָעִיר בִּקְנֵה הַמִּדָּה שְׁנֵים עָשָׂר אֶלֶף כִּבְרַת-אֶרֶץ אָרְכָּהּ וְרָחְבָּהּ וְקֹמָתָהּ מִדָּה אַחַת לָהֶם׃ 17 וַיָּמָד אֶת-חוֹמָתָהּ מֵאָה וְאַרְבָּעִים וְאַרְבַּע אַמּוֹת בְּמִדַּת אִישׁ כִּי-זֹאת מִדַּת הַמַּלְאָכִים׃ 18 וּבִנְיַן הַחוֹמָה אַבְנֵי יָשְׁפֶה וְהָעִיר זְהַב אוֹפִיר כִּזְכוֹכִית לָטֹהַר׃ 19 וְהַיְסֹדוֹת לְחוֹמַת הָעִיר מִמֻלָּאִים בְּכָל-אַבְנֵי חֵפֶץ הַיְסוֹד הָרִאשׁוֹן יָשְׁפֶה הַשֵּׁנִי סַפִּיר הַשְּׁלִישִׁי שְׁבוֹ וְהָרְבִיעִי בָּרָקֶת׃ 20 הַחֲמִישִׁי שֹׁהַם הַשִּׁשִּׁי אֹדֶם הַשְּׁבִיעִי תַּרְשִׁישׁ הַשְּׁמִינִי יַהֲלֹם הַתְּשִׁיעִי פִּטְדָה הָעֲשִׂירִי נֹפֶךְ עַשְׁתֵּי הֶעָשָׂר לֶשֶׁם וּשְׁנֵים הֶעָשָׂר אַחְלָמָה׃ 21 וּשְׁנֵים עָשָׂר הַשְּׁעָרִים שְׁנֵים עָשָׂר פְּנִינִים כָּל-שַׁעַר וָשַׁעַר מֵאֶחָד הַפְּנִינִים וּרְחוֹב הָעִיר כֶּתֶם פָּז כִּזְכוֹכִית לָטֹהַר׃ 22 וְהֵיכָל לֹא-רָאִיתִי שָׁמָּה כִּי הֵיכָלָהּ יְהוָֹה אֱלֹהֵי צְבָאוֹת וְהַשֶּׂה׃ 23 וְהָעִיר אֵין צֹרֶךְ לָהּ לְאוֹר הַשֶּׁמֶשׁ וּלְנֹגַהּ הַיָּרֵחַ כִּי-כְבוֹד אֱלֹהִים אוֹרָהּ וְהַשֶּׂה נֵר לְהָאִיר לָהּ׃ 24 וּפְדוּיִם מִקֶּרֶב הַגּוֹיִם הָלְכוּ לְאוֹרָהּ וּמַלְכֵי-אֶרֶץ יָבִיאוּ אֵלֶיהָ הֲדָרָם׃ 25 שְׁעָרֶיהָ יוֹמָם לֹא-יִסָּגֵרוּ וְלַיְלָה לֹא-יִהְיֶה שָּׁם׃ 26 וְהוּבָא אֵלֶיהָ הֲדַר הַגּוֹיִם וְתִפְאַרְתָּם׃ 27 וְלֹא-יָבֹא שָׁם אִישׁ חָלָל וְלֹא בַעַל תּוֹעֵבָה אוֹ פֹעֵל שָׁקֶר כִּי בָאֶיהָ רַק הַכְּתֻבִים בְּסֵפֶר הַחַיִּים אֲשֶׁר לַשֶּׂה׃

כב    1 וַיַּרְאֵנִי נַחַל מַיִם חַיִּים כְּעֵין זְכוֹכִית לָטֹהַר יֹצֵא מִתַּחַת כִּסֵּא הָאֱלֹהִים וְהַשֶּׂה׃ 2 וּבְתוֹךְ רְחוֹב הָעִיר עַל-שְׂפַת הַנַּחַל מִזֶּה וּמִזֶּה עֵץ חַיִּים עֹשֶׂה פְּרִי שְׁתֵּים עֶשְׂרֵה פְעָמִים בַּשָּׁנָה מִדֵּי-חֹדֶשׁ בְּחָדְשׁוֹ יְבַכֵּר פִּרְיוֹ וְעָלֵהוּ לִתְרוּפַת הַגּוֹיִם׃ 3 וְכָל-חֵרֶם לֹא-יִהְיֶה עוֹד וּבְתוֹכָהּ יִכּוֹן כִּסֵּא הָאֱלֹהִים וְהַשֶּׂה וַעֲבָדָיו יְשָׁרְתֻהוּ׃ 4 וְהֵם יִרְאוּ אֶת-פָּנָיו וְנָשְׂאוּ אֶת-שְׁמוֹ עַל-מִצְחָם׃ 5 וְאֵין לַיְלָה שָׁם וְאֵין צֹרֶךְ לָהֶם לְאוֹר נֵר וּלְאוֹר שָׁמֶשׁ כִּי-יְהוָֹה אֱלֹהִים יִתֵּן אוֹרוֹ עֲלֵיהֶם וּלְפָנָיו יִמְלְכוּ עַד-עוֹלְמֵי עוֹלָמִים׃ 6 וַיֹּאמֶר אֵלַי הַדְּבָרִים הָאֵלֶּה