אֶל-הַתַּסְלוֹנִיקִים א

א    1 פּוֹלוֹס וְסִלְוָנוֹס וְטִימוֹתִיּוֹס אֶל-עֲדַת הַתַּסְלוֹנִיקִים הַדְּבֵקִים בֵּאלֹהִים אָבִינוּ וּבְיֵשׁוּעַ הַמָּשִׁיחַ אֲדֹנֵינוּ חֶסֶד לָכֶם וְשָׁלוֹם מֵאֵת אֱלֹהִים אָבִינוּ וַאֲדוֹנֵינוּ יֵשׁוּעַ הַמָּשִׁיחַ׃ 2 הִנֵּה אֲנַחְנוּ מְבָרְכִים אֶת-הָאֱלֹהִים בְּכָל-עֵת עַל-כֻּלְּכֶם וְלֹא נֶחְדַּל מֵהַזְכִּיר אֶתְכֶם בִּתְפִלּוֹתֵינוּ׃ 3 בְּזָכְרֵנוּ תָמִיד לִפְנֵי אֱלֹהֵינוּ אָבִינוּ אֶת-מַעֲשֵׂיכֶם בֶּאֱמוּנָה אֶת-עֲבֹדַתְכֶם בְּאַהֲבָה וְאֶת-מִבְטַח עֻזְּכֶם בְּתִקְוָה בַּאֲדֹנֵינוּ יֵשׁוּעַ הַמָּשִׁיחַ׃ 4 כִּי יָדַעְנוּ אַחִים כִּי בְּחִירֵי הָאֱלֹהִים אַתֶּם וִידִידָיו׃ 5 בַּאֲשֶׁר גַּם-בְּשׂרָתֵנוּ לֹא הִשְׁמַעְנוּ אֶתְכֶם בְּקוֹל דְּבָרִים לְבָד כִּי אִם-גַּם-בִּגְבוּרָה וּבְרוּחַ הַקֹּדֶשׁ וּבְבִטְחָה עֲצֻמָה כַּאֲשֶׁר רְאִיתֶם אֵיךְ הָלַכְנוּ בְתוֹכֲכֶם לְטוֹב לָכֶם׃ 6 וְאַתֶּם הֲלַכְתֶּם בְּעִקְּבוֹתֵינוּ וּבְעִקְּבוֹת אֲדֹנֵינוּ וַתְּקַבְּלוּ אֶת-דְּבָרֵינוּ וְלִבְּכֶם עָלַץ בְּרוּחַ הַקֹּדֶשׁ אַף כִּי-צָרָה גְדוֹלָה מְצָאַתְכֶם׃ 7 עַד אֲשֶׁר הֱיִיתֶם לְמוֹפֵת לְכָל-אַנְשֵׁי אֱמוּנָה בְּמַקְדּוֹנְיָא וּבַאֲכַיָּא׃ 8 כִּי מִכֶּם יָצָא קוֹל דְּבַר יְהוָֹה לֹא לְבַד בְּמַקְדּוֹנְיָא וּבַאֲכַיָּא כִּי אִם-גַּם בְּכָל-מָקוֹם יָצָא שֵׁמַע אֱמוּנַתְכֶם בֵּאלֹהִים עַד אֲשֶׁר לֹא נוֹתַר לָנוּ לְדַבֶּר-עוֹד דָּבָר׃ 9 כִּי הַשֹּׁמְעִים הִגִּידוּ בְפִיהֶם אֵיךְ בָּאנוּ אֲלֵיכֶם וְאֵיךְ עֲזַבְתֶּם אֶת-הָאֱלִילִים וַתָּשׁוּבוּ אֶל-הָאֱלֹהִים לַעֲבֹד אֱלֹהִים חַיִּים אֱלֹהֵי אֱמֶת׃ 10 וּלְחַכּוֹת לִבְנוֹ מִן-הַשָּׁמַיִם לְיֵשׁוּעַ אֲשֶׁר הֲקִימוֹ מִן-הַמֵּתִים וַאֲשֶׁר הוּא מַצִּילֵנוּ לֶעָתִיד לָבוֹא מֵחָרוֹן אָף׃

ב    1 הֵן נַפְשְׁכֶם אַחַי יֹדָעַת כִּי בֹאֵנוּ אֲלֵיכֶם לֹא-הָיָה לָרִיק׃ 2 כִּי אַחֲרֵי הַתְּלָאָה אֲשֶׁר מְצָאַתְנוּ וְאַחֲרֵי אֲשֶׁר הִתְעַלְּלוּ בָנוּ בְּפִילִפִּי הֲלֹא יְדַעְתֶּם כִּי אָז מָצָאנוּ עֹז בֵּאלֹהֵינוּ לְהַגִּיד לָכֶם בְּשׂרַת הָאֱלֹהִים נֶגֶד צֹרְרִים רַבִּים׃ 3 כִּי לֹא מִפִּי מַשְׁגֶּה יָצְאָה עֵדוּתֵנוּ וְלֹא מִקֶּרֶב טְמֵא שְׂפָתַיִם וְלֹא מִלָּשׁוֹן רְמִיָּה׃ 4 כִּי כַאֲשֶׁר מָצָא אֱלֹהִים לִבֵּנוּ נָכוֹן לְפָנָיו וַיַּפְקֵד בְּיָדֵינוּ אֶת-הַבְּשׂרָה כֵּן נְדַבֵּרָה לֹא לְהָפִיק רָצוֹן מִבְּנֵי-אָדָם כִּי אִם-מֵאלֹהִים הַבֹּחֵן לֵבָב׃ 5 הֵן יְדַעְתֶּם כִּי מֵעוֹדֵנוּ לֹא בָאנוּ בִשְׂפַת חֲלָקוֹת וְלֹא בְנִכְלֵי בֹצְעֵי בָצַע אֱלֹהִים לָנוּ לְעֵד׃ 6 גַּם לֹא-בִקַּשְׁנוּ כְבוֹד אֲנָשִׁים לֹא מִיֶּדְכֶם וְלֹא מִידֵי אֲחֵרִים אַף כִּי-הָיְתָה לָּנוּ צְדָקָה לְהַעֲמִיס עֲלֵיכֶם לְכַלְכְּלֵנוּ כִּשְׁלִיחֵי הַמָּשִׁיחַ׃ 7 אַךְ בִּנְעִמוֹת הָלַכְנוּ עִמָּכֶם בְּאֹמֶנֶת אֲשֶׁר תִּשָּׂא אֶת-בְּנָהּ בְּחֵיקָהּ׃ 8 וְכֵן זֶה כַמָּה נִכְסֹף נִכְסַפְנוּ לָכֶם עַד אֲשֶׁר-אָמַרְנוּ לָתֵת לָכֶם גַּם-בְּשׂרַת הָאֱלֹהִים וְגַם-נַפְשֵׁנוּ בַּעַדְכֶם כִּי-יְקַרְתֶּם בְּעֵינֵינוּ עַד-מְאֹד׃ 9 הֲלֹא תִזְכְּרוּ אַחַי אֶת-הֶעָמָל וְאֶת-הַיְגִיעָה אֵיךְ עָבַדְנוּ לַיְלָה וְיוֹמָם לְבִלְתִּי הֱיוֹת לְמַשָּׂא עַל-אִישׁ מִכֶּם כַּאֲשֶׁר הִגַּדְנוּ לָכֶם בְּשׂרַת הָאֱלֹהִים׃ 10 עֵדִים אַתֶּם וְעֵד אֱלֹהִים כִּי בְקֹדֶשׁ בְּצֶדֶק וּבְתָמִים הָלַכְנוּ לִפְנֵיכֶם שֹׁמְרֵי אֱמֻנִים׃ 11 כַּאֲשֶׁר אַתֶּם יֹדְעִים כִּי-כְאָב אֶל-בָּנָיו כֵּן דִּבַּרְנוּ דִבְרֵי מוּסָר וְתַנְחוּמִים עַל-לֵב כָּל-אִישׁ מִכֶּם׃ 12 וַנָּעִיד