כֵּנִים וְנֶאֱמָנִים וַיהוָֹה אֱלֹהֵי רוּחוֹת הַנְּבִיאִים שָׁלַח אֶת-מַלְאָכוֹ לְהַרְאוֹת אֶת-עֲבָדָיו אֵת אֲשֶׁר תִּקְרֶינָה בְּקֶרֶב הַיָּמִים׃ 7 הִנְנִי בָא עַד-מְהֵרָה אַשְׁרֵי הַשֹּׁמֵר דִּבְרֵי הַנְּבוּאָה בַּסֵּפֶר הַזֶּה׃ 8 וַאֲנִי יוֹחָנָן שָׁמַעְתִּי וְרָאִיתִי אֶת-אֵלֶּה וַיְהִי בְּשָׁמְעִי וּבִרְאֹתִי אֶת-אֵלֶּה וָאֶפֹּל לְרַגְלֵי הַמַּלְאָךְ אֲשֶׁר-הֶרְאַנִי אֶת-אֵלֶּה לְהִשְׁתַּחֲוֹת לוֹ׃ 9 וַיֹּאמֶר אֵלַי לֹא-כֵן רְאֵה אָנֹכִי עֶבֶד כָּמוֹךָ וְחָבֵר אֲנִי לְךָ וּלְאַחֶיךָ הַנְּבִיאִים וְלַשֹּׁמְרִים אֶת-דִּבְרֵי הַסֵּפֶר הַזֶּה לֵאלֹהִים תִּשְׁתַּחֲוֶה׃ 10 וַיֹּאמֶר אֵלַי עוֹד אַל-תַּחְתֹּם אֶת-דִּבְרֵי הַנְּבוּאָה אֲשֶׁר בַּסֵּפֶר הַזֶּה כִּי קָרוֹב הַמּוֹעֵד׃ 11 בֶּן-עַוְלָה יוֹסִיף עֲשׂוֹת עָוֶל וְנִתְעָב יוֹסִיף עַל-תּוֹעֲבָתוֹ אִישׁ צַדִּיק יוֹסִיף עַל-צִדְקָתוֹ וְקָדוֹשׁ יוֹסִיף לְהִתְקַדֵּשׁ בִּקְדֻשָּׁתוֹ׃ 12 וַאֲנִי הִנְנִי בָא עַד-מְהֵרָה וּשְׂכָרִי אִתִּי לְשַׁלֵּם לְאִישׁ אִישׁ כְּמַעֲשֵׂהוּ׃ 13 אָנֹכִי אָלֶף וְתָו רִאשׁוֹן וְאַחֲרוֹן רֹאשׁ וָסוֹף׃ 14 אַשְׁרֵי הַשּׁוֹמְרִים אֶת-מִצְוֹתָיו וְהָיָה לָהֶם רִשְׁיוֹן לֶאֱכֹל מֵעֵץ הַחַיִּים וְלָבֹא הָעִירָה דֶּרֶךְ שְׁעָרֶיהָ׃ 15 וּמִחוּץ לָעִיר הַכְּלָבִים וְהַקֹּסְמִים וְהַזֹּנִים וְהַמְרַצְּחִים וְעֹבְדֵי הָאֱלִילִים וְכָל-אֹהֵב כָּזָב וּפֹעֵל שָׁקֶר׃ 16 אֲנִי יֵשׁוּעַ שָׁלַחְתִּי אֶת-מַלְאָכִי לְהָעִיד לָכֶם עַל-אֵלֶּה לְעֵינֵי הַקְּהִלּוֹת אָנֹכִי שֹׁרֶשׁ דָּוִד וְחֹטֶר מִמֶּנּוּ אוֹר נֹגַהּ וְכוֹכַב הַשָּׁחַר׃ 17 וְהָרוּחַ וְהַכַּלָּה אֹמְרִים בֹּאָה-נָּא וְהַשֹּׁמֵעַ יֹאמַר בֹּאָה-נָּא וְכָל-צָמֵא יָבֹא וְכָל-הֶחָפֵץ יִקַּח מַיִם חַיִּים חִנָּם׃ 18 הַעִדֹתִי בְכָל-הַשֹּׁמֵעַ דִּבְרֵי נְבוּאַת הַסֵּפֶר הַזֶּה אִם-יוֹסִיף אִישׁ עֲלֵיהֶם יוֹסִיף אֱלֹהִים עָלָיו אֶת-הַמַּכּוֹת הַכְּתוּבוֹת בַּסֵּפֶר הַזֶּה׃ 19 וְאִם-יְגְרַע אִישׁ מִדִּבְרֵי סֵפֶר הַנְּבוּאָה הַזֹּאת יִגְרַע אֱלֹהִים אֶת-חֶלְקוֹ מֵסֵפֶר הַחַיִּים וּמֵעִיר הַקֹּדֶשׁ הַכְּתֻבִים בַּסֵּפֶר הַזֶּה׃ 20 וְהַמֵּעִיד דְּבָרִים אֵלֶּה עָנָה לֵאמֹר אָכֵן אֲנִי בָא עַד-מְהֵרָה אָמֵן בֹּאָה-נָּא הָאָדוֹן יֵשׁוּעַ׃ 21 חֶסֶד יֵשׁוּעַ הַמָּשִׁיחַ אֲדֹנֵינוּ עִם-כֻּלְכֶם אָמֵן׃