בָּכֶם לָלֶכֶת בְּדֶרֶךְ יְשָׁרָה לִפְנֵי אֱלֹהִים אֲשֶׁר קָרָא אֶתְכֶם לִכְבוֹד מַלְכוּתוֹ׃ 13 וּבַעֲבוּר זֹאת גַּם-אֲנַחְנוּ לֹא נֶחְדַּל מֵהוֹדוֹת אֶת-אֱלֹהֵינוּ כִּי הֶאֱזַנְתֶּם לִדְבַר הָאֱלֹהִים אֲשֶׁר הִשְׁמַעְנוּ בְאָזְנֵיכֶם לֹא כִדְבַר אֲנָשִׁים כִּי אִם-קִבַּלְתֶּם אֹתוֹ כִּדְבַר הָאֱלֹהִים לַאֲמִיתּוֹ אֲשֶׁר רַב כֹּחוֹ לְמַאֲמִינִים׃ 14 כִּי נִמְשַׁלְתֶּם אַחַי לִקְהִלוֹת הָאֱלֹהִים בְּיֵשׁוּעַ הַמָּשִׁיחַ אֲשֶׁר-בְּאֶרֶץ יְהוּדָה כִּי עַם הָאָרֶץ הֵצִיקוּ לָכֶם כַּאֲשֶׁר הַיְהוּדִים הֵצִיקוּ לָהֶן׃ 15 הֲלֹא הֵם אֲשֶׁר הֵמִיתוּ אֶת-יֵשׁוּעַ אֲדֹנֵינוּ וְאֶת-הַנְּבִיאִים וְגַם-אֹתָנוּ גֵּרְשׁוּ מִגֵּו וְהֵם לֹא טוֹבִים בְּעֵינֵי אֱלֹהִים וּנְלוֹזִים לִפְנֵי כָל-אָדָם׃ 16 אֲשֶׁר סָגְרוּ עָלֵינוּ מִקְּרֹא אֶל-הַגּוֹיִם לִתְשׁוּעָה וּבָזֹאת מָלְאָה סְאַת עֲוֹנָם כְּדַרְכָּם תָּמִיד וַחֲרוֹן אַף הִשִּׂיגָם עַד-לְכַלֵּה׃ 17 וַאֲנַחְנוּ אַחַי אַחֲרֵי אֲשֶׁר-רָחַקְנוּ מִכֶּם זֶה מְעַט כְּמַסְתִּירֵי פָנִים וְלֹא כְמַרְחִיקֵי לֵב בִּקַּשְׁנוּ מְאֹד לִרְאוֹת אֶת-פְּנֵיכֶם בְּחֵשֶׁק-רָב׃ 18 עַל-כֵּן הוֹאַלְנוּ לָבוֹא אֲלֵיכֶם אֲנִי פוֹלוֹס גַּם-פַּעַם גַּם-פַּעֲמָיִם וְהַשָּׂטָן עֲצָרָנוּ׃ 19 כִּי מַה תִּקְוָתֵנוּ מַה שִּׂמְחָתֵנוּ וּמָה עֲטֶרֶת תִּפְאַרְתֵּנוּ הֲלֹא אַתֶּם הִנְּכֶם לִפְנֵי יֵשׁוּעַ הַמָּשִׁיחַ אֲדֹנֵינוּ בְּבֹאוֹ׃ 20 כִּי הֵן אַתֶּם כְּבוֹדֵנוּ וְשִׂמְחָתֵנוּ׃

ג    1 עַל-כֵּן כַּלְכֵּל לֹא יָכֹלְנוּ עוֹד וַנֵּאוֹת לְהִוָּתֵר בְּאַתִּינַס לְבַדֵּנוּ׃ 2 וְאֶת-אָחִינוּ טִימוֹתִיּוֹס מְשָׁרֵת-אֵל בִּבְשׂרַת הַמָּשִׁיחַ שָׁלַחְנוּ לְחַזֵּק אֶת-לִבְּכֶם וּלְהַזְהִיר אֶתְכֶם בֶּאֱמוּנַתְכֶם׃ 3 לְבִלְתִּי יִנּוֹעַ לֶב-אִישׁ מִפְּנֵי הַצָּרוֹת הָאֵלֶּה הֲלֹא בְנַפְשְׁכֶם יְדַעְתֶּם כִּי לָזֹאת יֻעָדְנוּ׃ 4 כִּי גַם-הִגַּדְנוּ לָכֶם מֵאָז בִּהְיוֹתֵנוּ אֶצְלְכֶם כִּי-צָרָה תָבוֹא עָלֵינוּ וְכֵן גַּם-בָּאָה כַּאֲשֶׁר יְדַעְתֶּם׃ 5 וְעַל-כֵּן גַּם אֲנִי נִלְאֵיתִי כַּלְכֵּל וָאֶשְׁלַח לָדַעַת עַל-דְּבַר אֱמוּנַתְכֶם אִם לֹא נִסָּה הַמְנַסֶּה אֶתְכֶם לָתֵת אֶת-עֲמָלֵנוּ לָרִיק׃ 6 וְעַתָּה כַּאֲשֶׁר שָׁב אֵלֵינוּ טִימוֹתִיּוֹס מִכֶּם וַיְבַשְּׂרֵנוּ עַל-דְּבַר אֱמוּנַתְכֶם וְאַהֲבַתְכֶם כִּי זְכַרְתֶּם אֹתָנוּ לְטוֹבָה בְּכָל-עֵת וְכִי תִתְאַוּוּ לִרְאוֹת אֶת-פָּנֵינוּ כַּאֲשֶׁר גַּם-אֲנַחְנוּ מִתְאַוִּים לִרְאוֹת אֶת-פְּנֵיכֶם׃ 7 לְזֹאת אֵפוֹא אֶחָי בְּכָל-צָרוֹת וְרָעוֹת מָצָאנוּ תַנְחוּמִים בָּכֶם בִּגְלַל אֱמוּנַתְכֶם׃ 8 כִּי חַיִּים אֲנַחְנוּ הַיּוֹם אִם רַק עֹמְדִים אַתֶּם הָכֵן לִפְנֵי אֲדֹנֵינוּ׃ 9 כִּי בַמֶּה-נּוֹדֶה מַה-נָּשִׁיב לֵאלֹהִים בַּעֲבוּרְכֶם עַל כָּל-הַשִׂמְחָה אֲשֶׁר שָׂמַחְנוּ עֲלֵיכֶם לִפְנֵי אֱלֹהֵינוּ׃ 10 לַיְלָה וְיוֹמָם נַעְתִּיר וְנִתְפַּלֵּל כִּי יִנָּתֶן לָנוּ לִרְאוֹת אֶת-פְּנֵיכֶם וּלְהַשְׁלִים אֵת אֲשֶׁר-לָכֵם בֶּאֱמוּנַתְכֶם׃ 11 וֵאלֹהֵינוּ אָבִינוּ וְיֵשׁוּעַ הַמָּשִׁיחַ אֲדֹנֵינוּ יְיַשֵּׁר אֶת-דַּרְכֵּנוּ אֲלֵיכֶם׃ 12 וְאֶתְכֶם יַרְבֶּה וְכֵן יִתֵּן לָכֶם אֲדֹנֵינוּ לְהוֹסִיף בְּאַהֲבַת אִישׁ לְרֵעֵהוּ וּבְאַהֲבַת כָּל-אָדָם כַּאֲשֶׁר גַּם-אֲנַחְנוּ נוֹסִיף לְאַהֲבָה אֶתְכֶם׃ 13 וְכֵן יְכוֹנֵן אֶת-לִבְּכֶם בַּקֹּדֶשׁ וְלֹא יִמָּצֵא בָכֶם שֶׁמֶץ דָּבָר לִפְנֵי אֱלֹהֵינוּ אָבִינוּ בְּיוֹם בּוֹא יֵשׁוּעַ הַמָּשִׁיחַ אֲדֹנֵינוּ עִם-כָּל-קְדֹשָׁיו׃

ד    1 סוֹף דָּבָר אַחַי נִדְרֹשׁ מִכֶּם וְנַזְהִיר אֶתְכֶם בְּשֵׁם יֵשׁוּעַ אֲדֹנֵינוּ כַּאֲשֶׁר קִבַּלְתֶּם מִפִּינוּ לְהִתְהַלֵּךְ בְּמֵישָׁרִים וְלִמְצֹא חֵן בְּעֵינֵי אֱלֹהִים וְכַאֲשֶׁר גַּם-אַתֶּם הֹלְכִים כֵּן תַּעֲשׂוּ וְכֵן תּוֹסִיפוּ׃ 2 כִּי יְדַעְתֶּם אֶת-הַמִּצְוֹת אֲשֶׁר נָתַנּוּ לָכֶם בְּשֵׁם יֵשׁוּעַ אֲדֹנֵינוּ׃ 3 כִּי זֶה רְצוֹן אֱלֹהִים כִּי קְדשִׁים תִּהְיוּ וְתִנָּזְרוּ מִן-הַזְּנוּת׃ 4 וְכָל-אִישׁ מִכֶּם יָבִין לִשְׁמֹר כִּלְיוֹ בְּקֹדֶשׁ וּבְכָבוֹד׃ 5 לֹא-בְתַאֲוָה וַעֲגָבִים כְּדֶרֶךְ הַגּוֹיִם אֲשֶׁר לֹא יָדְעוּ אֶת-הָאֱלֹהִים׃ 6 וְלֹא-יִפְרֹץ אִישׁ אֶת-אָחִיו וְלֹא יוֹנֶנּוּ בַּדָּבָר הַזֶּה כִּי נֹקֵם יְהוָֹה עַל-כָּל-אֵלֶּה כַּאֲשֶׁר הִגַּדְנוּ וְהַעִידֹנוּ בָכֶם מֵאָז׃ 7 כִּי לֹא-לְתוֹעֵבָה קָרָא אֹתָנוּ אֱלֹהֵינוּ כִּי אִם-לְדֶרֶךְ הַקֹּדֶשׁ׃ 8 וְעַל-כֵּן הַבֹּזֶה לֹא אֶת-אָדָם הוּא בֹזֶה כִּי אִם-אֶת-אֱלֹהִים אֲשֶׁר נָתַן לָכֶם רוּחַ קָדְשׁוֹ׃ 9 וְעַל-דְּבַר אַהֲבַת אַחִים אֵין-לָנוּ לִכְתֹּב דָּבָר אֲלֵיכֶם כִּי הֲלֹא אַתֶּם לִמּוּדֵי אֱלֹהִים לְאַהֲבָה אִישׁ אֶת-אָחִיו׃ 10 וְכֵן גַּם-עֲשִׂיתֶם לְכָל-אֲחֵיכֶם אֲשֶׁר בְּמַקְדּוֹנְיָא כֻלָּהּ רַק-נִתְחַנֵּן אֲלֵיכֶם אַחַי כִּי כֵן תַּעֲשׂוּ וְכֵן תּוֹסִיפוּ׃ 11 וְתִתְאַמְּצוּ לָשֶׁבֶת בְּהַשְׁקֵט לַעֲשׂוֹת אִישׁ אֶת-מְלַאכְתּוֹ וְלִחְיוֹת עַל-יְגִיעַ כַּפָּיו כַּאֲשֶׁר צִוִּינוּ אֶתְכֶם׃ 12 וּבְכֵן תִּתְהַלְּכוּ בְמִישׁוֹר אֶת-אֵלֶּה אֲשֶׁר מִחוּץ לַעֲדָתֵנוּ וְלֹא יֶחְסַר לָכֶם כָּל-דָּבָר׃ 13 וְעַל-דְּבַר יְשֵׁנֵי עָפָר חָפַצְנוּ כִּי תֵדְעוּן כִּי לֹא לָכֶם לְהִתְאַבֵּל כַּאֲנָשִׁים אֲשֶׁר אֵין-לָהֶם תִּקְוָה׃ 14 כִּי כַאֲשֶׁר נַאֲמִין כִּי יֵשׁוּעַ מֵת וַיֶּחִי כֵּן גַּם-אֶת-הַיְשֵׁנִים עַל-יְדֵי יֵשׁוּעַ יָקִים אֱלֹהִים לְפָנָיו׃ 15 כִּי כָזֹאת אָנוּ אֹמְרִים לָכֶם בִּדְבַר יְהוָֹה כִּי אֲנַחְנוּ הַנִּשְׁאָרִים פֹּה בַחַיִּים לְמוֹעֵד בּוֹא אֲדֹנֵינוּ לֹא נְקַדֵּם אֶת-הַיְשֵׁנִים׃ 16 כִּי בִתְרוּעָה יֵרֵד אֲדֹנֵינוּ מִן-הַשָּׁמַיִם בְּקוֹל שׁוֹפַר אֱלֹהִים מִפִּי שַׂר-צְבָא הַמָּרוֹם וְהַמֵּתִים בַּמָּשִׁיחַ יָקוּמוּ אָז רִאשׁוֹנָה׃ 17 וְאַחֲרֵי-כֵן אֲנַחְנוּ הַנִּשְׁאָרִים בַּחַיִּים נִלָּקַח וְנַעֲלֶה עִמָּהֶם יַחְדָּו בַּעֲנָנִים לִקְרַאת הָאָדוֹן בִּרְקִיעַ הַשָּׁמָיִם וְכֵן נִהְיֶה עִם-הָאָדוֹן לָנֶצַח׃ 18 לָכֵן אֵפוֹא נַחֲמוּ אִישׁ אֶת-רֵעֵהוּ בִּדְבָרִים כָּאֵלֶּה׃

ה    1 וְעַל-דְּבַר הָעִתִּים וְהַזְּמַנִּים אֵין-דָּבָר אַחַי לְהִכָּתֵב לָכֶם׃ 2 הֲלֹא יְדַעְתֶּם הֵיטֵב כִּי יוֹם-יְהוָֹה כְּגַנָּב בַּלַּיְלָה יָבוֹא׃ 3 כַּאֲשֶׁר יֹאמְרוּ שָׁלוֹם וְשַׁלְוָה אָז פִּתְאֹם יָבוֹא עֲלֵיהֶם אֵידָם כְּחֶבְלֵי יוֹלֵדָה וְלֹא יִמָּלֵט לָהֶם פָּלִיט׃ 4 אֲבָל אַתֶּם אַחַי אֵינְכֶם בַּחֹשֶׁךְ אֲשֶׁר יָבוֹא עֲלֵיכֶם הַיּוֹם כְּגַנָּב׃ 5 כִּי כֻלְּכֶם בְּנֵי אוֹר וּבְנֵי יוֹם אַתֶּם לֹא בְנֵי לַיְלָה וְלֹא בְנֵי חשֶׁךְ אֲנָחְנוּ׃ 6 עַל-כֵּן אֵין לָנוּ לִישׁוֹן כִּשְׁאָר הָאֲנָשִׁים כִּי אִם-נִשְׁקֹד וְנִשְׁתַּמֵּר מִשִּׁכָּרוֹן׃ 7 כִּי הַיְשֵׁנִים יִישְׁנוּ בַלָּיְלָה וְהַשִּׁכֹּרִים יִשְׁכְּרוּן בַּלָּיְלָה׃ 8 וַאֲנַחְנוּ בְנֵי יוֹם נִשְׁתַּמֵּר מִשְּׁכָּרוֹן וְנִלְבַּשׁ שִׁרְיוֹן אֱמוּנָה וְאַהֲבָה וּלְכוֹבַע לָנוּ תִּקְוַת הַיְשׁוּעָה׃ 9 כִּי לֹא-יָצַר אֹתָנוּ אֱלֹהִים לְכַלֹּתֵנוּ בְאַפּוֹ כִּי אִם-לְהָבִיא לָנוּ יְשׁוּעָה בְּיַד-יֵשׁוּעַ הַמָּשִׁיחַ אֲדֹנֵינוּ׃ 10 הוּא אֲשֶׁר מֵת בַּעֲדֵנוּ וְאִם-נָקִיץ אוֹ-נִישַׁן עִמּוֹ נִחְיֶה יַחְדָּו׃ 11 עַל-כֵּן הַזְהִירוּ אִישׁ אֶת-רֵעֵהוּ וְהָשִׁיבוּ אִישׁ אֶת-נֶפֶשׁ אָחִיו כַּאֲשֶׁר עֲשִׂיתֶם עַד-כֹּה׃ 12 וַאֲנַחְנוּ נִפְצַר בָּכֶם אַחִים לָדַעַת בְּשׂוּם לֵב אֶת-הָעֲמֵלִים בָּכֶם וְאֶת-הַנִּצָּבִים עֲלֵיכֶם בְּשֵׁם הָאָדוֹן וְאֶת-הַמּוֹכִיחִים אֶתְכֶם׃ 13 וּלְהַכִּיר יְקַר עֶרְכָּם הַגָּדוֹל לְאַהֲבָה אֹתָם לְמַעַן פָּעֳלָם וְהַחֲזִיקוּ שָׁלוֹם בֵּינֵיכֶם׃ 14 וְאַתֶּם אַחֵינוּ נַזְהִיר אֶתְכֶם הוֹכִיחוּ אֶת-הַמַּמְרִים אַמְּצוּ אֶת-רַכֵּי הַלֵּבָב סַעֲדוּ אֶת-החֹלִים וְהַאֲרִיכוּ אַף לְכָל-אָדָם׃ 15 הִשָּׁמְרוּ פֶּן-יִגְמֹל אִישׁ לְאִישׁ רָעָה תַּחַת רָעָה כִּי אִם-רִדְפוּ לְהֵיטִיב תָּמִיד לְאִישׁ אִישׁ מִכֶּם וְגַם לְכָל-אָדָם׃ 16 וְאַךְ שְׂמֵחִים תִּהְיוּ כָּל-הַיָּמִים׃ 17 וְלֹא תַחְדְּלוּ מֵהִתְפַּלֵּל תָּמִיד׃ 18 הוֹדוּ עַל-כָּל-דָּבָר כִּי-זֶה לָכֶם חֵפֶץ אֱלֹהִים בְּיֵשׁוּעַ הַמָּשִׁיחַ׃ 19 לֹא תְכַבּוּ אֶת-הָרוּחַ׃ 20 וְאֶת-הַנְּבוּאוֹת לֹא תִפְרָעוּ׃ 21 בַּחֲנוּ כָּל-דָּבָר וְהַחֲזִיקוּ בַּטּוֹב׃ 22 וּמִכָּל-שֶׁמֶץ דָּבָר רָע אַף לְמַרְאֵה עָיִן הַרְחִיקוּ רַגְלֵיכֶם׃ 23 וֵאלֹהֵי הַשָּׁלוֹם הוּא יְקַדֵּשׁ אֶתְכֶם מֵחָחֵל וְעַד-כַּלֵּה וְיִשְׁמָרְכֶם מִכָּל-רָע בְּרוּחַ נֶפֶשׁ וּגְוִיָּה לְמוֹעֵד בּוֹא אֲדֹנֵינוּ יֵשׁוּעַ הַמָּשִׁיחַ׃ 24 נֶאֱמָן הוּא הַקֹּרֵא אֶתְכֶם וְהוּא גַּם-יַעֲשֶׂה׃ 25 אָנָּא אֶחָי הִתְפַּלְּלוּ-נָא בַּעֲדֵנוּ׃ 26 שַׁאֲלוּ לִשְׁלוֹם כָּל-הָאַחִים בִּנְשִׁיקַת הַקֹּדֶשׁ׃ 27 הִנְנִי מַשְׁבִּיעֲכֶם בַּאֲדֹנֵינוּ לָתֵת הָאִגֶּרֶת הַזֹּאת לְהִקָּרֵא בְאָזְנֵי כָל-הָאַחִים הַקְּדוֹשִׁים׃ 28 חֶסֶד יֵשׁוּעַ הַמָּשִׁיחַ אֲדֹנֵינוּ עִמָּכֶם אָמֵן׃


Index              Poster